ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި އަތޮޅު ތެރޭގައި ޤާއިމުކުރާ ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުން ތަމްރީނު ކުރުމުގެ ޕްރޮގްރާމް އިލެކްޝަންސް ކޮމިޝަން (އީސީ) އިން ފަށައިފިއެވެ.
މި އިންތިޚާބުގެ މަސައްކަތްތަކަށް ޖުމްލަ 7000 އޮފިޝަލުން ބޭނުންވާއިރު، މި ފަރާތްތައް ތަމްރީނު ކުރުމުގެ މަސައްކަތުގައި ޖުމްލަ 95 ޓްރެއިނަރުން މާލެއާއި އަތޮޅު ތެރޭގައި ހަރަކާތްތެރިވާނެއެވެ. އަތޮޅު ތެރޭގެ ތަމްރީނުތައް ފަށާފައިވާއިރު، މާލެ ސަރަޙައްދުގައި މަސައްކަތް ކުރާނެ އޮފިޝަލުން ތަމްރީނު ކުރުމުގެ ޕްރޮގްރާމްތައް މިމަހުގެ 15 ވަނަ ދުވަހު ފެށުމަށް ވަނީ ތާވަލުކޮށްފައެވެ.
އީސީއިން ބުނިގޮތުގައި މި ތަމްރީނުތަކުގައި ވޯޓުލާ ދުވަހު މަރުކަޒުތަކުގައި ކަންކަން ކުރިއަށް ގެންދަންވީ ގޮތާއި، ވޯޓުލާން އަންނަ މީހުންނަށް މަޢުލޫމާތު ދޭނެ ގޮތުގެ އިތުރުން ވޯޓުލާ ނިމުމުން އަމަލުކުރަންވީ ގޮތުގެ ތަމްރީންތައް ދިނުމަށް ވަނީ ހަމަޖެހިފައެވެ. މީގެ އިތުރުން ވޯޓު ގުނުމުގެ ތަފްސީލީ މަޢުލޫމާތު އޮފިޝަލުންނަށް ފޯރުކޮށްދިނުމުގެ އިތުރުން، ތަމްރީންތަކުގެ ތެރޭގައި އަމަލީގޮތުން މި މަސައްކަތްތައް ކުރިއަށް ގެންދާނެއެވެ.
މި އިންތިޚާބުގައި ހަރަކާތްތެރިވާ އޮފިޝަލުން ތަމްރީނު ކުރުމަށްޓަކައި ޓްރެއިނަރުން ތަމްރީން ކުރުމުގެ ޕްރޮގްރާމެއް މިމަހުގެ ތިން ވަނަ ދުވަހުން ފެށިގެން ނުވަ ވަނަ ދުވަހާއި ހަމައަށް ސީއެޗްއެސްސީގައި ވަނީ ކުރިއަށް ގެންގޮސްފައެވެ.އެ ޕްރޮގްރާމުގައި 100 އަށްވުރެ ގިނަ ޓްރެއިނަރުން ތަމްރީނު ކޮށްފައިވެއެވެ. މި ޓްރެއިނަރުންނަކީ ރާއްޖެއާއި ރާއްޖެއިން ބޭރުގައި ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުންނަށް ބޭނުންވާ ތަމްރީނުތައް ދިނުމުގައި އިސްކޮށް ހަރަކާތްތެރިވާނެ ފަރާތްތައް ކަމަށް އިލެކްޝަންސް ކޮމިޝަނުން ބުނެފައިވެއެވެ.