18 Jan 2018, 10:23
މި މަހުގެ ހަތްވަނަ ދުވަހު ފިނޭންސް މިނިސްޓްރީން އިފްތިތާހް ކުރި "ބަނޑޭރި ޕޯޓަލް" އަންނަ އާދިއްތަ ދުވަހުން ފެށިގެން ރަސްމީކޮށް ބޭނުން ކުރަން ފަށާނެކަމަށް އެ މިނިސްޓްރީން ބުނެފިއެވެ.
"ބަނޑޭރި ޕޯޓަލް" އަކީ ދައުލަތުގެ މާލީ ނިޒާމުގެ މަސައްކަތްތައް އިތުރަށް ހަރުދަނާކޮށް އަވަސްކުރުމުގެ ގޮތުން، ދައުލަތުގެ ހުރިހާ މުއައްސަސާތަކާއި މިނިސްޓްރީއޮފް ފިނޭންސް އެންޑް ޓްރެޒަރީއާ ދެމެދު ކުރާ ފައިސާއާ ބެހޭ މުއާމަލާތްތައް އިލެކްޓްރޯނިކް ޒަރީއާއިން ކުރުމަށް އުފައްދާފައިވާ ޕޯޓަލް އެކެވެ.
ފިނޭންސް މިނިސްޓްރީން އިއްޔެ ނެރެފައިވާ ސާކިއުލާއެއްގައި ބުނެފައިވަނީ، އަންނަ އާދިއްތަ ދުވަހުން ފެށިގެން ދައުލަތުގެ ހުރިހާ އޮފީސްތަކުން ދަތުރުތައް މެނޭޖް ކުރުމާއި، މިނިސްޓްރީއަށް ހުށަހަޅަންޖެހޭ ލިޔެކިއުންތަކަށް ހުށަހެޅުމާއި، އެއަށް މިނިސްޓްރީން ޖަވާބު ދިނުމަށް ހަމަޖެހިފައިވަނީ އެ ޕޯޓަލް މެދުވެރިކޮށް ކަމަށެވެ.
ފިނޭންސް މިނިސްޓްރީން ބުނީ، އެ ޕޯޓަލް މެދުވެރިކޮށް ފިނޭންސް މިނިސްޓްރީއާއެކު ކުރެވެމުންދާ މުއާމަލާތްތައް އަވަސްކުރެވި ޖުމްލަކޮށް މުޅި ދައުލަތުގެ މާލީ ނިޒާމުގެ ހިންގުން އަވަސްވެ، ހަރުދަނާވެ، ބޮޑެތި ކުރިއެރުންތަކެއް ލިބިގެންދާނެ ކަމަށެވެ.