އިދިކޮޅު ކައުންސިލުން ތިބި ރަށްރަށުގައި އެތައް މަޝްރޫއެއް އޮތީ ހުއްޓުވާފައިކަމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެއެވެ.
ކައުންސިލް އިންތިހާބުގެ ކެމްޕެއިންއަށް ޕީއެންސީން ވިލިމާލޭގައި ބޭއްވި ޖަލްސާގައި ފަލާހު ވިދާޅުވީ ޕީއެންސީއަކީ މިހާރު މި ރާއްޖޭގައި އޮތް އެންމެ ޒުވާން އަދި އެންމެ ގިނަ އަދެއްގެ މެމްބަރުން ތިބި ސިޔާސީ ޕާޓީ ކަމަށެވެ.
ފަލާޙު ވިދާޅުވީ ވަރަށް ގިނަ ޕާޓީތަކުން ވާދަކުރާނެ މީހުން ނުވެގެން އުޅޭ ކަމަށެވެ. އެގޮތުން ބައެއް ޕާޓީތަކުން ދޭ ޓިކެޓުގައިވެސް އަތްލާނެ ބަޔަކު ނުވެގެން އުޅޭއިރު ޕީއެންސީން ޕްރައިމަރީއަށް އިއުލާނު ކުރީމާ 1800 ކެންޑިޑޭޓުން ކުރިމަތިލިކަމަށް ފަލާހު ވިދާޅުވިއެވެ.
ފަލާހު ވިދާޅުވީ އެކިއެކި ދާއިރާތަކަށް މިފަހަރު އިންތިހާބުގައި ވާދަވެސް ކުރެވެނީ 1360 މީހުންނަށް ކަމަށެވެ. އެކަމުންވެސް އެނގިގެންދަނީ ވަރަށް ގިނަ ބޭފުޅުންގެ ޝައުގުވެރިކަން ޕީއެންސީއަށް އޮތްކަން ކަމަށް ފަލާހު ވިދާޅުވިއެވެ.
އިދިކޮޅު ކައުންސިލަރުން ތިބޭ ރަށްރަށުގައި ފައްޓާފައި ހުރި މަޝްރޫއުތައް ކުރިއަށް ނުގެންދެވެނީ އެ މަޝްރޫއު ހިންގަން ބޭނުންވާ ބިން ނުދީ ސަރުކާރަށް ޖެއްސުން ކުރުމަށް އުޅޭތީކަމަށެވެ. މިފަދަ ކަންކަން ނުކުރާނެ ބަޔަކީ ޕީއެންސީގެ ކެންޑިޑޭޓުން ކަމަށާއި ސަރުކާރާ ގުޅިގެން ރައްޔިތުން ބޭނުންވާ ތަރައްގީ ގެނެސްދޭނީ ވެސް ހަމަ އެ ޕާޓީގެ ކެންޑިޑޭޓުންކަމަށް ފަލާހު ވިދާޅުވިއެވެ.