ބިދޭސީން މަސައްކަތްކުރާ ވޯކް ސައިޓުތަކުގެ ރަޖިސްޓްރީ އާކުރަން ހޯމްލޭންޑް ސެކިއުރިޓީ މިނިސްޓްރީން އަންގައިފިއެވެ.
ހޯމްލޭންޑް ސެކިއުރިޓީ މިނިސްޓްރީން ކުރި އިއުލާނެއްގައި ބުނީ ރާއްޖޭގައި ވަޒީފާ އަދާކުރާ ބިދޭސީންނަށް ބޭނުންވާ ހުއްދަ އާކުރުމާއި އެ ބިދޭސީންގެ ކަންކަން ބެލެހެއްޓުމުގެ ހަރުދަނާ ނިޒާމެއް ގާއިމުކުރުމަށް އެ މިނިސްޓްރީން މަސައްކަތްތައް ކުރިއަށްގެންދާ ކަމަށެވެ.
އެގޮތުން ރާއްޖޭގައި ވަޒީފާ އަދާކުރުމަށް ބިދޭސީން ގެނައުމަށް ޕްރޮޖެކްޓު އުސޫލުން ރަޖިސްޓަރީކޮށްފައިވާ ވޯކް ސައިޓުތަކުގެ ތެރެއިން، ޕްރޮޖެކްޓުގެ މުއްދަތު ހަމަވެފައިވާ ކަމަށް އެކްސްޕެކްޓް ސިސްޓަމުގެ ރެކޯޑުތަކުން ދައްކާ ވޯކްސައިޓުތައް މިއަދުން ފެށިގެން "ޕެންޑިން ސައިޓް ކްލިއަރެންސް"އަށް ބަދަލުކުރެވޭނެ ކަމަށެވެ.
އަދި ރަޖިސްޓްރީ ކޮށްފައިވާ ވޯކް ސައިޓުތަކުގެ ތެރެއިން ކޯޓާއެއް ނުނަގާ އެއް އަހަރުދުވަހަށް ވުރެ އިތުރުވެފައިވާ ވޯކް ސައިޓުތައް އަންނަ އާދިއްތަ ދުވަހުން ފެށިގެން "އިން-އެކްޓިވޭޓް" ސްޓޭޓަސްއަށް އެސްޕެކްޓް ސިސްޓަމް މެދުވެރިކޮށް ބަދަލުކުރެވޭނެ ކަމަށް މިނިސްޓްރީގެ އިއުލާނުގައިވެއެވެ.
އެހެންކަމުން، އެ މިނިސްޓްރީން ދީފައިވާ މުއްދަތު ހަމަވެފައިވާ ވޯކް ސައިޓުތައް އަލުން އެކްޓިވޭޓް ކުރުމަށް މުއްދަތު ހަމަވެފައިވާ ލިޔެކިޔުންތައް ހަމަކުރުމަށްފަހު، އެސްޕެކްޓް ސިސްޓަމް މެދިވެރިކޮށް ވޯކް ސައިޓުގެ ޑޮކިއުމެންޓު އަޕްޑޭޓް ކުރުމަށް ވަޒީފާދޭ ފަރާތްތަކަށް އެ މިނިސްޓްރީން ވަނީ އިލްތިމާސްކޮށްފައެވެ.
ރާއްޖޭގައި މަސައްކަތް ކުރާ ބިދޭސީންނަކީ ގަވައިދާ އެއްގޮތަށް މަސައްކަތްކުރާ ފަރާތްތަކަށް ހެދުމަށް ހޯމްލޭންޑް ސެކިއުރިޓީ މިނިސްޓްރީއާއި އިމިގްރޭޝަނާއި އަދި ފުލުހުން ގުޅިގެން ބިދޭސީންގެ ލިޔެކިޔުންތައް ހަމަތޯ ބަލަން ސިލްސިލާ އޮޕަރޭޝަންތައް ހިންގައި، ގަވާއިދާ ހިލާފަށް އުޅޭ ބިދޭސީން ގަވާއިދުގެ ތެރެއަށް ވައްދަން ތިން މަހުގެ މުހުލަތެއް ވަނީ ދީފައެވެ.