ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ހަމަނުޖެހުން ހިންގުމުގެ ތުހުމަތުގައި ސްރީލަންކާއަށް ނިސްބަތްވާ ދެ މީހުން ހައްޔަރުކޮށް، ކްރިމިނަލް ކޯޓުން އެމީހުންގެ ބަންދަށް 15 ދުވަސް ޖަހައިފިއެވެ.
މި ހާދިސާ ހިނގީ މި މަހުގެ ނުވަވަނަ ދުވަހުގެ ރޭ 12:15 އެހާކަންހާއިރުއެވެ. އެ ދުވަހު ފުލުހުން ބުނީ، ހަމަނުޖެހުން ހިންގި ކަމަށް ތުހުމަތުކުރެވޭ މީހުން ހާޒިރުކޮށް، މައުލޫމާތު ސާފުކޮށް، ނަސޭހަތްދީފައިވާ ކަމަށެވެ.
އޭގެ ފަހުން އެ މީހުން ކޯޓު އަމުރެއްގެ ދަށުން ހައްޔަރުކުރީ އާދިއްތަ ދުވަހެވެ. އެއީ، ސްރީލަންކާއަށް ނިސްބަތްވާ 46 އަހަރުގެ މީހަކާއި 43 އަހަރުގެ މީހެކެވެ.
އެ މީހުންގެ ބަންދާ މެދު ގޮތެއް ނިންމަން ކްރިމިނަލް ކޯޓަށް އިއްޔެ ހާޒިރުކުރުމުން ދެ މީހުން ވެސް 15 ދުވަހަށް ބަންދުކުރުމަށް ކޯޓުން ވަނީ އަމުރުކޮށްފައެވެ.