"ބޯހިވާހިކަން އެންމެންނަށް" ޕްރޮގްރާމުގެ ދަށުން ދޫކުރާ ބިމާއި ފުލެޓަށް އެދި ހުށަހަޅާ ފަރާތްތަކުގެ ހާލަތު ބެލުމަށް އެފަރާތްތައް ދިރިއުޅެމުންދާ ތަންތަނަށް ނުދާނެ ކަމަށް ހައުސިން މިނިސްޓަރު ޑރ. އަބްދުލް މުއްތަލިބް ވިދާޅުވެއްޖެއެވެ.
ޕީއެސްއެމްގެ "ރާއްޖެ މިއަދު" ޕްރޮގްރާމްގައި ރޭ ވާހަކަ ދައްކަވަމުން މިނިސްޓަރު ވިދާޅުވީ މި ޕްރޮގްރާމްގައި ޝަރުތު ހަމަވާ ފަރާތްތައް ބަލާނީ ދުނިޔޭގެ އެހެން ގައުމުތަކުގައިވެސް އެކަން ކުރާ ގޮތަށް އާމްދަނީއަށް ބަލައިގެން ކަމަށެވެ.
ފްލެޓު ނުވަތަ ގޯއްޗަށް ކުރިމަތިލާ މީހާ ދިރިއުޅޭ ހާލަތާއި އެމީހާ ގޭގައި ހުންނަނީ ކިތައް ފާހަނަތޯ، ކިތައް ކޮޓަރިތޯ، ދިރިއުޅެނީ ކިތައް މީހުންތޯ އެފާހަނައަށް ވަދެ ނުކުންނަނީ އެ މައުލޫމާތަކީ ދައުލަތަށް ވެރިފައި ކުރެވޭނެ މައުލޫމާތުކަމަކަށް ގަބޫލު ނުކުރައްވާކަމަށް މިނިސްޓަރު ވިދާޅުވިއެވެ.
އެންމެ އިންސާފުވެރިކަމާއެކު ހައްގުވެރިންނަށް ބޯހިޔާވަހިކަން ހޯދައިދެވޭނެ ގޮތަކީ އެފަރާތްތަކަށް ލިބޭ އާމްދަނީ އާއި މުދާވެރިކަމާއި ބެލުމުގެ ދަށުގައި ތިބި މީހުންގެ މައުލޫމާތަށް ބަލައިގެން ކަމަށެވެ. އަދި އެއީ ވެރިފައި ކުރެވޭނެ މައުލޫމާތު ކަމަށްވެސް މިނިސްޓަރު ވިދާޅުވިއެވެ.
އެހެން ނަމަވެސް ސަރުކާރުން ހާލަތު ބަލާފައި އެސެސްމެންޓް ހަދާފައި ދޭންޖެހޭ ފަދަ އާއިލާއެއް ހުރެއްޖެނަމަ އެކަމަށް އެޓެންޑްކުރެވޭނެ އުސޫލެއް ކެބިނެޓުން ފާސްކޮށްފައިވާ ކަމަށް މިނިސްޓަރ ވިދާޅުވިއެވެ. ސޯޝަލް މިނިސްޓްރީއަށް ފާހަގަކުރެވޭ އެފަދަ ފަރާތްތަކަށް ބޯހިޔާވަހިކަން ފޯރުކޮށްދޭނެ ކަމަށާއި އެއީ ސަރުކާރުގެ ޒިންމާއެއް ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވަނީ ދޮގު މައުލޫމާތާއި ލިޔުން ހުށަހަޅައިގެން ބޯހިޔާވަހިކަން ނުހޯދުމަށް އިލްތިމާސް ކުރައްވައިފައެވެ. އެއީ އެކަމުގެ ސަބަބުން ބޯހިޔާވަހިކަން އެންމެ ހައްގުވާ ފަރާތްތަކުގެ ހައްގުތަކަށް އަރައިގަނެވޭނެތީ ކަމަށެވެ.
މިނިސްޓަރު ވަނީ ފޯމް ހުށަހަޅާއިރު ސައްހަ މައުލޫމާތު ހިމަނައިގެން އަދި އެކަމަށް ބޭނުންވާ ވަގުތު ނަގައިގެން އެންމެ ފުރިހަމައަށް އެކަން ކުރުމަށް ތަކުރާރުކޮށް އިލްތިމާސް ކުރައްވައިފައެވެ. ލިޔުންތައް ހަމަކޮށްގެން ފޯމް ފުުރުމަކީ ފޯމް ފުރާ ފަރާތުގެ ޒިންމާއެއް ކަމަށެވެ.