ރާއްޖޭގެ އެކި ހިސާބުތަކަށް ފާއިތުވި ދުވަސްތަކުގައި ކުރަމުންދިޔަ ދުންފުހުގެ އަސަރު މިހާރު ކުޑަވެފައިވާ ކަމަށް މޫސުމާ ބެހޭ ގައުމީ އިދާރާ (މެޓް) އިން ހާމަކޮށްފިއެވެ.
ވައިގެ ސާފުކަން ހުރި މިންވަރު ބަލާ ބައިނަލްއަގުވާމީ މިންގަނޑެއް ކަމަށްވާ "އައިކިއު އެއާ" ގެ ތަފާސްހިސާބުތަކަށް ބަލާއިރު، ވައިގެ ތެރޭގައި ހިމެނޭ ނުރައްކާތެރި މާއްދާއެއް ކަމަށްވާ "ފައިން ޕާޓިކިއުލޭޓް މެޓާ" (ޕީއެމް2.5) ގެ މިންވަރު މިހާރު ވަނީ ވަރަށް ބޮޑަށް ދަށްވެފައެވެ. އެގޮތުން މިހާރު ވައިގެ ނުސާފުކަން ހުރީ ކޮންމެ ކިއުބިކް މީޓަރެއްގައި 14.2 މައިކްރޯ ގްރާމްގައެވެ.
މެޓް އޮފީހުން ބުނީ މިވަގުތު ރާއްޖޭގެ ހުރިހާ ސަރަހައްދަކަށް ވެސް ދުންފުހުގެ އަސަރު ވަރަށް ބޮޑަށް ދަށްވެފައިވާ ކަމަށާއި، ޖައްވު ފެންނަނީ ވަރަށް ސާފުކޮށް ކަމަށެވެ. އެގޮތުން ހަނިމާދޫ ސަރަހައްދު މިހާރު އެއްކޮށް ސާފުވެފައިވާ ކަމަށާއި، މާލެ ސަރަހައްދުގައި މިހާރު ދުރު ފެންނަ މިންވަރު ހުރީ ހަ ކިލޯ މީޓަރުގައިކަމަށް ވެސް މެޓުން ބުނެފައިވެއެވެ.
މެޓް އޮފީހުން ލަފާކުރާ ގޮތުގައި ކުރިއަށް އޮތް ދެ ތިން ދުވަހު ވެސް ދުންފުހުގެ އަސަރު ހުންނާނީ މިހާރެކޭ އެއްގޮތަށް ދަށް މިންވަރެއްގައެވެ. ނަމަވެސް، މި ދުވަސްވަރު، ބައެއް ފަހަރު ދުންފުހުގެ އަސަރު މައްޗަށް ގޮސްފައި އަނެއްކާވެސް ދަށަށް ދިއުމަކީ އެކަށީގެންވާ ކަމެއް ކަމަށް އެ އިދާރާއިން ފާހަގަކުރެއެވެ.