އެމްޑީޕީގެ ވަގުތީ ޗެއަރޕާސަންކަމުގެ މަގާމަށް އިންތިޚާބުވެވަޑައިގެންނެވިނަމަވެސް އެމަގާމު ދޫކޮށްލައްވަން ރައްޔިތުންގެ މަޖިލިހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ނިންމަވައިފިއެވެ.
މިދިޔަ ހުކުރު ދުވަހުގެ ރޭ އެމްޑީޕީން ބޭއްވި ގައުމީ މަޖިލީހުގެ ބައްދަލުވުމުގައި, ވަގުތީ ޗެއާޕާސަންގެ މަގާމަށް ކުރިމަތިލެއްވި ވަހީދު އެ މަގާމަށް ގެންނަން ފެނޭތޯ ނުވަތަ ނޫންތޯ ބެލުމަށް ނެގި ވޯޓުގެ ނަތީޖާއާ މެދު ސުވާލު އުފެދި އެ ބައްދަލުވުން ހޫނުވެގެން ވަކިގޮތެއް ނުނިންމާ ވަނީ ނިންމާލާފައެވެ. އެއީ އެ މަގާމަށް ވަހީދު ހޮވުމަށް 48 ވޯޓް ބޭނުންވާއިރު, އެ ރޭ ލިބުނީ 47 ވޯޓް ކަމަށް ސެކެޓްރިއޭޓުން އިއުލާން ކުރުމާއެކުއެވެ.
ފަހުން އެކަން ހިނގައިދިޔަ ގޮތް ބެލުމަށް ފަހު, އެ ޕާޓީގެ ޗެއާޕާސަންގެ ނައިބު, އިބްރާހީމް ވަހީދު, އެ ޕާޓީގެ ރައީސް އަބްދުالله ޝާހިދަށް އިއްޔެ ފޮނުވި ރިޕޯޓްގައި ބުނެފައިވަނީ ވަހީދަށް 48 ވޯޓް ލިބި, އޭނާ ވަގުތީ ޗެއާޕާސަންގެ މަގާމަށް އިންތިޚާބު ވެފައިވާ ކަމަށެވެ.
ނަމަވެސް އަބްދުﷲ ވަހީދު މިއަދު މިވަނީ އެމްޑީޕީގެ ރައީސް އަބްދުﷲ ޝާހިދު އަށް އެޑްރެސްކުރައްވާ އެމަގާމު ދޫކޮށްލެއްވިކަން ހާމަކުރައްވާފައިވާ ސިޓީ އާންމުކުރައްވާފައެވެ. އެސިޓީގައި ވަނީ އެމަގާމު ދޫކޮށްލި ސަބަބުތައް ހާމަކުރައްވާފައެވެ.
ސިޓީގައިވާ ގޮތުން ވަހީދު އެ މަގާމަށް ކުރިމަތި ލެއްވުމަށް ނިންމެވީ ޕާޓީގެ ޕާލަމެންޓްރީ ގުރޫޕުގެ މެންބަރަކު ގުޅުއްވައި އެކަމަށް އެދިވަޑައިގަތުމުން ކަމަށެވެ. އެ ހުށަހެޅުން އައުމާއެކު ޕާޓީގެ ރައީސް އަބްދުالله ޝާހިދާއި ޕާޓީގެ އެޑްވައިޒަރު, އަދި ކުރީގެ ރައީސް އިބްރާހީމް މުޙައްމަދު ޞާލިޙްގެ ލަފާ ހޯއްދެވި ކަމަަށާއި ދެ ބޭފުޅުން ވެސް ލަފާ ދެއްވީ އެކަމުގައި ކުރިއަށް ދިއުމަށް ކަމަށް ވަހީދު ވިދާޅުވިއެވެ.
ނަމަވެސް އެ ދެ ބޭފުޅުންނާއި ޕާލަމެންޓްރީ ގުރޫޕުގެ ބޭފުޅުން ފަހުން އަމަލު ކުރެއްވީ ވިދާޅުވިގޮތާ ޚިލާފަށް ކަމަށް ވަހީދު ވިދާޅުވިއެވެ.
"އެހެން ނަމަވެސް ތާއީދު ކުރައްވައި, އެ މަގާމަށް ނުކުތުމަށް ހިތްވަރު ދެއްވި ޕާޓީގެ ރައީސާއި ޕާޓީގެ އެޑްވައިޒަރު އަދި ޕާލަމެންޓްރީ ގުރޫޕުގެ މެންބަރުން އެ ވޯޓާ ހަމައަށް ދިޔައިރު އަމަލު ކުރެއްވި ގޮތުންނާއި, އަދި އެ ވޯޓަށް ފަހު އެ ފަރާތްތަކުން އަމަލު ކުރައްވަމުން ގެންދަވާފައިވާ ގޮތުން އަޅުގަނޑު އެ މަގާމު ފުރުމުގައި ބޮޑެތި ހުރަސްތަކެއް ކުރިމަތި ކުރުވާނޭ ކަމީ މިއަދު އަޅުގަނޑު ޝައްކު ކުރާ ކަމެއް ނޫން," ވަހީދުގެ ސިޓީގައިވެއެވެ.
އެހެންކަމުން އެ މަގާމުގައި އިތުރަށް ދެމި ނުހުންނަށް ނިންމާފައިވާ ކަމަށް ވަހީދު ވިދާޅުވިއެވެ. އެގޮތަށް ނިންމީ ޕާޓީ އެކަތިގަނޑެއްގެ ގޮތުގައި ބޭއްވުމަށް ކަމަށް ވަހީދު ވިދާޅުވިއެވެ.
އަދި ކުރިއަށް އޮތްތަނުގައި އެފަދަ ގޮތަކަށް އަމަލު ނުކުރެއްވުމަށް, ޞާލިހާއި ޝާހިދުގެ ކިބައިން ވަހީދު ވަނީ އެދިވަޑައިގެންފައެވެ. އަދި ޕާޓީގެ ބަދަހިކަން ހިފެހެއްޓުމަށް އެ ދެ ބޭފުޅުން މަސައްކަތް ކޮށްދެއްވުމަށް އޭނާ އެދިވަޑައިގަތެވެ.
އެމްޑީޕީގެ ޗެއަރޕާސަންކަމުގެ މަގާމުގައި ހުންނެވި ފައްޔާޒު އިސްމާއީލު އެމަގާމުން މިމަހުގެ 23 ވަނަ ދުވަހުގެ ރޭ ވަނީ އިސްތިއުފާދެއްވާފައެވެ. ފައްޔާޒު އިސްތިއުފާ ދެއްވަމުން ގައުމީ މަޖިލީހުގެ މެމްބަރުންނަށް ފޮނުއްވި ސިޓީ އާއި ގައުމީ މަޖިލީހުގައި ދެއްކެވި ވާހަކަފުޅުގައިވެސް ވަނީ އެޕާޓީގެ އެއްބައިވަންތަކަމަށް ގޮވާލައްވާފައެވެ. ވަކިން ޚާއްސަކޮށް ރައީސް މުހައްމަދު ނަޝީދު އާއި ރައީސް އިބްރާހީމް މުހައްމަދު ޞާލިހު އާ ދެމެދު އުފެދިފައިވާ ޚިޔާލުތަފާތުވުންތައް ނައްތާލާ ޕާޓީ އެކަތިގަނޑަކަށް ވުމަށް އެމަގުން މަސައްކަތްކުރެއްވުމަށް ގޮވާލެއްވިއެވެ. ނަމަވެސް އޭގެފަހުން އެ ދެބޭފުޅުންގެ ވާދަވެރިކަން ވަނީ އަނެއްކާވެސް ބޮޑުވެފައެވެ.