ދިވެހިރާއްޖޭގެ ދެމެހެއްޓެނިވި ތަރައްޤީއަށް މަސައްކަތް ކުރުމަށާއި މޫސުމީ ބަދަލުތަކަށް ތައްޔާރުވުން ހަރުދަނާކުރުމުގެ މަޤްޞަދުގައި، އޯޕެކް ފަންޑް ފޯ އިންޓަރނޭޝަނަލް ޑިވެލޮޕްމަންޓް (އޯޕެކް ފަންޑް) އާއެކު ދިވެހި ސަރުކާރުން އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރެއްވީ އޮސްޓްރިއާގެ ވިއޭނާގައި ހުންނަ އޯޕެކް ފަންޑުގެ މައި މަރުކަޒަށް މިހާރު ރަސްމީ ދަތުރުފުޅެއް ކުރައްވަމުން ގެންދަވާ ރާއްޖޭގެ ފިނޭންސް މިނިސްޓަރު މޫސާ ޒަމީރެވެ.
މި "ކަންޓްރީ ޕާޓްނަރޝިޕް ފްރޭމްވޯކް" އަކީ އޯޕެކް ފަންޑުން ރާއްޖެއަށް ފޯރުކޮށްދޭ މާލީ އަދި ފަންނީ އެހީތެރިކަން، ރާއްޖޭގެ ޤައުމީ ތަރައްޤީގެ ސިޔާސަތުތަކާ އެއްގޮތްވާ ގޮތުގެ މަތިން ބައްޓަންކުރުމަށް އެކުލަވައިލެވުނު އޮނިގަނޑެކެވެ. މީގެ މައިގަނޑު ބޭނުމަކީ އަތޮޅުތަކުގެ އުމްރާނީ ތަރައްޤީ ފުޅާކޮށް، ސަރަޙައްދީ ތަރައްޤީގެ ހަމަހަމަކަން ޤާއިމުކުރުމާއެކު، އިޤްތިޞާދީ ދިގު މުއްދަތުގެ ކުރިއެރުން ކަށަވަރުކުރުން ކަމަށް މިނިސްޓްރީން މަޢުލޫމާތުދެއެވެ.
މި އެއްބަސްވުމުގެ ދަށުން މޫސުމީ ބަދަލުތަކުން އަރައިގަތުމަށް ކުރެވޭ މަސައްކަތްތަކާއި، އިއާދަކުރަނިވި ހަކަތައާއި، ރަށްރަށުގެ އުމްރާނީ ތަރައްޤީގެ އިތުރުން މާލީ ދާއިރާގެ ހަމަޖެހުމަށް ޚާއްޞަ އިސްކަމެއް ދިނުމަށް ވަނީ ހަމަޖެހިފައެވެ. އެއްބަސްވުމުގައި ސޮއިކުރެއްވުމަށްފަހު މިނިސްޓަރު މޫސާ ޒަމީރު ވިދާޅުވީ، މިއީ އޯޕެކް ފަންޑާއި ރާއްޖެއާ ދެމެދު އޮތް ޒަމާންވީ ގުޅުން އިތުރަށް ހަރުދަނާވެގެންދިޔަ މުހިންމު ފިޔަވަޅެއް ކަމަށެވެ.އަދި މި އައު ފްރޭމްވޯކްގެ ސަބަބުން މޫސުމީ ބަދަލުތަކަށް ތައްޔާރުވެފައިވާ، ދެމެހެއްޓެނިވި އުމްރާނީ ވަސީލަތްތަކެއް ގާއިމުކުރުމަށް ސަރުކާރުން ކުރާ މަސައްކަތްތަކަށް ބޮޑު އެހީތެރިކަމެއް ލިބިގެންދާނެކަން އޭނާ ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވީ، ރާއްޖެ ފަދަ ތަރައްޤީވަމުންދާ ކުދި ޖަޒީރާ ޤައުމަކަށް މޫސުމީ ބަދަލުތަކާއި ބޭރުގެ ގޮންޖެހުންތަކާ ކުރިމަތިލާއިރު، ބަނދަރުތަކާއި، ފެނާއި ނަރުދަމާގެ އިތުރުން އިއާދަކުރަނިވި ހަކަތަ ފަދަ މަޝްރޫޢުތަކަށް ބޭނުންވާ ދިގު މުއްދަތުގެ ލުއި ލޯނު ހޯދުމަށް މިފަދަ ގުޅުންތަކަކީ ކޮންމެހެން ބޭނުންތެރި ކަމެއް ކަމަށެވެ.
1977 ވަނަ އަހަރުން ފެށިގެން އޯޕެކް ފަންޑަކީ ރާއްޖޭގެ ތަރައްޤީގެ އިތުބާރު ހުރި ބައިވެރިއެއްކަން ފާހަގަކުރައްވައި، އެ ފަންޑުން ވޭތުވެދިޔަ ތަނުގައި ދެއްވާފައިވާ އެހީތަކަށް ވަޒީރު ޝުކުރު އަދާކުރެއްވިއެވެ. ޚާއްޞަކޮށް ޞިއްޙަތު، ތަޢުލީމު އަދި މަސްވެރިކަމުގެ ދާއިރާއިން ފޯރުކޮށްދީފައިވާ އެހީތެރިކަން މިނިސްޓަރު ޒަމީރު ފާހަގަކުރެއްވިއެވެ.