އެމްޑީޕީގެ ވެރިކަމެއްގައި ރައްޔިތުން ސަރުކާރު ފަހަތުން ދުވަން ނުޖެހޭކަމަށް މިދިޔަ އެމްޑީޕީ ވެރިކަމުގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ކުރިއަށް އޮތް ލޯކަލް ކައުންސިލް އިންތިހާބަށް ކެމްޕެއިން ކުރެއްވުމަށް ފުވައްމުލަށް ސިޓީގައި ބޭއްވި "މިޅިރަށޮ ތެލަފަތަހަ" ޖަލްސާގައި ވާހަކަދައްކަވަމުން ފައިސަލް ވިދާޅުވީ އެމްޑީޕީގެ ސަރުކާރެއް އޮވެއްޖެނަމަ ރައްޔިތުންގެ ހައްގުތައް ކަށަވަރު ވެގެންދާ ކަމަށެވެ. އަދި އެމްޑީޕީގެ ވެރިކަމުގައި ފުވައްމުލައް ސިޓީގެ ކަންކަން ވެސް ކުރިއަށް ދިޔަ ކަމަށާއި ސަރުކާރު ފަހާ ރައްޔިތުން ދުވަން ޖެހުން ތަން ނުފެންނަ ކަމަށް ވިދާޅުވި އެވެ.
ފައިސަލް ވިދާޅުވީ އެމްޑީޕީ ސަރުކާރުގައި ފުވައްމުލައް ސިޓީއަށް ކޮށްދިން ކަންކަން ކިޔައި ކޮޅުން ނުލާނެ ކަމަށެވެ. އެގޮތުން އެއް ކަމެއްގެ ގޮތުގައި ފައިސަލް ފާހަގަކުރެއްވީ ފުވައްމުލައް ސިޓީގެ ރައްޔިތުންގެ އެންމެ ބޮޑު ކަންބޮޑުވުމެއްގެ ގޮތުގައި އޮތް އެ ރަށުގެ އިރުމަތީ ފަރާތް ގިރަމުން ދިޔަ ދިޔުން ހުއްޓުވުމަށް ރާއްޖޭގައި ހިންގި އެންމެ ބޮޑު ރަށްގިރުން ހުއްޓުވުމުގެ މަޝްރޫއު ނުވަތަ ޝޯ ޕްރޮޓެކްޝަން މަޝްރޫއު ހިންގައި ނިންމީ އެމްޑީޕީ ސަރުކާރުގައި ކަމަށް ވިދާޅުވި އެވެ.
މި ސަރުކާރުގެ ތިންވަނަ އަހަރު ގުނަމުންދާއިރު ހަގީގަތުގައި ވެސް މި ސަރުކާރުން ފުވައްމުލައް ސިޓީގައި އެއްވެސް މަޝްރޫއުއެއް ކުރިއަށް ނުގެންދަނީތޯ ސުވާލު އުފެއްދެވި އެވެ. އެއީ ރަށުތެރެއަށް ބަލާލާއިރު އެއްވެސް މަސައްކަތެއް ކުރާތަން ނުފެންނާތީކަމަށް ފައިސަލް ވިދާޅުވި އެވެ.
ފައިސަލްގެ ވާހަކައިގައި އިދިކޮޅު އެމްޑީޕީގެ ކައުންސިލެއް އިންތިހާބުކޮށްފިނަމަ ރައްޔިތުންގެ މަސްލަހަތު އިސްކުރާނެކަމަށް ވިދާޅުވި އެވެ. އަދި ރަށަށް ތަރައްގީ އާއި ކުރިއެރުން ލިބިގެންދާނެކަމަށް ފައިސަލް ވިދާޅުވި އެވެ.
އެހެންކަމުން ކުރިއަށް އޮތް ލޯކަލް ކައުންސިލް އިންތިހާބު އެމްޑީޕީއިން ކާމިޔާބު ކުރުން މުހިންމުކަމަށް ފައިސަލް ވިދާޅުވި އެވެ.