ސަރުކާރުގެ އެކިއެކި ކުންފުނިތަކާއި މިނިސްޓްރީތަކަށް މަސައްކަތްކުުރުމުން ލިބެންޖެހޭ ފައިސާ ނުލިބި ތިބި ވިޔަފާރިވެރިންނަށް ރައީސް ރޭ އިތުރު ތާރީޚެއް ދެއްވައިފިއެވެ.
އަމިއްލަ ވިޔަފާރިތަކަށް ސަރުކާރުން ދައްކަންޖެހޭ އެތައް ބިލިއަން ރުފިޔާއެއް އޮތްއިރު ކުދި އަދި މެދު ފަންތީގެ ވިޔަފާރިވެރިންނާއެކު ރައީސް ކުރިޔަށްގެންދެވި ބައްދަލުކުރެއްވުމުގައިވެސް އެކަން ވިޔަފާރިވެރިން ވަނީ ފާހަގަކޮށްފައެވެ. އެގޮތުން، އެތައް މިލިއަން ރުފިޔާއެއް ނުލިބި، ދެ އަހަރަށްވުރެ ގިނަ ދުވަސްވެފައި ތިބި ކުންފުނިތަކުން އެކަންބޮޑުވުން ފާޅުކޮށް ބިދޭސީންގެ އަތްމައްޗަށް ވިޔަފާރިތައްދާ އެއް ސަބަބަކީ އެއީކަންވެސް ފާހަގަކޮށްފައިވެއެވެ.
އެ ވިޔަފާރިވެރިންވަނީ ފައިސާ ނުދެއްކޭ ނަމަ ޓެކުހާ ލާޖައްސައިގެން އެކަން ކުރަން އެދިފައެވެ.
ޓެކުހާ ލާޖައްސައިގެން އެމަސައްކަތް މިހާރުވެސް ކޮންމެސް ގޮތަކަށް ކުރެވެމުންދާކަމަށާއި ނަމަވެސް އެއަށްވުރެ އެކަން ފުޅާކޮށް ކުރެވޭނެ ގޮތަކީ ކޮބައިތޯ ބައްލަވާނެކަމަށް ރައީސް ވިދާޅުވިއެވެ.
ފައިސާ ދެއްކުމުގައި ލަސްތަކެއް އުޅޭކަން ފާހަގަކުރައްވާ ރައީސް ވިދާޅުވީ މިއަހަރު ނިމުމުގެ ކުރިން ވީހާވެސް ގިނަ ބިލުތަކެއްގެ ފައިސާ ދެއްކުމަށްކަމަށެވެ.
މީގެކުރިން ރައީސް ވަނީ މިދިޔަ ރޯދަމަހުގެ ކުރިން ވެސް އެ ބިލުތައް ދައްކާ ނިންމަން ވައުދުވެވަޑައިގަންނަވާފައެވެ. އޭގެފަހުން މިއަހަރުގެ އޮކްޓޯބަރ މަހުގެ 21 ވަނަ ދުވަހުގެ ރޭ ލ. އަތޮޅަށް ކުރެއްވި ދަތުރުފުޅުގައި ފޮނަދޫގެ ރައްޔިތުންނާއެކު ބޭއްވެވި ބައްދަލުކުރެއްވުމުގައި ރައީސް ވިދާޅުވީ އަމިއްލަ ކުންފުނިތަކަށް ސަރުކާރުގެ އެކި ކުންފުނިތަކާއި ވުޒާރާތަކުން ދައްކަންޖެހި، ނުދައްކާ ހުރި ހުރިހާ ފައިސާއެއް އެދުވަހުން ފެށިގެން ކުރިއަށްއޮތް ދެ ހަފްތާއެއްހާ ދުވަސް ތެރޭ ދައްކައި ނިންމާނެ ކަމަށާއި އެކަން ކުރާނީ ފައިސާ ޗާޕު ނުކޮށް ކަމަށެވެ.
އެމަހުގެ ކުރީކޮޅު އެމްޑީޕީން "ލޫޓުވައިފި" ނަމުގައި ބޮޑު އެއްވުމެއް ބޭއްވުމަށް ތައްޔާރުވަމުން ދަނިކޮށް ރައީސް ވަނީ ފަސް ހަފްތާތެރޭގައި ފައިސާ ދައްކާ ނިންމަވާނެކަމަށް ވިދާޅުވެފައެވެ. އަދި އެކަމަށް އިޝާރާތްކުރައްވާ ރައީސް ފޮނަދޫގައި ބޭއްވި ޖަލްސާގައިވަނީ އެދުވަހު އިއުލާނުކުރެއްވި ގޮތަށް އެފައިސާ ހަމަޖެހޭނެކަމަށެވެ.
އެ ދުވަސްވަރު ސަރުކާރުން ވަނީ ޕެންޝަން ބޯޑު މެދުވެރިކޮށް މަރުކަޒީ ބޭންކް އެމްއެމްއޭއަށް ފައިނޭންޝަލް ޓޫލްއެއް ވިއްކައިގެން ފައިސާ ހޯދަން މަސައްކަތްކޮށްފައެވެ. އެއީ ފައިސާ ޗާޕުކުރުންކަމަށް ގިނަ ބަޔެއްގެ ފާޑުކިޔުންތައްވެސް ސަރުކާރަށް ވަނީ އަމާޒުވެފައެވެ.
އަނެއްކޮޅުން ސަރުކާރުން ނުދައްކާ ހުރި ބިލުތަކުގެ ޖުމުލަ އަދަދާއި ތަފުސީލުތައް ހާމަކުރަން ސަރުކާރުން ވަނީ ދެކޮޅު ހަދާފައެވެ. އެހެންކަމުން ސަރުކާރުން ސީދާ ދައްކަން އޮތް ފައިސާގެ އަދަދެއް ނޭންގެއެވެ.