މޯލްޑިވްސް އިންޓަރގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން ލިމިޓެޑް (އެމްއައިޓީޑީސީ) އުވާލުމުގެ މަސައްކަތައް، ކޮށްދޭނެ ބަޔަކު ހޯދުމަށް އިއުލާންކޮށްފިއެވެ.
މިނިސްޓްރީ އޮފް ފިނޭންސް އެންޑް ޕްލޭނިންގ އިން މިކަމާއި ގުޅިގެން ކޮށްފައިވާއިއުލާނުގައިބުނެފައިވަނީ އިޢުލާނާއެކު އާންމުކޮށްފައިވާ ރިކުއެސްޓް ފޮރ ޕްރޮޕޯސަލް (އާރު.އެފް.ޕީ) އާއި އެއްގޮތަށް ޕްރޮޕޯސަލް ހުށަހެޅުމަށް އެދޭކަމަށެވެ.
އަންދާސީ ހިސާބު ހުށަހެޅުން އޮންނާނީ 29 ޖަނަވަރީ ވާ ބުރާސްފަތި ދުވަހުގެ 13:30 ގައިކަމަށް ފިނޭންސް މިނިސްޓްރީން ބުނެއެވެ. އަންދާސީ ހިސާބު ހުށަހަޅާ ދުވަހުގެ 13:30ގެ ފަހުން ހުށަހަޅާ އަންދާސީ ހިސާބާއި މަޢުލޫމާތު ފުރިހަމަނުވާ އަންދާސީ ހިސާބު ބާޠިލުކުރެވޭނެ ކަމަށްވެސް އެމިނިސްޓްރީން ބުނެއެވެ.
މެދުފަންތީގެ ފަތުރުވެރިކަން ޕްރޮމޯޓުކޮށް ކުރިއަރުވަން އެމްއައިޓީޑީސީ އުފެއްދެވީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަމުގައެވެ.
އެ ކުންފުނީގެ މަސައްކަތްތައް އެމްއެފްއެމްސީގެ ދަށަށް ބަދަލުކޮށް، ވަޒީރުންގެ މަޖިލީހުން އެމްއައިޓީޑީސީ އުވާލަން ނިންމީ، 2024 ވަނަ އަހަރުގެ ސެޕްޓެންބަރު 1ގައެވެ. އެއީ، މާލީ ހާލަތު ރަނގަޅުކުރަން ސަރުކާރުން ކުރަމުން އަންނަ މަސައްކަތްތަކުގެ ތެރެއިން ޚަރަދު ކުޑަކުރުމުގެ ގޮތުން ބައެއް ކުންފުނިތަކަށް ގެނައި ބަދަލުގެ ތެރެއިންނެވެ.