ލަންކާއަށް ކުރަމުންދާ ވިއްސާރައިގައި މިހާތަނަށް އައިއިރު 153 މީހަކު މަރުވެފައިވާއިރު 191 މީހަކު ގެއްލިގެން ހޯދަންފަށައިފިއެވެ.
ބޯކޮށް ވާރޭވެހުމުގެ ސަބަބުން ރެސްކިއު ޓީމުތަކަށް އޮޕަރޭޝަންތައް ކުރިޔަށްގެންދަން ދަތިތަކާ ކުރިމަތިވިއެވެ. އެހެންކަމުން ވާރޭވެހުން ތުނިކޮށްލުމާއެކު ރެސްކިޔު އޮޕަރޭޝަންތައް ފެށިއިރު ލަންކާއިން ހިތްދަތި ޚަބަރުތަކެއް ދަނީ ލިބެމުންނެވެ.
އެގޮތުން އަކުރަނާގައި، ދެ ދުވަސް ވަންދެން ހުއްޓުމެއް ނެތި ކުރި މަސައްކަތުން ރެސްކިއު ޓީމުތަކުން ވަނީ ފުރާނަ ގެއްލިފައިވާ ޒުވާން ފިރިހެން ކުއްޖެއްގެ ހަށިގަނޑު ހޯދައިފަ އެވެ. އަދި ލަންކާގެ ކަމާބެހޭ ފަރާތްތަކުން ރިޕޯޓްކުރާ ގޮތުގައި ވެއްޓިފައިވާ އިމާރާތްތަކުގެ ދަށުން ބައެއް ސަރަހައްދުތަކުން އަންނަނީ ހަށިގަނޑުތައް ފެންނަމުންނެވެ.
މީގެއިތުރުން ލަންކާގެ ބައެއް ހިސާބުތަކުގައި ބިންގަނޑު ކަނޑައިގެން ދިއުމުގެ ނުރައްކާ ދަނީ އިތުރުވަމުންކަމަށް މައުލޫމާތު ލިބިފައިވެއެވެ.
ލަންކާގެ ޑިޒާސްޓާ މެނޭޖްމަންޓް ސެންޓަރުގެ ޑިރެކްޓަރު ޖެނެރަލް ރިޓަޔާޑް މޭޖާ ޖެނެރަލް ސަމްޕަތު ކޮޓޫވެގޯޑާ، ލަންކާގެ އާންމުންނަށް، ހާއްސަކޮށް ރިސްކް ބޮޑު ސްލޯޕް ސަރަހައްދުތަކުގައި ތިބި މީހުންނަށް ސަމާލުވެ ތިބުމަށާއި ރަސްމީ އިރުޝާދުތަކާ އެއްގޮތަށް އަމަލުކުރުމަށް އިލްތިމާސްކުރައްވައިފައިވެއެވެ.
މީގެ އިތުރުން ލަންކާގެ ޕަންނާލާގެ އުމުރުން ދުވަސްވީ މީހުން ބަލާ ފެސިލިޓީއެއް ގައި ފެންބޮޑުވުމުގެ ސަބަބުން ދުވަސް ވެފައިވާ 11 މީހަކުވަނީ މަރުވެފައެވެ. ލަންކާގެ ލޯކަލް އޮތޯރިޓީތަކުން ބުނާގޮތުގައި މެދުނުކެނޑި ބޯކޮށް ވާރޭވެހުމުގެ ސަބަބުން އެ ފެސިލިޓީ ހަލާކުވެފައިވާކަމަށާއި، އެތަނުގެ ތެރޭގައި ތިބި ބައެއް މީހުން ވަނީ އެތެރޭގައި ތާށިވެފައިކަމަށެވެ. އަދި އިމަޖެންސީ ރިސްޕޯންޑަރުންނާއި ވޮލަންޓިއަރުން މިތަނުން، 14 މީހަކު ސަލާމަތް ކޮށްފައިވާކަމަށް މައުލޫމާތު ލިބެއެވެ.
ލަންކާގެ ޑިޕާޓްމަންޓް އޮފް މީޓިއޮރޮލޮޖީގެ ޑިރެކްޓަރ ޖެނެރަލް އަތޫލާ ކަރޫނާނަޔަކޭ ވިދާޅުވީ ތޫފާން ލަންކާ އާ ދުރަށް ގޮސް އޭގެ ސީދާ އަސަރުތައް ކުޑަ ވެފައިވީ ނަމަވެސް ނުސީދާ އަސަރުތައް އަދިވެސް ވަރަށް ބޮޑުކަމަށެވެ. އަދި އޭނާ ވަނީ އުތުރު، އުތުރު މެދު، އިރުމަތީ އަދި މެދު ޕްރޮވިންސްގެ ވަކި ސަރަހައްދުތަކަށް 100 މިލިމީޓަރަށް ވުރެ މައްޗަށް ވާރޭ ވެހުމާއި ހުޅަނގު އަދި ސަބަރަގަމުވާ ޕްރޮވިންސްތަކަށް 50 މިލިމީޓަރަށް ވުރެ މައްޗަށް ވާރޭ ވެހޭނެ ކަމަށާއި އެހެން ހިސާބުތަކުގެ ބައެއް ތަންތަނަށް ވިއްސާރަ ނުވަތަ ގުގުރުން އެކަށީގެންވާކަން ފާހަގަކޮށްފައެވެ.
މިއީ 2021 ގެ ފަހުން ސްރީލަންކާގައި މިހާބޮޑަށް ފެންބޮޑުވި ފުރަތަމަފަހަރެވެ.