ހުޅުމާލެ ފޭސް 2 އިން ގެއްލިގެން ހޯދަމުންދިޔަ އުމުރުން 14 އަހަރުގެ ކުއްޖާ މިރޭ އަމިއްލައަށް ގެއަށް އައިސްފައިވާކަމަށް ފުލުހުން ބުނެފިއެވެ.

ފުލުހުން ބުނީ ރ. ދުވާފަރު / ސިކްސް ސެންސް، ޝިބާ ރަޝީދު މިތޭގެ ވަގުތެއްގައި އަމިއްލައަށް ގެއަށް އައިސްފައިވާކަމުގެ މައުލޫމާތު ލިބިފައިވާކަމަށެވެ. ކުއްޖާގެ ހާލު ރަނގަޅުކަމަށް ފުލުހުން ބުނެއެވެ. އިތުރު މައުލޫމާތެއް ހާމައެއްނުކުރެއެވެ.

ކުއްޖާ ގެއްލިގެން ހޯދަމުންދާކަން ހާމަކޮށް ފުލުހުން މިއަދު ބުނީ ނޮވެމްބަރު 28 ވަނަ ދުވަހުގެ 05:55 އެހާކަންހާއިރު ޝިބާ ގެއިން ނުކުމެގެން ދިޔަގޮތަށް ވީނުވީއެއް ނޭނގި ގެއްލިފައިވާކަމަށް އާއިލާގެ ފަރާތުން ރިޕޯޓްކޮށްފައިވާ ކަމަށެވެ. އަދި މިކަމުގެ މައުލޫމާތު ފުލުހުންނަށް ލިބުމާއެކު ކަމާގުޅުންހުރި އިދާރާތަކަށް އެކަމުގެ މައުލޫމާތު ހިއްސާކުރެވި ކުއްޖާ ހޯދުމުގެ މަސައްކަތް ފަށާފައިވާ ކަމަށް ފުލުހުން އޭރު ބުނެފައިވެއެވެ.