ސްރީ ލަންކާގެ ރައްޔިތުންނަށް އެހީވުމަށް ދިވެހި މީޑިއާތަކުން ގުޅިގެން ކުރިއަށްގެންދާ "ސިލޯނާއެކު ދިވެހިން" ޓެލެތޯނާއި ގުޅުވައި ނާޖާއިޒް ފައިދާ ނެގުމަށް ސްކޭމަރުން މަސައްކަތް ކުރާނެ ކަމަށާއި އެފަދަ މީހުންނާއި އެމީހުންގެ އުކުޅުތަކަށް ސަމާލުވުމަށް ސީނިއާ ސާޖެންޓް އަބްދުالله ޝަހުނީޒް އިލްތިމާސް ކުރައްވައިފި އެވެ.
ދައުލަތުގެ މީޑިއާއިން އިސްނަގައިގެން އެހެން މީޑިއާ ތަކާއި ގުޅިގެން ކުއަށް ގެންދަމުންދާ "ސިލޯނާ އެކު ދިވެހިން" ޓެލެޓޯން ގައި ވާހަކަފުޅުދައްކަވަމުން ޝަހުނީޒް ވިދާޅުވީ ސްކޭމް ކުރުމަށް ގެންގުޅޭ އުކުޅުތައް ބަދަލުކުރަމުން އަންނަ ކަމަށާއި މިފަދަ ކަންކަމަށް ރައްޔިތުން ހޭލުންތެރިވުމަކީ މުހިންމު ކަމެއް ކަމަށެވެ.
ޝަހުނީޒް ވިދާޅުވީ އެކި ލިންކުތަށް ބޭނުންކޮށްގެން އަދި ސޯޝަލް މީޑިއާ ބޭނުން ކޮށްގެންވެސް ސްކޭމްގެ މެސެޖުތައް ފޮނުވަމުން ދާ ކަމަށެވެ.
މިފަދަ ޓެލެތޯންތަކުގައި ފައިސާ ޖަމާ ކުރުމަށް އެކައުންޓް ނަމްބަރެއް ހާއްސަކޮށްފައިވާއިރު ވެސް ޓެލެތޯންތައް ފެށެންވާއިރަށް ސްކޭމްކުރުމަށް މީހުން ތައްޔާރަށް ތިބޭ ކަމަށް ވިދާޅުވި އެވެ.
އެހެންކަމުން ސްކޭމްތަކުން ދުރުވުމަށްޓަކައި ފައިސާ ފޮނުވުމުގެ ކުރިން ރަނގަޅު އެކައުންޓް ނަންބަރުކަން ކަށަވަރުކުރުމަށް ޝަހުނީޒް އިލްތިމާސްކުރެއްވި އެވެ.
މީގެ އިތުރުން، ބޭންކް އޮފް މޯލްޑިވްސްގެ ބްރޭންޑް އެންޑް މާކެޓިން ސްޓްރަޓެޖީ މުހައްމަދު ސައީދު ވިދާޅުވީ ފައިސާ ހޯދުމަށް ބޭންކް އޮފް މޯލްޑިވްސް (ބީއެމްއެލް)އިން ވެސް އަދި އެހެން ވުޒާރާއަކުން ވެސް އާންމު ރައްޔިތުންނަށް ގުޅައި މެސެޖު ނުކުރާނެ ކަމަށެވެ.
ބޭންކުން ދޭވޭ ކޮންމެ ހިދުމަތަކީވެސް ރައްކާތެރި ކަމާއެކު ދެވޭ ހިދުމަތްތައް ނަމަވެސް ބައެއް ރައްޔިތުންނަށް ކުރެވޭ ކަންކަމުގެ ސަބަބުން ތަފާތު މައްސަލަތައް ކުރިމަތިވާ ކަމަށް ވިދާޅުވި އެވެ.