ބާރުގަދަ ތޫފާން ދިތުވާއާ ގުޅިގެން އަވަށްޓެރި ސްރީލަންކާއިން ހާލުގައި ޖެހިފައިވާ މީހުންނަށް އެހީތެރިވުމަށް ހާއްސަ ޓެލެތޯނެއް ކުރިއަށްގެންދިޔުމަށް ޕަބްލިކް ސަރވިސް މީޑިއާ (ޕީއެސްއެމް) އިން ނިންމައިފި އެވެ.
ޕީއެސްއެމްއިން މިއަދު ނެރުނު ބަޔާނެއްގައި ބުނީ، މިއީ ސްރީލަންކާއަށް ކުރަމުންދާ ވިއްސާރައިގައި އެ ގައުމަށް ބޮޑެތި ގެއްލުންތަކެއްވެ އެތައްބަޔަކު މަރުވެ އެތައްބަޔަކު ހާލުގައި ޖެހިފައިވާތީ، އެ ގައުމަށް އެހީތެރިވުމުގެ ގޮތުން ބާއްވާ ޓެލެތޯނެއް ކަމަށެވެ.
ޕީއެސްއެމްއިން ބުނި ގޮތުގައި މި ޓެލެތޯން ކުރިއަށްގެންދާނީ ރާއްޖޭގެ މީޑިއާތަކާ ގުޅިގެންނެވެ. ޓެލެތޯން ކުރިއަށް ގެންދަން ނިންމާފައިވަނީ މާދަމާ ހެނދުނު 9:00 އިން މެންދަމު 1:00 އަށެވެ.
ލަންކާއަކީ ޒަމާނުއްސުރެ ރާއްޖެއާ ނުހަނު ގާތް ރަހުމަތްތެރި ގައުމެއް ކަމަށާއި، އެ ގައުމުގެ ރައްޔިތުންނަކީ ދިވެހީންނާ ވަރަށް ގާތްގުޅުންތަކެއް ބާއްވާ އެކުވެރި ބައެއް ކަމުގައި ޕީއެސްއެމްއިން ފާހަގަކުރެ އެވެ. ރާއްޖޭން ބޭރުގައި އެންމެ ގިނަ ދިވެހިން ދިރިއުޅެމުން އަންނަ އެއް ގައުމަކީވެސް ސްރީލަންކާ އެވެ.
އެހެންކަމުން، ލަންކާއަށް ކުރިމަތިވެފައިވާ ހިތާމަވެރި ހާލަތުގައި ދިވެހިންނަށް ދެވެން އޮތް ކޮންމެ އެހީތެރިކަމެއް ދިނުމަކީ މުހިއްމުކަމެއް ކަމަށް ޕީއެސްއެމްއިން ވަނީ ބުނެފަ އެވެ.
މާދަމާގެ މި ޓެލެތޯނުގައި ޕީއެސްއެމްއާ ބައިވެރިވުމަށް ރާއްޖޭގެ ހުރިހާ ނޫސް މީޑިއާތަކަށް ވަނީ ދައުވަތުދީފަ އެވެ. އަދި މިޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނާއި، ޖަމިއްޔާ ޖަމާއަތަކާއި، ކްލަބްތަކާއި އޮފީސްތައް ފަދަ ހުރިހާ ތަންތަނަށްވެސް އޮންނާނެ ކަމަށް ޕީއެސްއެމްއިން މައުލޫމާތުދެ އެވެ.