ރާއްޖެއިން ބޭރުގައި ކިޔަވަމުންދާ ދަރިވަރުންނަށް ދޭ ސްޓައިޕެންޓުގެ ރޭޓޫ 7 އަހަރު ފަހުން މުރާޖާ ކުރުމުގެ މަސައްކަތް ކުރަމުންދާ ކަމަށް މަތީ ތައުލީމާ ބެހޭ ވަޒީރު ޑރ. އަލީ ހައިދަރު އަހުމަދު ވިދާޅުވެއްޖެ އެވެ.
"ތަރުޖަމާނާއެކު" ޕޮޑްކާސްޓުގައި ވާހަކަ ދައްކަވަމުން ހައިދަރު ވިދާޅުވީ ސްޓައިޕެންޑު ލިބުމުގައި ދިމާވާ ދަތިތައް މަދުކުރުމުށާއި ދަރިވަރުންނަށް ފައިސާ ދޭންޖެހޭ މުއްދަތުގައި ފައިސާ ދިނުމަށް މަސައްކަތް ކުރަމުންދާ ކަމަށެވެ.
އެގޮތުން ދަރިވަރުންނަށް ފައިސާ ދޭންޖެހޭ މުއްދަތުގެ ދެ މަސް ކުރިން އެ މަސައްކަތް މިނިސްޓްރީން ފަށާ ކަމަށް ހައިދަރު ވިދާޅުވި އެވެ.
ހައިދަރު އިތުރަށް ވިދާޅުވީ މިހާރު ދޫކުރާ އަދަދުގައި ދަރިވަރުންނަށް ސްޓައިޕެންޑު ދޭތާ މިހާރު 7 ވަރަކަށް އަހަރު ވެއްޖެ ކަމަށެވެ.
ދިރިއުޅުމުގެ ހަރަދުތަކަށް ކޮންމެ ގައުމެއްގައި ވެސް ބަދަލު އާދޭ، އެހެންވީމާ ސްޓައިޕެންޑް މުރާޖައާ ކުރުމުގެ މަރުހަލާ މި އަހަރު ތެރޭ ފަށައިފިން،
ސްޓައިޕެންޑު މުރާޖާ ކުރުމުން އެ ގައުމެއްގައި ހަރަދުކުރެވޭނެ މިންވަރަށް ފައިސާ ދެވޭނެ މިނިސްޓަރު ވިދާޅުވި އެވެ.
ސްޓައިޕެންޑު ލިބުމުގައި ބޮޑަށް މައްސަލަ ދިމާވާކަން ފާހަގަކުރެވެނީ ލޯނުގެ ދަށުން ކިޔަވަން ގޮސްތިބޭ ދަރިވަރުންކަން މިނިސްޓަރު ފާހަގަކުރެއްވި އެވެ. ލޯނުގެ ދަށުން ދަރިވަރުން ކިޔަވަން ދާން ޖެހޭނީ ވަކި ގައުމުތަކަކަށް ވާއިރު ދަރިވަރުންގެ އަމިއްލަ އިހުތިޔާރުގައި އެހެން ގައުމުތަކަށް ދިޔުމުން ސަރުކާރުން ދޭ ސްޓައިޕެންޑް އިން އަމިއްލަ އިހުތިޔާރުގައި ދާ ގައުމުގައި ނުފުދޭ މައްސަލަ ދިމާވާ ކަމަށް މިނިސްޓަރު ވިދާޅުވި އެވެ.