14 Jan 2018, 18:09
އެންމެފަހުގެ އޮސްޓްރޭލިއަން އޯޕަން ޗެމްޕިއަން ރޯޖާ ފެޑެރާއަކީ އެ މުބާރާތުގެ ފެވަރިޓަކަށް މިހާރު ނުވާނެ ކަމަށް އޭނާ ބުނެފިއެވެ.
އުމުރުން 36 އަހަރުގެ ރޯޖާ ފެޑެރާ ބުނީ އޭނާގެ އުމުރަށް ބަލާއިރު މިހާރު އޭނާއަކީ އެއްވެސް މުބާރާތެއްގެ ފެވަރިޓް ނޫން ކަމަށެވެ. މިހާތަނަށް 19 ގްރޭންޑް ސްލޭމް ހޯދާފައިވާ ސްވިޒަލޭންޑްގެ ރޯޖާ ފެޑެރާ ބުނީ އޭނާގެ އުމުރުގައި މުބާރާތްތަކަށް ދާއިރު ޕްރެޝަރު ކުޑަ ކަމަށާއި، މޮޅުވުމަށް އެއްވެސް ވަރަށް ޕްރެޝަރު ނުވާ ކަަމަށެވެ.
އޮސްޓްރޭލިއަން އޯޕަންގެ ކުޅުން މާދަމާ ފެށުމަށް ހަމަޖެހިފައިވާއިރު، އިނގިރޭސި ވިލާތުގެ އެންޑީ މުރޭ މިއަހަރުގެ މުބާރާތުގައި އަނިޔާގެ ސަބަބުން ނުކުޅޭނެއެވެ. އަދި މުބާރާތުގައި އެންމެ މޮޅު ކުޅުންތެރިންގެ ގޮތުގައި ސީޑް ކޮށްފައިވާ ރަފޭލް ނަޑާލާއި ނޮވާކް ޖޮކޮވިޗްވެސް މި މުބާރާތަށް ނުކުންނަނީ އަނިޔާއިން ސަލާމަތްވިިތާ މާ ގިނަ ދުވަހެއް ނުވެއެވެ.
ވޭތުވެދިޔަ އަހަރުގެ އޮސްޓްރޭލިއަން އޯޕަންގެ ޗެމްޕިއަންކަން ރޯޖާ ފެޑެރާ ހޯދީ ގިނަ ދުވަސްތަކަކު އަނިޔާގައި ހުރުމަށް ފަހުގައެވެ. އަދި އެ ޓްރޮފީއަކީ ފަސް އަހަރު ތެރޭގައި އޭނާ ހޯދި ފުރަތަމަ ގްރޭންޑް ސްލޭމްއެވެ.
އޮސްޓްރޭލިއަން އޯޕަންގެ 20 ވަނަ މުބާރާތަށް ނުކުންނަ ފެޑްރާއަކީ ދުނިޔޭގައި އުފެދުނު އެންމެ މޮޅު އެއް ޓެނިސް ކުޅުންތެރިޔާއެވެ. އުމުރުން ގިނަ ދުވަސްތަކެއްވެފައި ވީނަމަވެސް، އޭނާއަކީ މިވަގުތުވެސް ދުނިޔޭގެ ދެވަނަ ކުޅުންތެރިއާއަށް ސީޑް ކުރެވިފައިވާ ކުޅުންތެރިޔާއެވެ.
އޮސްޓްރޭލިއަން އޯޕަންގައި ފެޑެރާ ކުޅޭ ފުރަތަމަ މެޗު ކުޅޭނީ އަންނަ އަންގާރަ ދުވަހު ދުނިޔޭގެ 51 ވަނަ ކުޅުންތެރިޔާ އަލްޖާޒް ބެޑީންއާއި ދެކޮޅަށެވެ.