ރޭ އެކަނި ވެސް 4196 މަސްދަޅު ކޭސް ދޫކޮށްފައިވާކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވުޒާރާއިން ބުނެފިއެވެ.
މަސްދަޅު ކޭސްތައް ބެހުމުގެ މަސައްކަތް ފަށާފައިވާއިރު ކޮންމެ ރެޔަކު 8:00 އިން ފެށިގެން 11:00 އަށް މަސް ދަޅު ކޭސް ދޫކުރުން ކުރިއަށްދާނެކަމަށް ލޯކަލް ގަވަމަންޓު މިނިސްޓްރީން ބުނެފައިވެއެވެ. ރޯދާ ހަދިޔާ ދޫކުރުމަށް ހަމަޖެހިފައިވަނީ 2026 ޖެނުއަރީ 24 އިން 2026 ފެބްރުއަރީ 11 އަށެވެ.
ރޭ 8:30 އިން 11:00 އާ ހަމަޔަށް ގްރޭޓާ މާލެ ސަރަހައްދުގައި ރޯދަ ހަދިޔާ ދޫކުރުމަށް ގާއިމްކޮށްފައިވާ މަރުކަޒުތަކުން 4196 މަސްދަޅު ކޭސް ދޫކޮށްފައިވާ ކަމަށް މިނިސްޓްރީން ބުނެ އެވެ.
އެންމެ ގިނައިން މަސްދަޅު ކޭސް ދޫކޮށްފައިވަނީ ގަޅޮލު ދަނޑުގައި ގާއިމްކޮށްފައިވާ މަރުކަޒުތަކުންކަމަށާއި ގަލޮޅު ދަނޑުން އެއީ 783 މަސްދަޅު ކޭސް ދޫކޮށްފައިވާކަމަށް މިނިސްޓްރީން ބުނެ އެވެ. ގަލޮޅު ދަނޑުގައި 4 ތަނަކުން މަސްދަޅު ކޭސް ދޫކުރަމުން ދެ އެވެ.
ރޯދަ ހަދިޔާގެ ޓޯކަން ލިބިލައްވާނީ roadhahadhiya.mv ޕޯޓަލް މެދުވެރިކޮށެވެ. ޕޯޓަލްގައި ރަޖިސްޓްރީ ކުރެވޭނީ ޢުމުރުން 18 އަހަރުވެފައިވާ ދިވެހި ރައްޔިތަކަށް، ޕޯޓަލްގައި ބުނެފައިވާ މަޢުލޫމާތު ފުރިހަމަ ކޮށްގެންނެވެ .އެކަކަށް ގިނަވެގެން ރަޖިސްޓްރީ ކުރެވޭނީ ދެ ގޭބިސީގެ ކަރަންޓް މީޓަރަށެވެ. މި ގޮތަށް ރަޖިސްޓްރީ ކުރެވޭނީ ވެސް އެއް ރިކުއެސްޓެއްގައި ނުވަތަ އެއް ޓޯކަނެއްގައެވެ.
ރޯދަ ހަދިޔާ ލިބޭނީ ޓޯކަން ރަޖިސްޓްރީ ކުރެއްވި ފަރާތަށް އެކަނި ކަމަށާއި އެ ފަރާތަށް ވެސް މަސްދަޅު ކޭސް ލިބޭނީ އައީޑީ ކާޑުގެ އަސްލު ގެންނެވުމުން ކަމަށް މިނިސްޓްރީން ބުނެ އެވެ. އަދި ރަޖީސްޓްރީ ކުރި ފަރާތް ފިޔަވައި އެހެން ފަރާތަކަށް މަސްދަޅު ކޭސް ދޫނުކުރާނެ ކަމަށާއި ރޯދަ ހަދިޔާ ބަލައި ދުރުވާއިރު ރަޖިސްޓްރީކޮށްފައިވާ ކަރަންޓް މީޓަރު ނުވަތަ މީޓަރުތަކުގެ 2025 ވަނަ އަހަރުގެ ނޮވެންބަރު ނުވަތަ ޑިސެންބަރު މަހުގެ ކަރަންޓް ބިލްގެ ފޮޓޯ ކޮޕީއެއް ނުވަތަ ބިލްގެ އިލެކްޓްރޯނިކް ކޮޕީއެއް ގެންނަވަން ވާނެކަމަށް މިނިސްޓްރީން ބުނެ އެވެ.