ހައިވޭގައި ހިނގި އެކްސިޑެންޓެއްގައި އަނިޔާ ލިބުނު ދެ މީހަކަށް ފަރުވާދޭން ފަށައިފި އެވެ.
ފުލުހުން ބުނީ ހައިވޭއިން ހުޅުމާލެއަށްދާ ލޭން ނިމޭ ހިސާބުގައި ސައިކަލަކާއި ޕިކަޕެއް ޖެހިގެން އެކްސިޑެންޓެއް ހިނގަފައިވާކަމުގެ މައުލޫމާތު މިއަދު ހެނދުނު 9 ޖެހިއިރު ފުލުހުންނަށް ލިބިފައިވާ ކަމަށެވެ.
މި އެކްސިޑެންޓުގައި އަނިޔާވެފައިވަނީ ސައިކަލު ދުއްވަންއިން އުމުރުން 28 އަހަރުގެ ދިވެހި ފިރިހެނަކާއި، ސައިކަލުގެ ފަހަތުގައި އިން 22 އަހަރުގެ އިންޑިއާ އަންހެނަކަށް ކަމަށް ފުލުހުން ވަނީ ބުނެފަ އެވެ.
މި ދެމީހުންނަށްވެސް އައިޖީއެމްއެޗްގައި ދަނީ ފަރުވާދެމުންނެވެ. އަދި އަނިޔާ ލިބުނު ފިރިހެން މީހާގެ ކަނާތު ކޮނޑުހުޅު ނެއްޓި އެކިވަރުގެ އަނިޔާވެފައިވާކަމަށާއި، އަންހެން މީހާގެ ގައިގެ އެކި ތަންތަން މަށައިގެންގޮސް އެކިވަރުގެ އަނިޔާވެފައިވާކަމަށް ފުލުހުން މައުލޫމާތުދެ އެވެ.
ފުލުހުން ގެންދަނީ މި މައްސަލަ ތަހުގީގުކުރަމުންނެވެ.