ފަލަސްތީނާ ދެކޮޅަށް ކުރަމުންދާ ހަނގުރާމަ ހުއްޓާލުމަށް ހަދާފައިވާ އެއްބަސްވުމާ އިސްރާއީލުން ހިލާފުވެ ފަލަސްތީނުގެ އިގްތިސާދު ކުރިއަރާނެ ފުރުސަތުތަކަށް އިސްރާއީލުން ހުރަސްއަޅަމުންދާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މިއަދަކީ ފަލަސްތީނުގެ ރައްޔިތުންނާ އެއްބައިވެ ތިބުން ބައިނަލްއަގްވާމީ ގޮތުން ފާހަގަކުރާ ދުވަސްކަން ފާހަގަކުރައްވައި ރައީސް ކުރެއްވި ޕޯސްޓެއްގައި ވިދާޅުވީ ބިމުގެ ހަގީގީ ހާލަތު އަދިވެސް އޮތީ ހިތާމަވެރި ހާލަތެއްގައި ކަމަށެވެ. ހަނގުރާމަ ހުއްޓާލުމުގެ އެއްބަސްވުންތަކަށް ޚިލާފުވުމާއި، ޣައްޒާއަށް އިސްރާއީލުން ހުއްޓުމެއްނެތި ދެމުންދާ ހަމަލާތަކާއި ފަލަސްތީނުގެ ބިންތަކުގައި ނުހައްގުން ވަޒަންވެރިވުން ފުޅާކުރަމުން ދިޔުމާއި ދިރިއުޅުމުގެ ކަންކަމަށް ހަރުކަށި ދަތިކުރުމުގެ ފިޔަވަޅުތައް އެޅުމުގެ ސަބަބުން ފަލަސްތީނު ރައްޔިތުންނަށް ހަމަޖެހުމެއް ލިބެމުން ނުދާ ކަމަށް ރައީސް ވިދާޅުވި އެވެ.
އެހެންކަމުން، އިގްތިސާދީ ގޮތުން ކުރިއަރާނެ މުސްތަގްބަލެއް ފަލަސްތީނަށް ލިބިގެންދިއުމަށް ހުރަސްއަޅާ ކަމަށް ރައީސް ވިދާޅުވި އެވެ.
ކުރިއަށްވުރެ ބޮޑަށް އެކަތިގަނޑެއްގެ ގޮތުގައި ތިބުމަށް ގޮވާލައްވައި މިކަންކަން އަމަލަކަށް ބަދަލުކުރުމަށް ރައީސް ގޮވައިލެއްވި އެވެ. އަދި ފަލަސްތީނުގެ ރައްޔިތުންގެ ޝަރުޢީ ހައްގުތަކާއި އެދުންތައް ފުރިހަމައަށް ޙާސިލްކުރުމަށް އެއްބަސްވެގެން މަސައްކަތްކުރުމަށް ގޮވައިލެއްވި އެވެ.
އދ.ގެ ޤަރާރުތަކާއި ބައިނަލްއަޤުވާމީ ޤާނޫނުތަކާ ޚިލާފުވެ، އިސްރާއީލުން ހިންގާ ޓެރަރިޒަމްގެ އަމަލުތަކަށް އިސްރާއީލު ޖަވާބުދާރީ ކުރުވުމަށް ރައީސް މީގެ ކުރިން ވެސް ގޮވައިލައްވާފައިވެ އެވެ.
ދިވެހިރާއްޖެއިން ފަލަސްތީނުގެ ރައްޔިތުންނާއެކު ސާބިތުކަމާއެކު ދެމިތިބޭނެކަމަށް ރައީސް ވިދާޅުވި އެވެ. ތިބުމަށް އެއްވެސް ފަސްޖެހުމެއްނެތި ކަނޑައެޅިގެން ކަށަވަރުކޮށްފައިއެވެ. އަދި 1967 ވަނަ އަހަރަށްވުރެ ކުރީގެ ސަރަޙައްދުތަކުގެ މައްޗަށް ބިނާކޮށް، އިރުމަތީ ގުދުސް އެއީ އޭގެ ވެރިރަށުގެ ގޮތުގައިވާ، މިނިވަން ދައުލަތެއްގެ ގޮތުގައި ފަލަސްތީން ބަލައިގަތުމަށް ދިވެހިރާއްޖެއިން އަބަދުވެސް ގޮވައިލާނެ ކަމަށް ވިދާޅުވި އެވެ.