ޓެކްސް އެޕީލް ޓްރައިބިއުނަލްގެ މެންބަރުކަމަށް ފަސް ބޭފުޅަކު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ޢައްޔަންކުރައްވައިފި އެވެ.
މި ބޭފުޅުން އައްޔަންކުރެއްވީ ޓެކްސް ނެގުމާބެހޭ އިދާރީ ގާނޫނުގެ 56 ވަނަ މާއްދާގެ (ހ) ގެ (1) ވަނަ ނަންބަރުގައިވާ ގޮތުގެމަތީންނެވެ.
ޓެކްސް އެޕީލް ޓްރައިބިއުނަލްގެ މެންބަރުކަމަށް އައްޔަންކުރެއްވި ފަސް ބޭފުޅުންނަކީ، ސ. ހިތަދޫ މާވަހި، ހަސަން ނާސިޙް އަހްމަދު، ށ. ކޮމަންޑޫ ޗަމަން، އަލްއުސްތާޛާ އުސާމާ މޫސާ، ހމ. ފްލެޓްނަންބަރު 02-2-88، އަލްއުސްތާޛާ އާއިޝަތު އިޝާ، ގއ. ނިލަންދޫ ގަސްދޮށުގެ، އަލްއުސްތާޛާ ޝިފްޒާ އަބްދުލްގައްޔޫމް އަދި ގދ. ގައްދޫ ބީޗްކޯނަރ، އަހްމަދު ޔާމީނެވެ.
ޓެކްސް އެޕީލް ޓްރައިބިއުނަލްގައި ތިއްބެވި ފަސް މެންބަރުންގެ މުއްދަތު އިއްޔެ ހަމަވުމާއި ގުޅިގެން، މެންބަރުކަމަށް މި ފަސްބޭފުޅުން އައްޔަންކުރެއްވީ ހޮނިހިރު ދުވަހު އެވެ.
ޓެކްސް އެޕީލް ޓްރައިބިއުނަލަކީ ޓެކްސް ނެގުމާ ބެހޭ އިދާރީ ގާނޫނުގެ ދަށުން ޓެކްސްއާ ގުޅޭ މައްސަލަތައް ބެލުމަށް އުފައްދާފައިވާ އިދާރާއެކެވެ.