ދިރާގު ދިވެހި ޕްރިމިއާ ލީގުގައި މާޒިޔާ ސްޕޯޓްސް އެންޑް ރެކްރިއޭޝަނުން ނިއު ރޭޑިއަންޓް ސްޕޯޓްސް ކްލަބް ބަލިކުރި އިރު، ވިކްޓަރީ ސްޕޯޓްސް ކްލަބާއި ކްލަބް އީގަލްސް އެއްވަރުވެއްޖެ އެވެ.
އިއްޔެ ހަވީރު މާޒިޔާއިން ފަހަތުން އަރައި ނިއު ބަލިކުރީ 2-1 އިންނެވެ. މިއާއެކު މާޒިޔާއިން ލީގުގެ ފުރަތަމަ ބުރު ނިންމާލީ މިހާތަނަށް ކުޅުނު ނުވަ މެޗުން ވެސް މޮޅުވެ، ލީގުގެ އެއްވަނައިގަ އެވެ.
މި މެޗުގެ ކުރީކޮޅު ނިއުއަށް ލަނޑު ޖަހައިދިނީ ގޯމޭސް ޑަ ސިލްވާ އެވެ. ނިއުއިން ލީޑުގައި އޮވެ ފުރަތަމަ ހާފު ނިންމެން ދަނިކޮށް މާޒިޔާއިން އެއްވަރުކުރީ އަހްމަދު އައިހަމް (ފަތޯ) ކާމިޔާބުކުރި ލަނޑުންނެވެ. އަދި މެޗުގެ 72 ވަނަ މިނެޓުގައި، މާޒިޔާ މޮޅުވި ލަނޑު ޖަހައިދިނީ ހަމްޒާ މުހައްމަދު (ހަމްޕު) އެވެ.
ދިވެހި ލީގުގައި ރޭ ވިކްޓަރީ އާއި އީގަލްސް އެއްވަރުވީ 2-2 ގެ ނަތީޖާއަކުންނެވެ.
ވިކްޓަރީ އާއި އީގަލްސް ބައްދަލުކުރި މެޗުގެ ތެރެއިން - ފޮޓޯ: އަދަދު ސްޕޯޓްސް
މި މެޗުގައި ފުރަތަމަ ދެ ލަނޑުވެސް ޖެހީ ވިކްޓަރީންނެވެ. އެގޮތުން، މެޗުގެ ހަތް ވަނަ މިނެޓުގައި އެ ޓީމަށް ލީޑު ނަގައިދިނީ ބްރެޒިލްގެ ފޯވާޑް ވްލަޑިމީރު އެވަޓަން އެެވެ. އޭގެފަހުން 15 ވަނަ މިނެޓުގައި ވިކްޓަރީގެ ދެވަނަ ލަނޑު ޖެހީ އަމްދާން އަލީ (އެންޑީ) އެވެ.
މެޗުގައި އީގަލްސްގެ ދެ ލަނޑުވެސް ކާމިޔާބުކުރީ ކެޕްޓަން އަހްމަދު ރިޒުވާން (ރިޒޭ) އެވެ. އޭނާ ފުރަތަަމަ ލަނޑު ޖެހީ 24 ވަނަ މިނެޓުގަ އެވެ. އަދި އީގަލްސްއަށް ނަތީޖާ އެއްވަރުކޮށްދިން ލަނޑު ފެނިގެންދިޔައީ މެޗުގެ 63 ވަނަ މިނެޓުގަ އެވެ.
ލީގުގައި މިއަދު ހަވީރު ޓީސީ ސްޕޯޓްސް ކްލަބާއި އޮޑި ސްޕޯޓްސް ކްލަބް ބައްދަލުކުރާ އިރު، މިރޭ ކްލަބް ވެލެންސިއާ ނުކުންނާނީ ބުރު ސްޕޯޓްސް ކްލަބާ ދެކޮޅަށެވެ.