16 Jan 2018, 10:13
ދިވެހި ޅެންވެރިކަމުގެ ބަގީޗާގައި އިއްޔެއަށް ވުރެ ގިނައިން މިއަދު މާތައް އަންނަނީ ފަރިވެ ފޮޅެމުން ކަމަށާއި އަދި އެ މާތަކުގެ މީރު ވަސް ދަނީ ފެތުރެމުން ކަމަށް ދިވެހި ބަހުގެ އެކެޑަމީގެ ރައީސް އަޝްރަފް އަލީ ވިދާޅުވެއްޖެ އެވެ.
އިއްޔެ ރާއްޖޭގައި ފާހަގަ ކުރި 29 ވަނަ ޅެންވެރިންގެ ދުވަހުގެ މުނަސަބަތާ ގުޅުވައިގެން މިއަދި "ސަން"އަށް ދެއްވި އިންޓަވިއުއެއްގައި އަޝްރަފް ވިދާޅުވީ ދުވަހެއް ދުވަހަކަށް ދިވެހި ޅެންވެރިކަމުގެ ގުލްޒާރު އަންނަނީ މުއްސަނދިވަމުން ކަމަށާއި އައު ޅެންވެރިންތަކެއް އަންނަނީ އުފެދެމުން ކަމަށެވެ.
"އޮނަތިރީސް ވަނަ ޅެންވެރިންގެ ދުވަސް ފާހަގަ ކުރާއިރު އޮތް ހިތްހަމަ ޖެހުމަކީ ދިވެހި ޅެންވެރިކަމުގެ ބަގީޗާގައި އިއްޔެއަށް ވުރެ ގިނައިން މިއަދު މާތައް އަންނަނީ ފަރިވެ ފޮޅެމުން [ކަން]. އަދި އެ މާތަކުގެ މީރުވަސް ދަނީ ކުރިއަށް ވުރެ ބޮޑަށް ފެތުރެމުން." އަޝްރަފް ވިދާޅުވި އެވެ.
އޭނާ ވިދާޅުވީ މީގެ ދެ އަހަރު ކުރިން ދިވެހި ބަހުގެ އެކަޑަމީން އިސްނަގައިގެން ޅެންވެރިކަމުގެ އަސާސީ ހުނަރު މަދަރުސާތަކުގެ ދަރިވަރުންނަށް ދަސްކޮށްދިނުމަށް ކުރިއަށްގެން ދިޔަ ހަރަކާތުގެ ދަށުން ގާތްގަނޑަކަށް 700 އަށް ވުރެ ގިނަ ދަރިވަރުންނަށް ހުނަރު ދަސްކޮށްދީފައިވާ ކަމަށެވެ. އަދި އޭގެ ތެރެއިން ގިނަ ޅެންވެރިންތަކެއް ކުރިއަށް އޮތްތަނުގައި އުފެދިގެން ދާނެ ކަމަށް އަޝްރަފް ވިދާޅުވި އެވެ.
މި އަހަރު ފާހަގަ ކުރާ ޅެންވެރިންގެ ދުވަހުގެ ޝިއާރެއްގެ ގޮތުގައި ކަނޑައަޅާފައި ވަނީ "ހިންމަތާއި އެކުވެރިކަން ކަންކަމުގައި ށޭވެ ހިފާ" އެވެ. އެއީ ޅެންވެރިންގެ ދުވަސް އެބޭފުޅަކަށް ހާއްސަވާ އިބްރާހިމް ޝިހާބް، ހައްދަވާފައިވާ ޅެމެއްގެ ބައެކެވެ.
އަޝްރަފް ވިދާޅުވީ މި އަހަރުގެ ޝިއާރެކޭ އެއްގޮތަށް ޅެންވެރިން ވާން ޖެހޭނީ އެކަކު އަނެކަކާ ގުޅޭ އަދި ކަންކަމުގައި އެހީތެރިވާ ބައެއްގެ ގޮތުގައި ކަމަށެވެ. އަދި ޅެންވެރިންނަކީ މުޖްތަމައު ކަންބޮޑުވެ ހާސްވާ ވަގުތު އެ މީހުންގެ ހުނަރުން މުޖްތަމައު އަށް ހިތްހަމަ ޖެހުން ގެނެސްދޭ ބައެއް ކަމަށާއި އެހެން ކަމުން އަބަދު ވެސް އެފަދަ ކަންކަމުގައި ލިބިފައި ހުރި ހުނަރު ބޭނުން ކުރުމަށް އިލްތިމާސް ކުރައްވާ ކަމަށް ވިދާޅުވި އެވެ.
"އެކުވެރި ޅެންވެރިންނަށް ބުނެލަން އޮތީ މުޖްމަތަމު ކަންބޮޑުވެ ހާސްވާ ވަގުތު ޅެންވެރި ކަމުގެ ހުނަރުން މުޖްތަމައު ހިތްހަމަޖައްސައިދެން މަސައްކަތް ކުރާށޭ،" އަޝްރަފް ވިދާޅުވި އެވެ.
ބަހުގެ އެކަޑަމީން ކޮންމެ އަހަރަކު ވެސް ޅެންވެރިންގެ ދުވަސް ކުލަ ގަދަކޮށް ފާހަގަ ކުރާއިރު މި އަހަރުގެ ރަސްމީ ޖަލްސާ އޮންނާނީ އަންނަ ބުރާސްފަތި ދުވަހުގެ ރޭ ކަލާފާނު ސްކޫލުގައި ކަމަށް އަޝްރަފް ވިދާޅުވި އެވެ. އަދި އެ ޖަލްސާގައި ޅެންވެރިކަމާއި ގުޅުން ހުރި މުހިންމު ހަތަރު ފޮތެއް ނެރޭނެ ކަމަށް ވިދާޅުވި އެވެ.