ކ. ގުރައިދޫގައި ހުންނަ ޚާއްޞަ އެހީއަށް ބޭނުންވާ މީހުންގެ މަރުކަޒުގައި، ހުނަރުވެރިކަމުގެ މަސައްކަތްތައް ދަސްކޮށްދޭ ތަމްރީން ޕްރޮގްރާމްތައް ހިންގުމަށް ނޭޝަނަލް މެންޓަލް ހެލްތު ޑިޕާޓްމަންޓާއި މޯލްޑިވްސް ޕޮލިޓެކްނިކްއާ ދެމެދު އެއްބަސްވުމެއްގައި ސޮއިކޮށްފިއެވެ.
މިހާރުވެސް 198 މީހުން ބަލަހައްޓަމުންދާ މި މަރުކަޒު ހިންގަމުން އަންނަނީ ޞިއްޙީ ވުޒާރާގެ ދަށުންނެވެ. އެގޮތުން، މި އެއްބަސްވުމުގައި އެ ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރ އާމިނަތު އިސްމާޢީލެވެ.
އަދި ޕޮލިޓެކްނިކްގެ ފަރާތުން ސޮއިކުރެއްވީ އެތަނުގެ ސީއީއޯ ޒޫޝާން ކަމާލުއްދީނެވެ.މި އެއްބަސްވުމުގެ ދަށުން، ޕޮލިޓެކްނިކްގެ ފަރާތުން، މި މަރުކަޒުގައި ހުނަރުވެރި މަސައްކަތްތައް ދަސްކޮށްދިނުމުގެ ތަފާތު ޕްރޮގްރާމްތައް ކުރިއަށްގެންދިއުމަށް ވަނީ ހަމަޖެހިފައެވެ.
އެގޮތުން، ކޭކު ކޯހާއި ގަސް ހެއްދުމުގެ ޕްރޮގްރާމާއި ކަރަންޓު މަސައްކަތްތަކާއި ފޮޓޯގްރަފީ ފަދަ ދާއިރާތަކުން 3 ހަފްތާގެ ކުރު ތަމްރީން ޕްރޮގްރާމްތައް ހިންގާނެއެވެ.
މި ޕްރޮގްރާމްތައް ހިންގާނީ، ފަރުވާގެ ޕްރޮގްރާމް ނިންމާފައިވާ މީހުންނާއި ފަރުވާގެ އެކި ޕްރޮގްރާމްތަކުގައި މިހާރުވެސް އުޅެމުންދާ މީހުންނަށެވެ. މީގެއިތުރުން، މި އެއްބަސްވުމުގެ ދަށުން ޕޮލިޓެކްނިކްގައި ނަފްސާނީ ދުޅަހެޔޮކަމާގުޅޭ ތަފާތު އެކި ޕްރޮގްރާމްތައް ހިންގުމަށްވެސް ވަނީ ހަމަޖެހިފައެވެ.