13 Jan 2018, 22:13
ބާސެލޯނާއަށް ކުޅެމުންދިޔަ ތުރުކީގެ މިޑްފީލަޑަރު އާޑާ ޓުރާން ދެ އަހަރު ދުވަހުގެ ލޯން އެއްބަސްވުމެއްގައި އެޓީމު ދޫކޮށް އުފަން ގައުމުގެ އިސްތަމްބޫލް ބަސަކްސެހީރަށް ބަދަލުވެއްޖެއެވެ.
ބާސާއާއި މި ސީޒަންގައި ހަވާލުވި އާނަސްޓޯ ވަލްވާޑެގެ އިރުޝާދުގެ ދަށުން އެޓީމު ކުޅުނު އެއްވެސް މެޗެއްގައި ޓުރާން ކުޅެފައެއް ނުވެއެވެ.
މީގެ ދެ ސީޒަން ކުރިން އެތުލެޓިކޯ މެޑްރިޑުން ބާސާއަށް ބަދަލުވި ޓުރާން އެ ކްލަބަށް ކުޅެފައިވާ 55 މެޗުގައި 15 ގޯލް ޖަހާފައިވެއެވެ.
އެތުލެޓިކޯ މެޑްރިޑުގައި ޓުރާންވަނީ ގިނަ ކާމިޔާބީތަކެއް ހޯދާފައެވެ. އެގޮތުން އޭނާވަނީ އެ ކްލަބާއެކު ލަލީގާ އުފުލާލުމުގެ އިތުރުން ޔޫރޮޕާ ލީގުވެސް އުފުލާލާފައެވެ. އެ ކުލަބަށް 127 މެޗު ކުޅެދިން ޓުރާންވަނީ އެތުލެޓިކޯއާއެކު ޗެމްޕިއަންސް ލީގުގެ ފައިނަލަށްވެސް ދަތުރު ކޮށްފައެވެ.
ބާސާގައި ގިނަ މެޗުތަކެއް ނުކުޅުނު ނަމަވެސް ޓުރާންވަނީ ކާމިޔާބީތަކެއް ހޯދާފައެވެ. އެގޮތުން އެ ކުލަބާއެކު 2016 ވަނަ އަހަރު ލަލީގާ އުފުލާލުމުގެ އިތުރުން އޭނާވަނީ ދެފަހަރެއްގެ މަތިން ސުޕެނިޝް ކަޕުވެސް އުފުލާލާފައެވެ.
ދެހާސް ފަސްވަނަ އަހަރު ތުރުކީގެ ގަލަޓަސަރާއީން ސީނިއަރު ކެރިއަރު ފެށި ޓުރާންވަނީ އެ ކްލަބާއެކު ހަ ސީޒަން ހޭދަކޮށްފައެވެ.
ތުރުކީގެ އިސްތަމްބޫލް ބަސަކްސެހީރަކީ ވޭތުވެދިޔަ ސީޒަންގައި ތުރުކީ ސުޕަ ލީގާއި ލީގު ކަޕުގެވެސް ދެވަނައެވެ.