ދިރާގު ދިވެހި ޕްރިމިއާ ލީގުގައި އިއްޔެ ހަވީރު ޓީސީ ސްޕޯޓްސް ކްލަބް އަތުން އޮޑި ސްޕޯޓްސް ކްލަބް މޮޅުވި މެޗުގައި ފިޓް ޖެހުނު އޮޑީގެ ކެޕްޓަން މުހައްމަދު ރަޝީދު (ހޮކޭ) އަށް ފަރުވާދިނުމަށް ފަހު ހޮސްޕިޓަލުން ދޫކޮށްލައިފި އެވެ.
އިއްޔެގެ މެޗުގު 66 ވަނަ މިނެޓުގައި ދަނޑުގެ މެދެއްހާ ހިސާބުން މަތިން އައި ބޯޅައަކަށް ފުންމައިގެން އަރައި ބޮލުން ބޯޅަ ފޮނުވާލި ވަގުތު ހޮކޭ ދަނޑުމައްޗަށް ވެއްޓުނެވެ.
ހޮކޭ ވެއްޓުމާއެކު ދަނޑުމަތީގައި ގިނަ އިރުތަކެއް ވަންދެން ފަރުވާ ދިނުމަށް ފަހު، އަށިގަނޑުގައި ދަނޑުން ބާލައިގެން އޭނާ ވަނީ އޭޑީކޭ ހޮސްޕިޓަލަށް ގެންގޮސްފަ އެވެ. އިއްޔެ ތިން ފަހަރެއްގެ މަތިން ހޮކޭއަށް ފިޓް ޖެހިފައިވެ އެވެ.
ހޮކޭއަށް އޭޑީކޭގައި ފަރުވާ ދިނުމަށް ފަހު ހެދި ޓެސްޓްތަކުގެ ނަތީޖާ ރަނގަޅުވުމުން އޭނާ މިހާރު ވަނީ ދޫކޮށްލައިފަ އެވެ.
އޮޑިން ރޭ ނެރުނު ބަޔާނެއްގައި ވަނީ ހޮކޭއަށް ފިޓް ޖެހުނު ވަގުތު މެޑިކަލް އެހީތެރިކަން ފޯރުކޮށްދިން އޮޑީގެ ފިޓްނަސް ކޯޗު، އަހްމަދު މަހުފޫޒް މުހައްމަދު އާއި ޓީސީގެ ފިޒިއޯ ޝަރަފުއްދީން (ޝަރަފް) އަދި މާޒިޔާގެ މެޑިކަލް އޮފިސަރު، ޑރ. ހިޝާމް ޒަކީއަށް ޝުކުރު އަދާކޮށްފަ އެވެ.
ހޮކޭ ދަނޑުން ބާލަނީ - ފޮޓޯ: އަދަދު ސްޕޯޓްސް
ތަޖުރިބާކާރު ޑިފެންޑަރު ހޮކޭ ކުޅުން ހުއްޓާލުމަށް ފަހު، އަލުން ކުޅުމުގެ ތެރެއަށް އައީ އެންމެ ފަހުގެ ދެވަނަ ޑިވިޝަން މުބާރާތުގައި އޮޑީގެ ކެޕްޓަންގެ ގޮތުގަ އެވެ.
ކުރިން ނޭވާހިއްލުމުގެ އުނދަގޫވެސް ތަހައްމަލު ކުރާ ހޮކޭ ދަނޑުމައްޗަށް ކުއްލިއަކަށް ވެއްޓި މީގެ ކުރިން ވެސް ހޮސްޕިޓަލަށް ގެންގޮސް ފަރުވާ ދޭން ޖެހިފައިވެ އެވެ.