އެމްޑީޕީގެ ޗެއަރޕާސަންގެ އިންތިޚާބުގައި ވާދަކުރެއްވުމަށް ގަލޮޅު ދެކުނު ދާއިރާގެ މެމްބަރ މީކާއީލު އަހުމަދު ނަސީމް ނިންމަވާ އެކަން އިއުލާންކުރައްވައިފިއެވެ.
އެމްޑީޕީގެ ޗެއަރޕާސަންގެ މަގާމު ހުސްވީ ނޮވެމްބަރ މަހުގެ 23 ވަނަ ދުވަހުގެ ރޭ އެމަގާމުގައި ހުންނެވި ފައްޔާޒު އިސްމާއީލު އިސްތިއުފާދެއްވުމާއި ގުޅިގެންނެވެ.
ޗެއަރޕާސަންގެ މަގާމަށް ކުރިމަތިލައްވާކަން ހާމަކުރައްވަމުން މީކާއީލު ސޯޝަލް މީޑިޔާގައި ކުރެއްވި ޕޯސްޓުގައި ވަނީ ޕާޓީގެ ލީޑަރޝިޕުން އައު ޖީލަކަށް ފުރުސަތު ހޯދުމުގެ މުހިންމު މަސައްކަތުގައި އެމްޑީޕީގެ އާންމު މެމްބަރުންގެ އެއްބާރުލުމާއި ތާއީދަށް އެދިވަޑައިގަންނަވާފައެވެ.
އެމްޑީޕީގެ ޗެއަރޕާސަން އިންތިޚާބު ބާއްވާނެ ތާރީޚެއް އަދި ކަނޑައެއް ނާޅައެވެ. ނަމަވެސް ވަގުތީ ޗެއަރޕާސަނެއް ކަނޑައެޅުމަށް އެމްޑީޕީން ވަނީ ހުކުރު ދުވަހުގެ ރޭ ގައުމީ މަޖިލީހުގެ ބައްދަލުވުމެއް ބާއްވާފައެވެ. ނަމަވެސް އެބައްދަލުވުން ވަނީ އަރާރުން ބޮޑުވެ ނިޒާމު ގެއްލުމުގެ ސަބަބުން އެމަގާމަށް ވަކި ބޭފުޅަކު އައްޔަނުނުކުރެވި ވަކި ހިސާބުން ހުއްޓާލާފައެވެ.
ގައުމީ މަޖިލީހަށް ރައީސް މުހައްމަދު ނަޝީދަށް ތާއީދު ކުރައްވާ ބޭފުޅުންނާއި ރައީސް އިބްރާހިމް މުހައްމަދު ސޯލިހަށް ތާއީދުކުރައްވާ ބޭފުޅުން ދެ ނަމެއް ހުށަހެޅުއްވިއެވެ.
ރައީސް ނަޝީދަށް ތާއީދުކުރައްވާ ބޭފުޅުން ހުށަހެޅުއްވީ އެއީ ދިއްދޫ ދާއިރާގެ ކުރީގެ މަޖިލިސް މެންބަރު އަބްދުﷲ ވަހީދުގެ ނަމެވެ. ރައީސް ސޯލިހަށް ތާއީދުކުރައްވާ ބޭފުޅުން ހުށަހެޅުއްވީ މަޖިލީހުގެ ކުރީގެ ރައީސް މުހައްމަދު އަސްލަމްގެ ނަމެވެ.
މި ދެ ނަން ހުށަހެޅުމުން އެމްޑީޕީގެ ލީގަލް ޓީމުން ލަފާ ދިނީ އަސާސީ ގަވާއިދު އޮތް ގޮތުން ވަގުތީ ޗެއާޕާސަނަކަށް ކުރިމަތިލެވޭނީ ގައުމީ މަޖިލިސްގެ މެންބަރަކަށް ކަމަށާއި އަސްލަމަކީ ގައުމީ މަޖިލީހުގެ މެމްބަރަކަށް ނުވާތީ އަސްލަމަށް މަގާމަށް ކުރިމަތިނުލެއްވޭނެ ކަމަށެވެ.
އަބްދުﷲ ވަހީދުގެ ނަމަށް ވޯޓަށް އެހި ގަޑީ ގައުމީ މަޖިލިސް ކުޑަކޮށް އަދުގަދަވާން ފެށި އެވެ. ވޯޓަށް އަހައި ނިމުމުން ރިޔާސަތުން އެންގީ އަބްދުﷲ ވަހީދަށް ލިބުނީ 47 ވޯޓު ކަމަށާއި ނަން ފާސްވާން މަދުވެގެން 48 ވޯޓު ބޭނުންވާ ކަމަށެވެ.
އަބްދުﷲ ވަހީދަށް އެކަށީގެންވާ އަދަދަށް ވޯޓު ނުލިބުނުކަން އެންގުމުންވެސް އިތުރަށް މަޖިލިސްތެރެ އަޑުގަދަވެ ހަލަބޮލިވާ ގޮތްވި އެވެ.