ކެންސަރު ބަލި މީހުންނަށް ހާއްސަ ކީމޯ ތެރަޕީގެ ޚިދުމަތް އުނގޫފާރު ރީޖަނަލް ހޮސްޕިޓަލްގައި ފަށައިފިއެވެ.
މިއީ، މާލެއިން ބޭރުން ރާއްޖޭގައި ކީމޯ ތެރަޕީގެ ޚިދުމަތް ފެށި 3 ވަނަ ހޮސްޕިޓަލެވެ. ތަފާސްހިސާބުން ދައްކާ ގޮތުގައި ރ.އަތޮޅަކީ ރާއްޖޭގައި 4 ވަނައަށް އެންމެ ގިނައިން ކެންސަރު ބަލި މީހުން ރަޖިސްޓަރކޮށްފައިވާ އަތޮޅެވެ.
އާސަންދައިގެ ތަފާސްހިސާބަށް ބަލާއިރު ރާއްޖޭގައި އެންމެ ގިނަ މީހުން ބޭސްފަރުވާއަށް ރާއްޖެއިން ބޭރަށް ދާން އެދޭ ދާއިމީ އެންމެ ބޮޑު ބައްޔަކީ ކެންސަރު ބައްޔެވެ.
އުނގޫފާރު ރީޖަނަލް ހޮސްޕިޓަލުން ބުނީ އެހޮސްޕިޓަލުގައި ކީމޯގެ ޚިދުމަތް ފެށުމަށް އައިޖީއެމްއެޗުގެ، އޮންކޮލޮޖީ ޑިޕާޓްމަންޓުގެ އެހީތެރިކަމާއެކު ނަރުހުން ތަމްރީނު ކޮށްފައިވާ ކަމަށެވެ. އަދި ޚިދުމަތް ފެށުމަށް ބޭނުންވާ 2 ނަރުހުން މިހާރު ތަމްރީނުކޮށްފައިވާ ކަމަށެވެ. މިކަމަށްޓަކައި ޚާއްޞަ ކީމޯ ރޫމެއް ގާއިމުކޮށްފައިވާއިރު، އެއްފަހަރާ 2 މީހުންނަށް ކީމޯ ސެޝަންތައް ކުރިއަށް ގެންދެވޭނެ އިންތިޒާމު ހަމަޖައްސަވާފައިވާ ކަމަށްވެސް އެހޮސްޕިޓަލުން ބުނެއެވެ،
އުނގޫފަރު ރީޖަނަލް ހޮސްޕިޓަލުން ކީމޯ ނެގުމަށް އެދޭ ފަރާތްތަކުން ރަޖިސްޓްރީ ކުރަން މިހާރު ވަނީ ހުޅުވާލާފަ އެވެ. އަދި ކީމޯ ނެގުމަށް ބޭނުންވާ ފަރާތްތަކުން ހޮސްޕިޓަލަށް ގުޅައިގެން ކީމޯގެ ސެޝަނަށް ބޭނުންވާ ބޭސް ހޯދުމުގެ ކަންކަން ހަމަޖެއްސުމަށް އެހޮސްޕިޓަލުން އެދެއެވެ.
ހުޅުމާލެ ހޮސްޕިޓަލުގެ ތަފާސްހިސާބަށް ބަލާއިރު ރ.އަތޮޅަކީ، ރާއްޖޭގައި 4 ވަނައަށް އެންމެ ގިނައިން ކެންސަރު ބަލި މީހުން ރަޖިސްޓްރީކޮށްފައިވާ ސަރަޙައްދެވެ. އުނގޫފާރު ހޮސްޕިޓަލުގެ ތަފާސްހިސާބަށް ބަލާއިރު ރ.އަތޮޅުގައި މިވަގުތު ކެންސަރަށް ފަރުވާ ހޯދަމުންދާ 58 ބަލި މީހުން އެބަތިއްބެވެ.
މިވަގުތު ހޮސްޕިޓަލުގެ އޮންކޯ ނުވަތަ ކެންސަރަށް ޚާއްސަ ޑޮކްޓަރުން ނެތުމާއެކު، ހޮސްޕިޓަލުން މަސައްކަތް ކުރަމުންދަނީ އައިޖީއެމްއެޗުގެ އޮންކޯ ޑިޕާޓްމަންޓާއި ގުޅިގެންނެވެ. އަދި ބަލި މީހަކަށް ވަގުތުން ފަރުވާ ބޭނުންވާ ޙާލަތެއްގައި ވީހާވެސް އަވަހަކަށް މާލެ ފޮނުވޭނެ އިންތިޒާމު ހޮސްޕިޓަލުން ހަމަޖައްސާނެ ކަމަށް އެހޮސްޕިޓަލުން ވިދާޅުވެއެވެ.
މިވަގުތުގެ ތާފާސްހިސާބަށް ބަލާއިރު މާލެ ސަރަޙައްދަށްފަހު އެންމެ ގިނައިން ކެންސަރު ބަލި މީހުން ތިބީ، ސ.އަތޮޅުގައެވެ. އަދި 3 ވަނައަށް އެންމެ ގިނައިން ކެންސަރު ބަލި މީހުން ތިބި ކަމަށް ދައްކަނީ ށ.އަތޮޅުގައެވެ.
ކެންސަރުގެ ފަރުވާއަށް ރާއްޖޭގައި ފުރަތަމަ ކީމޯގެ ޚިދުމަތް ފެށީ، 2014 ވަނަ އަހަރުގައެވެ. މާލެއިން ބޭރުން އެންމެ ފުރަތަމަ ކީމޯގެ ޚިދުމަތް 2020 ވަނަ އަހަރު ފެށީ، ނައިފަރުގައި ހުންނަ ޅ.އަތޮޅު ހޮސްޕިޓަލުގައެވެ. އެއަށްފަހު 2023 ވަނަ އަހަރުގެ ތެރޭގައި ޑރ.ޢަބްދުއްސަމަދު މެމޯރިއަލް ހޮސްޕިޓަލާއި، ކުޅުދުއްފުށީ ރީޖަނަލް ހޮސްޕިޓަލުގައިވެސް ކީމޯ ދެވޭނެ އިންތިޒާމު ވަނީ ހަމަޖައްސާފަ އެވެ.