14 Jan 2018, 09:04
ޑާކްރެއިން އެންޓަޓެއިންމެންޓުގެ ފެމެލީ ޑްރާމާ، "ވަކިން ލޯބިން"ގެ ޓިކެޓް އޮންލައިންކޮށް ބުކްކޮށްދޭން ފަށައިފި އެވެ.
ފިލްމުގެ ޕްރޮޑިއުސަރު މުހައްމަދު އަލީ (މޮގާ)ގެ ފޭސްބުކްގައި ބުނެފައި ވަނީ ވަކިން ލޯބިންގެ ޓިކެޓް އޮންލައިންކޮށް ބުކްކޮށްދޭން ފަށާފައިވާ ކަމަށެވެ.
ޓިިކެޓް ބުކް ކުރުމަށް ފިލްމުގެފޭސްބުކްޕޭޖްއަށް ފޯނު ނަމްބަރާއި، ޓިކެޓް ބޭނުންވާ ތާރީޚް އަދި ޓިކެޓް ބޭނުންވާ އަދަދު ފޮނުވާލުމުން ޓިކެޓް ބުކް ކުރެވޭނެ ކަމަށް މޮގާ ބުނެފައިވެ އެވެ.
ވަކިން ލޯބިންގެ ޕޯސްޓަރެއް --- ފޮޓޯ: ޑާކްރެއިން/ ފޭސްބުކް
މާޗް ފަސް ވަނަ ދުވަހު ރިލީޒްކުރާ ވަކިން ލޯބިންގެ ލީޑް ތަރިންގެ ގޮތުގައި ފެންނާނީ ޖުމައްޔިލް ނިމާލް އަދި މަރިޔަމް މަޖުދާ އެވެ.
މީގެ އިތުރުން ނުޒުހަތު ޝުއައިބު، ހަދީޖާ އިބްރާހިމް (ކުޑަހައްޖަ)، އަހުމަދު ސުނީ، އާދަމް ރިޒްވީގެ އިތުރުން މޯލްޑިވިއަން އައިޑަލްގެ ފުރަތަމަ ސީޒަނުން ފެނުނު އިބްރާހިމް އަމަން ވެސް މި ފިލްމުން ފެނިގެންދާނެ އެވެ.
ފިލްމުގެ ޕްރޮމޯޝަނަލް ލަވަ "ޕަރީ" މިމަހު 18ގައި ރިލީޒްކުރާނެ އެވެ. ލަވަ ކިޔާދީފައި ވަނީ ޝައްމޫން މުހައްމަދު (ޝައްމު) އެވެ. ލަވައިގެ ވީޑިއޯގައި ފެންނާނީ ޝައްމުގެ ބެންޑް އީކުއޭޓިކް ވައިބް އެވެ. ޝައްމުގެ "ތިއްތި މާ" ވަނީ ޑާކްރެއިންގެ ފިލްމު، މީ ލޯތްބަކީގެ ތީމް ލަވައިގެ ގޮތުގައި ހިމަނައިފަ އެވެ.
https://soundcloud.com/mogerdre2/paree
އެ ފިލްމުގައި އަމިއްލަ ރާގުގެ ލަވަތައް ހިމެނޭއިރު މޯލްޑިވިއަން އައިޑަލް ސީޒަން ދޭއްގެ ރަނައަޕް ހަމޫދުގެ އަޑުން ކިޔާދީފައިވާ "ހިތުގަ ނަށާ ރާނީ" ވެސް ހިމެނެ އެވެ.
ޑާކްރެއިންގެ ފިލްމުތަކަށް އާންމުކޮށް ލަވަ ކިޔައިދޭ ފަތުހުﷲ އަބްދުލް ފައްތާހު (ފަތޯ)ގެ އަޑުންއިވިގެންދާ ލަވަ "ބީވީމާ"ވެސް އެ ފިލްމުގައި ހިމެނެ އެވެ.
މީގެ އިތުރުން ސްކޯޒް އޮފް ފްލެއާގެ މަޝްހޫރު ލަވަ "ލޯބިން" އަދި "ރަންކޮކާލާ" އަކީ ވެސް އެ ފިލްމުގައި ހިމެނޭނެ ދެލަވައެކެވެ.
ވަކިން ލޯބިންއަށް ފަހު، ޑާކްރެއިންގެ "ގޮށްރާޅު" އޭޕްރީލް ފަހެއްގައި ސްކްރީން ކުރާނެ އެވެ.
ޑާކްރެއިނުން 2016 ވަނަ އަހަރު އެޅުވި ވާށޭ މަށާ އެކީ ވަނީ އެންމެ ފަހުން ބޭއްވި ފިލްމް އެވޯޑްގައި ބޮޑު ކާމިޔާބީއެއް ހޯދައިފަ އެވެ.