ހުޅުމާލޭ ފޭސް 3 ހިއްކައި ނިންމައި ގިރާވަރު ފަޅު ހިއްކަން ފެށުމަށް ތައްޔާރު ވެއްޖެ އެވެ.
ހުޅުމާލެ ފޭސް 3 ހިއްކުމުގެ މަޝްރޫއުގެ ދަށުން 63 ހެކްޓަރުގެ ބިން ހިއްކާފައިވެ އެވެ.
ރޭ ކުރިއަށް ގެންދިޔަ ކެމްޕެއިން އިވެންޓެއްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ގިރާވަރު ހިއްކުމުގެ މަސައްކަތަށް ދެ ޑުރެޖަރު ވެސް މިހާރު އޮތީ ތައްޔާރަށް ކަމަށެވެ.
ހުޅުމާލެ ފޭސް 3 ހިއްކުމުގެ މަސައްކަތް ފަށާފައިވަނީ 2023 ވަނަ އަހަރުގެ ސެޕްޓެމްބަރ މަހުގެ 22 ވަނަ ދުވަހުއެވެ. އެކި ސަބަބުތަކާ ހެދި ބިން ހިއްކުން ލަސްވަމުން އައިސް މިފަހުން އަނެއްކާވެސް ފޭސް 3 ހިއްކަން ފަށާފައިވަނީ މިދިޔަ ނޮވެމްބަރ މަހުގެ 10 ވަނަ ދުވަހުއެވެ. އަދި ނޮވެމްބަރ މަހުގެ 28 ވަނަ ދުވަހު ވަނީ ބިން ހިއްކުމުގެ ސްޕީޑް އަވަސްކުރުމަށް އެއްފަހަރާ ދެ ޑްރެޖަރ ބޭނުންކުރަން ފަށާފައެވެ. ހުޅުމާލެ ފޭސް 3 ހިއްކުމުގެ މަސައްކަތް ކުރަމުން ދަނީ އެމްއޭސީއެލްގެ ދަށުން ހަދާފައިވާ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ) އިންނެވެ.
ހައުސިން މިނިސްޓަރު ޑރ އަބްދުﷲ މުއްޠަލިބް ވަނީ ހުޅުމާލެ ފޭސް 3ން ގޯތި ލިބުނު 698 މީހުންނާއެކު ރަޖިސްޓްރީ ހެދުމުގެ މަސައްކަތް ޖެނުއަރީ މަހު ފެށިގެން ކުރިޔަށްދާނެކަމަށް ވިދާޅުވެފަ އެވެ. އަދި އިންވަކި ކުރެވެމުންދާ މިންވަރަކުން ގޯތި ހަވާލު ކުރުމުގެ މަސައްކަތް ކުރަމުންދާނެ ކަމަށް ވިދާޅުވިއެވެ.