މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ރާއްޖެ ގެނައި އެމްބިޔުލާންސްތައް ރަށްތަކަށް ފޯރުކޮށްދިނުމުގެ މަސައްކަތް އެ ކުންފުނިން ފަށައިފި އެވެ.
އެ ކުންފުނިން ވަނީ އެމްބިޔުލާންސްތައް ރަށްތަކަށް ފޮނުވުމަށް އުޅަނދުތަކަށް އަރުވާތަން ދައްކުވާ ފޮޓޯތައް ހިއްސާ ކޮށްފަ އެވެ.
2025 ވަނަ އަހަރު ކޮންޓުރެކްޓަރ ފައިނޭންސް އުސޫލުގެ ތެރެއިން މިނިސްޓްރީ އޮފް ހެލްތުއިން އެމްޕީއެލްއާ ހަވާލުކުރި މަސައްކަތުގެ ތެރެއިން ޖުމްލަ 56 އެމްބިއުލަންސް ވަނީ ރާއްޖެ ގެނެސްފައެވެ.
ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވީ އެމްޕީއެލްއާއި އެކުވެފައިވާ އެއްބަސްވުމުގެ ދަށުން އެ އެމްބިއުލާންސްތައް މެއިންޓެނެންސްކުރުމުގެ އެންމެހާ މަސަައްކަތްވެސް އެމްޕީއެލްއިން ކުރާގޮތަށް ހަމަޖެހިފައިވާކަމަށެވެ. 56 އެމްބިއުލާންސް ގެނައުމުގެ މަސައްކަތަކީ ކޮންޓްރެކްޓަރ ފައިނޭންސް އުސޫލުގެ ތެރެއިން މިދިޔަ އަހަރު ހަވާލު ކުރެވުނު މަސައްކަތެކެވެ.
މި މަޝްރޫޢަށް 65.3 މިލިޔަން ރުފިޔާ ވަނީ ޚަރަދުކޮށްފައެވެ. 3 ބުރަކަށް ބަހާލައިގެން އެމްޕީއެލްއިން ވަނީ މިހިނގާ ޖަނަވަރީ މަހުގެ ތެރޭގައި ހުރިހާ އެމްބިއުލާންސްތަކެއް ރާއްޖެއަށް ގެނެސްފައެވެ.
މި އެމްބިއުލާންސްތަކުގެ އިތުރުން، މިއަހަރުގެ ތެރޭގައި އިތުރު 31 ރަށަކަށް ބޭނުންވާ އައު އެމްބިއުލާންސްތަކަކާއި، ގްރޭޓަރ މާލޭ ސަރަހައްދާއި ސިޓީތަކުގައި ޕެރަމެޑިކް ޚިދުމަތް ދިނުމަށް އެތަންތަނަށް ބޭނުންވާ 10 ޕެރަމެޑިކް އެމްބިއުލާންސް ގެނެވި އެ ޚިދުމަތްވެސް ފެށިގެންދާނެ ސިއްޙީ ވުޒާރާއިން ވިދާޅުވެއެވެ.