މާފަންނުގެ ރައްޔިތުންނާ ބައްދަލުކުރަން ރައީސުލްޖުމްހޫރިއްާ ޑރ. މުހައްމަދު މުއިއްޒު ބާއްވަވާ ބައްދަލުވުމާ ގުޅޭ ގޮތުން ދާއިރާގެ ރައްޔިތުންނަށް ފޮނުއްވި މެސެޖާ ގުޅިގެން މާފަންނު މެދު ދާއިރާގެ މެންބަރު އަސްމާ ރަޝީދު މާފަށް އެދިވަޑައިގެންފިއެވެ.
ބުރާސްފަތި ދުވަހު ތާޖުއްދީން ސްކޫލްގައި ބާއްވަން ހަމަޖެހިފައިވާ ބައްދަލުވުމުގައި ރައީސްއާ ސުވާލެއް ކުރަން ނުވަތަ މެސެޖެއް ދޭން ބޭނުންވާނަމަ އެންގުމަށް އެދިވަޑައިގެން، އަސްމާ ވަނީ ދާއިރާގެ މެންބަރުންނަށް މެސެޖެއް ފޮނުއްވައިފަ އެވެ.
އަސްމާގެ މި މެސެޖާ ގުޅިގެން ސޯޝަލް މީޑިއާގައި ފާޑުކިޔުންތައް ވަނީ އަމާޒުވެފައެވެ.
އޭގެފަހުން ރައްޔިތުންގެ މަޖިލީހުގެ ލެޓަރ ހެޑްގައި ސޯޝަލް މީޑިޔާއަށް އާންމުކުރެއްވި ސިޓީގައި ވަނީ ދާއިރާގެ ރައްޔިތުންނަށް އަސްމާ ފޮނުއްވި މެސެޖަކީ ޖަލްސާގައި އެއްވެސް ސަބަބަކާ ހުރެ ރައީސްއާ ސީދާ ސުވާލު ކުރަން ފުރުސަތު ނުލިބޭ ފަރާތްތަކުގެ ހިޔާލާއި ކަންބޮޑުވުންތައް ރައީސްއާ ހަމައަށް ފޯރުކޮށްދިނުމުގެ މަގުސަދުގައި ފޮނުވި މެެސެޖެއް ކަމަށެވެ.
"އަޅުގަނޑު ފޮނުވި މެސެޖާ ގުޅިގެން އެއްވެސް ބޭފުޅަކަށް އޮޅުމެއް އަރާފައިވާ ނަމަ، ނިހާޔަތަށް މާފަށް އެދެމެވެ،" އަސްމާ ވިދާޅުވެފައިވެއެވެ.
އަސްމާ ފޮނުއްވި މެސެޖާ ގުޅިގެން ރައްޔިތުންގެ މެދުގައި ކަންބޮޑުވުންތައް އުފެދިފައިވާއިރު އަސްމާގެ މެސެޖާ ގުޅިގެން ރައީސް ކުރިޔަށްގެންދަވާ ބައްދަލުވުންތަކާ ގުޅިގެން ނުބައި ތަސައްވުރެއް އާންމުންގެ މެދުގައި އުފެދިފައިވާކަމަށް ވިދާޅުވެ ރައީސް ވަނީ މާފަށް އެދުމަށް އަސްމާ އަށް އަންގަވާފައިކަމަށް މައުލޫމާތު ލިބެއެވެ.
ސަރުކާރުގެ ތަރުޖަމާން ހީނާ ވަލީދު އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ ރައީސް ބާއްވަވާ ބައްދަލުވުންތަކުގައި ކުރާނެ ސުވާލާއި ފާޅުކުރާނެ ހިޔާލު ކުރިން ހުށަހަޅަން ޖެހޭ ކަމަށް ބައެއް ފަރާތްތަކުން ވާހަކަ ދައްކަމުން ދިޔަ ނަމަވެސް އެއީ ހަގީގަތާ ހިލާފު ވާހަކައެއް ކަމަށެވެ. އެ ބައްދަލުވުންތަކުގައި ބައިވެރިވާ ރައްޔިތުން ދައްކަން ބޭނުންވި ވާހަކައެއް މިނިވަންކަމާ އެކު ދެއްކުމުގެ ފުރުސަތު މިހާތަނަށް ވެސް ދީފައިވާ ކަމަށް އޭނާ ވިދާޅުވިއެވެ.
ރައީސް ގެންދަވަނީ މާލޭގެ ރައްޔިތުންނާ ބައްދަލުކުރައްވަމުންނެވެ. އެގޮތުން ވިލިމާލެ ރައްޔިތުންނާ މައްޗަންގޮޅީގެ ރައްޔިތުންނާ މިހާތަނަށް އައިއިރު ވަނީ ބައްދަލުކުރައްވާފައެވެ. މިބައްދަލުކުރެއްވުންތަކުގައި ރައީސް އާ ސީދާ ސުވާލުކޮށް ރައްޔިތުންގެ ކަންބޮޑުވުންތައް ފާޅުކުރުމުގެ ފުރުސަތު ރައްޔިތުންނަށް ލިބިދެއެވެ. ނަމަވެސް އެންމެފަހުން ބޭއްވި މައްޗަންގޮޅިގެ ބައްދަލުވުމުގައި ރައީސް ގެންގުޅުއްވާ ސިޔާސަތުތަކަށް ފާޑުކިޔާ ކުރި ސުވާލުތަކަށް ރައީސް ސީދާ ޖަވާބެއް ދެއްވާފައެއްނުވެއެވެ.