ނަފްސާނީ ބައްޔަށް ފަރުވާ ހޯދުމަށް ހަދަން ޖެހޭ ޓެސްޓެއް އައިޖީއެމްއެޗްއިން ނުހެދޭކަމުގެ ޝަކުވާއާއެކު އެ މައްސަލަ ރައްޔިތުންގެ މަޖިލީހަށް ހުށަހަޅައިފި އެވެ.
މާވަށު ދާއިރާގެ މެމްބަރު އަހުމަދު ޝާކިރު، މަޖިލީހުގެ ރައީސް އަބްދުއްރަހީމް އަބްދުﷲއަށް އެޑްރެސްކުރައްވާ ފޮނުއްވި ސިޓީގައި އެދިފައި ވަނީ މިކަން ރައްޔިތުންގެ މަޖިލީހުގެ އިޖުތިމާއީ ކޮމެޓީ މެދުވެރިކޮށް އަވަސް ގޮތެއްގައި ބައްލަވައި ދެއްވުމަށެވެ.
މެމްބަރު ޝާކިރު ހުށަހެޅުއްވި މައްސަލާގައި ފާހަގަކޮށްފައިވަނީ ނަފްސާނީ ބަލި ތަހައްމަލު ކުރަމުންދާ 18 އަހަރުގެ ކުއްޖެއް ކޮންމެހެން ފަށަންޖެހޭ ފަރުވާއެއް ފެށުމުގެ ކުރިން ހަދަންޖެހޭ ޓެސްޓުތައް އައިޖީއެމްއެޗްއިން ހެދޭތޯ ޔަގީންކުރުމަށް ފަހު ޓެސްޓުތައް ހެދުމަށް ނަމްބަރު ނަގައި 200 އަށްވުރެ ގިނަ މީހުންގެ ކިޔުއަކަށް ފަހު ލޭ ނަގަން ދިޔައިމަ ޓެސްޓު ހެދުމަށް ބޭނުންވާ އާލާތް ނެތުމުން ޓެސްޓު ހެދެން ނެތް ވާހަކަ އައިޖީއެމްއެޗްގެ ލެބޯޓަރީއިން އަންގާފައިވާކަމަށް މެމްބަރު ހުށަހެޅުއްވި މައްސަލާގައިވެ އެވެ.
މެމްބަރު ހުށަހެޅުއްވި މައްސަލާގައި ލެބޯޓަރީގައި ލިތިއަމް ޓެސްޓު ހަދަން ބޭނުންކުރާ ރީއެޖެންޓް އަދި ޕެޓްރި ޑިޝް ވެސް ނެތްކަން ފާހަގަކޮށްފައިވެ އެވެ. އަދި ސްޓްރޯކް ޖެހޭ މީހުންގެ ލޭ ދިޔާ ކުރުމަށް ބޭނުންވާ މުހިންމު ބޭހެއް ވެސް ރާއްޖެއިން ނުލިބޭކަން މެމްބަރު ފޮނުއްވި ސިޓީގައިވެ އެވެ.
މީގެ އިތުރުން މި ކަންކަމަކީ ގިނަ އަދަދެއްގެ ރަައްޔިތުން ތަހައްމަލު ކުރަމުންދާ ޒަރޫރީ ބޭސް ނުލިބުމުގެ މައްސަލަ ނުލިބުމުގެ ހާލަތަށް އިތުރުވާ ކަންކަން ކަމަށް މެމްބަރު ފާހަގަ ކުރެއްވި އެވެ.
ދާދި ފަހުން ހެލްތު މިނިސްޓަރު އަބްދުﷲ ނާޒިމް މަޖިލީހަށް ވަޑައިގެން މަޖިލީހުގެ މެމްބަރުންގެ ސުވާލުތަކަށް ޖަވާބުދެއްވައި ވިދާޅުވީ ބޭސް ލިބުމުގައި ދަތި ކަމެއް ނޫޅޭނެ ކަމަށާއި އާސަންދައަކީ ފުރިހަމަ ނިޒާމެއް ކަމަށެވެ.
ދިވެހި ރައްޔިތުންނަށް ފާމަސީތަކުން ބޭސް ނުލިބޭ މައްސަލަ ރައްޔިތުންގެ މަޖިލީހުގެ ތަޅުމަށް ގަލޮޅު އުތުރު ދާއިރާގެ މެމްބަރު ކުއްލި މައްސަލައެއްގެ ގޮތުގައި ހުށަހަޅުއްވުމުން، ސަރުކާރުން މެމްބަރުން އެ މައްސަލައާ ދެކޮޅަށް ވޯޓު ދެއްވުމުން އެ މައްސަލަ މަޖިލީހަށް ބަލައިގެންފައެއް ނުވެ އެވެ.