ސްރީ ލަންކާގައި ކުރަމުންދާ ވިއްސާރަ އާއި ގުޅިގެން ވިސާއާ ގުޅޭ ޖޫރިމަނާތަކުން ލަންކާގައި މިހާރު ތިބި މީހުން އިސްތިސްނާވާނެކަމަށް ސްރީ ލަންކާގެ އިމިގްރޭޝަން ޑިޕާޓްމެންޓް އިން ބުނެފިއެވެ.
ލަންކާގެ އިމިގްރޭޝަނުން ބުނީ ވިސާ އިތުރުކުރުމުގެ ފީ އާއި ހުއްދަ ދެވިފައިވާ މުއްދަތަށް ވުރެ ގިނަ ދުވަސްތަކެއް ހުރުމުގެ ސަބަބުން އާންމުކޮށް ދައްކަން ޖެހޭ ޖޫރިމަނާ ފައިސާ މި ދުވަސްކޮޅު ދައްކަން ނުޖެހޭނެ ކަމަށެވެ.
އެގޮތުން ނޮވެމްބަރު މަހުގެ 28 ވަނަ ދުވަހު ނުވަތަ އޭގެ ފަހުން ސްރީ ލަންކާއިން ފުރަން ހަމަޖެހިފައި އޮތް ނަމަވެސް ފްލައިޓް ކެންސަލްވުމުގެ ސަބަބުން ނުވަތަ މޫސުން ގޯސްވުމާ ގުޅިގެން ދަތުރުފަތުރުގެ ދަތިކަން ދިމާވެފައިވާތީ ފުރަން ނުދެވުނު މީހުން ވިސާ އިތުރުކުރުމުގެ ފީއާއި ހުއްދަދެވިފައިވާ މުއްދަތަށް ވުރެ ގިނަ ދުވަސްތަކެއް ހުރުމުގެ ޖޫރިމަނާއިން އިސްތިސްނާވާނެ ކަމަށެވެ.
މި ފިޔަވަޅަކީ ދަތުރުވެރިންގެ ކޮންޓްރޯލުން ބޭރުގައި ފުރުމުގައި ލަސްތަކެއް ކުރިމަތިވެފައިވާތީ ދަތުރުވެރިންނަށް އެހީތެރިވުމަށް ކަނޑައަޅާފައިވާ ފިޔަވަޅެއްކަމަށް ސްރީ ލަންކާގެ އިމިގްރޭޝަން ޑިޕާޓްމެންޓް އިން މައުލޫމާތު ދެ އެވެ.
މީގެ އިތުރުން ސްރީ ލަންކާގެ އިމިގްރޭޝަންއިން ބުނީ ކުރު މުއްދަތަކަށް ދަތުރުކުރަމުންދާ މީހުންނާއި ވިޔަފާރީގެ ވިސާ އަދި ރެސިޑެންސް ވިސާ ލިބިފައިވާ މީހުންނަށް ވިސާ އިތުރުކުރުމުގެ ފޯމޭލިޓީތައް ފުރިހަމަ ކުރުމަށް 7 ދުވަހުގެ މުއްދަތެއް ލިބިގެންދާނެކަމަށެވެ.
ކުރު މުއްދަތުތަކަށް ދަތުރުކުރާ ފަތުރުވެރިންގެ ވިސާގެ މުއްދަތު ޑިޕާޓްމަންޓްގެ އޮންލައިން ޕޯޓަލްއިން އިތުރުކުރެވޭނެކަމަށް ސްރީ ލަންކާގެ އިމިގްރޭޝަން އިން މައުލޫމާތު ދެ އެވެ.