ކުރިއަށް އޮތް ލޯކަލް ކައުންސިލް އިންތިހާބުގައި ސަރުކާރުގެ ފަރާތުން މޭޔަރުކަމަށް ވާދަ ކުރެއްވުމަށް މޭޖަރ ޖެނެރަލް ރިޓަޔާޑް މޫސާ އަލީ ޖަލީލު ނެރުއްވީ މާލޭގެ ތަރައްގީ އަވަސް ކުރެއްވުމަށްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މޫސާ އަލީ ޖަލީލުގެ ކެމްޕެއިން ހަރަކާތުގައި ވާހަކަދައްކަވަމުން ރައީސް ވަނީ މޫސާ އަލީ ޖަލީލާކީ ސީދާ އެމަނިކުފާނުގެ "ޗޮއިސް"އެއް ކަމަށް ވިދާޅުވެފަ އެވެ.
ރައީސް ވިދާޅުވީ މޫސާ އަލީ ޖަލީލު ހިޔާރު ކުރެއްވީ އަމާނާތްތެރި ބޭފުޅަކު ހޮއްވެވުމުގެ ބޭނުމުގައި ކަމަށެވެ. އަދި މޭޔަރުކަމަށް ވާދަކުރެއްވުމަސް ޖަލީލު އަރިިހުން އެދިވަޑައިގަތީ މާލެއަށް ކޮށްދޭން ޖެހޭ ކަންކަން ކޮށްދިނުން އަވަސްކޮށްދިނުމުގެ ބޭނުމުގައި ކަމަށް ރައީސް ވިދާޅުވި އެވެ. މާލޭގައި ފަށާފައިވާ މަސައްކަތްތައް އަވަސް ނިންމެވުމަށް އެހީވާނެ ބޭފުޅަކު ހޮއްވެވުމަށް އިސްކަން ދޭންޖެހޭ ކަމަށާއި އެބޭފުޅަކީ މޫސާ އަލީ ޖަލީލުކަމަށް ވިދާޅުވި އެވެ.
އެކަމަށް ފުރުސަތު ދެއްވުމަށް ބޭނުންފުޅުވީ ގައުމީވަންތަ އިހްލާސްތެރި އަދި އަމާނާތްތެރި ބޭފުޅަކަށް ކަމަށް ރައީސް ވިދާޅުވި އެވެ.
ކެމްޕެއިން ހަރަކާތުގައި ރައީސް ދެއްކެވި ވާހަކަފުޅުގައި ސަރުކާރަކީ ރައްޔިތުންގެ ބޭނުންތައް އަޑު އަހާނެ ސަރުކާރެއް ކަމަށް ވިދާޅުވި އެވެ. އަދި ރައްޔިތުންނާ ސަރުކާރާ ދެމެދަށް ވަންނާނެ ބަޔަކަށް ފުރުސަތު ނުދެއްވުމަށް ރައީސް ގޮވައިލެއްވި އެވެ. ސިޔާސީގޮތުން ޖަގަޑާ ހަދާނެ ބަޔަކަށް ވެސް ފުރުސަތު ނުދެއްވުމަށް ވެސް ރައީސް އެދިލެއްވި އެވެ.