ވެރިކަންކުރާ ޕީއެންސީގެ ލޯކަލް ކައުންސިލް ޕްރައިމަރީގައި ވާދަކުރުމުގެ ފުރުސަތު މާދަމާ ހުޅުވާލުމަށް އެ ޕާޓީން ނިންމައިފި އެވެ.
ޕީއެންސީން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޕީޖީ ލީޑަރު އަދި ކެމްޕެއިން މެނޭޖަރު އިބްރާހީމް ފަލާހު ވިދާޅުވީ، ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބާ ގުޅިގެން ޕީއެންސީން ބާއްވާ ޕްރައިމަރީގައި ވާދަކުރުމުގެ ފުރުސަތު، ޑިސެމްބަރު 1 ވަނަ ދުވަހު ހުޅުވާލާނެ ކަމަށެވެ.
ފަލާހު ވިދާޅުވީ، އިންތިހާބާ ގުޅޭ މައުލޫމާތު ޕީއެންސީގެ ވެބްސައިޓުން ލިބޭނެ ކަމަށާއި، އަންނަ މަހުގެ 15 ވަނަ ދުވަހާއި ހަމައަށް، އޮންލައިން ފޯމު މެދުވެރިކޮށް ކުރިމަތިލުމުގެ ފުރުސަތު އޮންނާނެ ކަމަށެވެ. އަދި މިކަމަށް އެދި ކުރިމަތިލެވޭނީ، ޕާޓީގެ މެންބަރެއްގެ ގޮތުގައި ދަފުތަރުވެފައިވާ ފަރާތްތަކަށް ކަމަށްވެސް ފަލާހު ވިދާޅުވި އެވެ.
މީގެއިތުރުން، ޕީއެންސީގެ ޕްރައިމަރީ އޮންނާނީ އަންނަ މަހުގެ 27 ވަނަ ދުވަހު ކަމަށާއި، އެ މި އިންތިހާބުގައި ވޯޓުލުމުގެ ފުރުސަތު ލިބޭނީ، އެ މީހަކު ރަޖިސްޓްރީވެފައި އޮންނަ ރަށެއްގައި ހުންނަ ވޯޓު ފޮއްޓަށް ކަމަށްވެސް ފަލާހު ވިދާޅުވެފައިވެ އެވެ.
ފަލާހު އިތުރަށް ވިދާޅުވީ ޕްރައިމަރީގައި ވާދަކުރުމަށް މިހާރުވެސް ވަރަށް ގިނަ މެންބަރުން ޝައުގުވެރިކަން ފާޅުކުރަމުންދާ ކަމަށެވެ. އެހެންކަމުން، ޕްރައިމަރީގައި ގިނަ އަދަދެއްގެ ކެންޑިޑޭޓުން ވާދަކޮށް، މިއީ މިހާތަނަށް ރާއްޖޭގެ ސިޔާސީ ޕާޓީއަކުން ބާއްވާ އެންމެ ބޮޑު އެތެރޭގެ އިންތިހާބަށް ވެގެންދާނެކަމަށް ލަފާކުރެވޭ ކަމުގައި ފަލާހު ފާހަގަކުރެއްވި އެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު ބާއްވަން ތާވަލުކޮށްފައި ވަނީ އަންނަ އަހަރުގެ މާޗު 28 ވަނަ ދުވަހު އެވެ. އަދި އިންތިހާބަށް ކުރިމަތިލުމުގެ ފުރުސަތު ހުޅުވާލުމަށް ހަމަޖެހިފައި ވަނީ އަންނަ ޖެނުއަރީ މަހުގެ 17 ވަނަ ދުވަހު އެވެ.
އީސީން ބުނި ގޮތުގައި، މިފަހަރުގެ އިންތިހާބުގެ އިދާރީ ކަންކަމަށް 270 ވަރަކަށް މުވައްޒަފުން ބޭނުންވާނެ އެވެ. އަދި އިންތިހާބު ބޭއްވުމަށްޓަކައި ގާތްގަނޑަކަށް 70 ނުވަތަ 80 މިލިއަނެއްހާ ރުފިޔާ ހަރަދުވާނެކަމަށް އެ ކޮމިޝަނުން ލަފާކުރެ އެވެ.