މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އަށް މިދިޔަ އަހަރު މާލީ ބޮޑު ގެއްލުމަކާ ކުރިމަތިވީ ބޭނުންވާ ވަރަށް މަސް ނުލިބުމުން ކަމަށް އެ ކުންފުނިން ބުނެފި އެވެ.
މިފްކޯއިން މިހެން ބުނީ މިއަދު ބޭއްވި އެ ކުންފުނީގެ އަހަރީ އާންމު ޖަލްސާ 2024 އާ ގުޅިގެން ނެރުނު ނޫސްބަޔާނެއްގަ އެވެ.
މިފްކޯގެ ބަޔާނުގައި ބުނީ 2024 ވަނަ އަހަރު މިފްކޯއަށް ދިމާވި މާލީ ގެއްލުމުގެ އަސްލަކީ ކުންފުނީގެ ވިޔަފާރިއަށް ބޭނުންވާ މައިގަނޑު ރޯމެޓީރިއަލްސް ކަމަށްވާ މަސް ނުލިބުން ކަމަށެވެ. އެގޮތުން، މިފްކޯގެ ތާރީހުގައިވެސް ނުދެކޭ ވަރަށް ރާއްޖޭގެ މަސްވެރިކަން ދަށްވުމާ ގުޅިގެން، 2024 ވަނަ އަހަރުގެ އޭޕްރީލް މަހުން ފެށިގެން ކުންފުންޏަށް ލިބުނު މަހުގެ އަދަދު ވަރަށް ބޮޑަށް ދަށްވެފައިވާ ކަމުގައި އެ ކުންފުނިން ފާހަގަކުރެ އެވެ.
މިދިޔަ އަހަރު މިފްކޯގެ އާމްދަނީ 2.009 ބިލިއަން ރުފިޔާއިން 1.076 ބިލިއަން ރުފިޔާއަށް ދަށަށް ގޮސްފައިވާކަމަށް އެ ކުންފުނިން ބުނެފައިވެ އެވެ. މިއީ އޭގެ ކުރީ އަހަރާ އަޅައިބަލާއިރު 933 މިލިއަން ރުފިޔާގެ ދަށްވުމެއް ކަމަށް މިފްކޯގެ ބަޔާނުގައި ފާހަގަކޮށްފައިވެ އެވެ.
2024 ވަނަ އަހަރު މިފްކޯއަށް ފައިދާވެފައި ނުވާތީ، ޑިވިޑެންޑް ކަނޑަނޭޅުމަށް ޑިރެކްޓަރުންގެ ބޯޑުން ވަނީ ނިންމަވާފަ އެވެ. އަދި އެ ނިންމުން ވެސް މިއަދު ބޭއްވި ކުންފުނީގެ ނިމިގެންދިޔަ އަހަރުގެ އަހަރީ އާންމު ޖަލްސާގައި ވަނީ ފާސްކޮށްފަ އެވެ.
މިފްކޯއިން ބުނި ގޮތުގައި، ފާއިތުވި އަހަރަކީ ކުރިމަތިވި އެކި ގޮންޖެހުންތަކުން އަރައިގަނެ މަސްވެރި ސިނާއަތާއި މަސްވެރިން އަދި ދިވެހި ރައްޔިތުންނަށް ހިދުމަތް ފޯރުކޮށްދިނުމުގައި ދެމިއޮތުމަށް ކުރެވޭ މަސައްކަތުގައި އެ ކުންފުނިން ވަނީ ކާމިޔާބު ހޯދާފަ އެވެ. އަދި މި އަހަރަކީވެސް މިފްކޯއަށް ބޮޑެތި ގޮންޖެހުންތަކަކާ ކުރިމަތިލާން ޖެހިފައިވާ އަހަރަކަށް ވީނަމަވެސް، މިހާރުގެ މެނޭޖްމަންޓުން ކުންފުނީގެ އާމްދަނީ ހަރުދަނާކޮށް، އާންމު ބާޒާރުގެ ހާލަތުގައި ވެސް ކުންފުނީގެ ވިޔަފާރީގެ އޮނިގަނޑު ދެމެހެއްޓެނިވި ގޮތަށް ސާބިތުކޮށްދިނުމަށް މަސައްކަތް ކުރަމުންދާ ކަމުގައި އެ ކުންފުނިން ފާހަގަކުރެ އެވެ.
މީގެއިތުރުން، މިފްކޯއިން އަބަދުވެސް މަސައްކަތް ކުރާނީ ދިވެހިރާއްޖޭގެ މަސްވެރިކަމުގެ ސިނާޢަތުގެ އެންމެ އިސްބާރަކަށް ވުމަށާއި، މުޖުތަމައު ބާރުވެރިކުރުވުމަށާއި، ދެމެހެއްޓެނިވި ގޮތަށް މަސައްކަތްކޮށް ކުރިއެރުން ހޯދައިގެން ހިއްސާދާރުންނަށް ފައިދާ ހޯދައިދިނުމަށް ކަމަށް އެ ކުންފުނިން ވަނީ ބުނެފަ އެވެ.
މިފްކޯގެ އަހަރީ އާންމު ޖަލްސާގައި ވަނީ ފާއިތުވެދިޔަ އަހަރު ކުންފުނި ހިނގައިދިޔަ ގޮތުގެ މައްޗަށް ތައްޔާރުކޮށްފައިވާ ވީޑިއޯ ރިޕޯޓެއް ދައްކާފަ އެވެ. އަދި ކުންފުނީގެ ކުރިމަގާ ގުޅޭގޮތުން ކުންފުނީގެ މިހާރުގެ ސީ.އީ.އޯ އަދި މެނޭޖިންގ ޑައިރެކްޓަރ ބްރިގޭޑިއަރ ޖެނެރަލް (ރޓޑ) ފަރުހަތު ޝަހީރާއި ކުންފުނީގެ ސްޓްރެޓެޖިކް ކޮންސަލްޓެންޓް އިބްރާހީމް އާތިފް ޝަކޫރު ވަނީ ކުންފުނީގެ ކުރިމަގުގެ ރޭވުންތަކާ ގުޅޭގޮތުން ޕްރެޒެންޓޭޝަނެއް ހުށަހަޅުއްވައިދެއްވާފަ އެވެ.
މި ޖަލްސާގައި ނިންމި ކަންކަމުގެ ތެރޭގައި، 2023 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ފާސްކުރުމާއި، 2024 ވަނަ އަހަރުގެ އަހަރީ ރިޕޯޓު ފާސްކުރުމާއި، 2024 ވަނަ އަހަރު ކުންފުނީގެ އޮޑިޓް ކޮށްފައިވާ މާލީ ބަޔާން ފާސްކުރުން ހިމެނެ އެވެ. އަދި 2025 ވަނަ އަހަރަށް ކަނޑައަޅާ ކުންފުނީގެ އެކްސްޓާނަލް އޮޑިޓަރުގެ ގޮތުގައި ޑެލޮއިޓް ޕާޓްނަރސް ވެސް ވަނީ ފާސްކޮށްފަ އެވެ.