12 Jan 2018, 13:56
އަމީން އަންސާރީ އާއި އޭނާގެ އަންހެނުން އުމްރާއަށް ދިޔައީ އެމީހުންގެ ހަތް އަހަރުގެ ދަރިފުޅު ޒައިނަބު، ގާތްތިމާގެ މީހެއްގެ ގާތުގައި ބަހައްޓާފައެވެ. ނަމަވެސް އުމްރާގެ އަޅުކަމުގައި ތިއްބައި އެމީހުންނަށް ލިބިގެން ދިޔައީ މަޔަކާއި ބަފަޔަަކަށް ލިބިގެންދާނެ އެންމެ ވޭންދެނިވި ހަބަރެވެ. އެމީހުންގެ ކުޑަ ދަރިފުޅު ގެއްލިގެން ހޯދަމުން ދަނިކޮށް މަރާލާފައި އޮއްވާ ފެނުނު ހަބަރެވެ.
ޒައިނަބު ވަގަށް ނެގުމާއި މަރު
ޕާކިސްތާނުގެ ކަސޫރުގައި ބޮޑުދައިތައެއްގެ ކައިރީ ހުރި ޒައިނަބު ގެއްލުނީ މިމަހުގެ ހަތަރެއްގައި، އޭނާގެ ގެއާ 100 މީޓަރަށް ވުރެ ދުރު ނޫން ހިސާބެއްގައި ހުންނަ ގުރުއާން ކްލާހަކަށް ދިޔަ ފަހުންނެވެ. ޒައިނަބު އެދުވަހު އެނބުރި ގެއަށް ނައުމުން އާއިލާއިން ޒައިނަބު ހޯދުމުގެ މަސައްކަތް ފެށިއެވެ. އަދި ޖެހިގެން އައި ދުވަހު މައްސަލަ ފުލުހުންނަށްވެސް ހުށަހެޅި އެވެ.
ޒައިނަބު ގެއްލުނު ދުވަހު ފިރިހެނެއްގެ އަތުގައި ހިފައިގެންދާ މަންޒަރު ސީސީޓީވީ ފުޓެޖުން ވަނީ ފެނިފައި --
ނަމަވެސް ހަތަރު ދުވަސް ވެގެން ދިޔައީ ޒައިނަބުގެ ހަބަރެއް ނުވެއެވެ. އަދި ފަސް ވަނަ ދުވަހު މުޅި ޕާކިސްތާނަށް ސިހުން ލިބިގެން ދިޔައީ ޒައިނަބަށް އަނިޔާކޮށް މަރާލާފައިވާ ހަށިގަނޑު، އޭނާގެ ގެކައިރީގައި ހުރި ކުނިގޮނޑަކުން ފެނުމުންނެވެ.
ޒައިނަބުގެ އާއިލާގެ އުދާސްތަކާއި ޝަކުވާ
ގިނަ އަދަދެއްގެ މީހުން ބައިވެރިވި، ޒައިނަބުގެ ޖަނާޒާ ބާއްވާފައި ވަނީ މިދިޔަ ބުދަ ދުވަހު އޭނާގެ މައިންބަފައިން އެނބުރި ޕާކިސްތާނަށް ދިޔުމުންނެވެ.
"އަހަރެންނަށް ކުރެވޭ ހިތާމަ އިބާރަތް ކުރެވޭނެ ގޮތެއް ނެތް. ހީވަނީ ދުނިޔެ ނިމުމަކަށް އައިސްފައިވާ ހެން،" ޒައިނަބުގެ ބައްޕަ އަމީން ބުންޏެވެ.
ޒައިނަބުގެ ބައްޕަ އަމީން އަންސާރީ ވަނީ ދަރިފުޅުގެ މަރުގެ މައްސަލަ ބެލުމުގައި ފުލުހުން އިހުމާލުވެފައިވާ ކަމަށް ބުނެފައި -- ފޮޓޯ: ބީބީސީ
ޕާކިސްތާނަށް ދިޔުމަށް ފަހު އެއާޕޯޓުގައި ހުރެ ނޫސްވެރިންނާ ވާހަކަ ދައްކަމުން ޒައިނަބުގެ މަންމަ ވަނީ އޭނާގެ ދަރިފުޅަށް އިންސާފު ހޯދައިދިނުމަށް ގޮވާލާފައެވެ.
"އަހަރެންގެ ޒައިނަބު ވަނީ ގެއްލިފައި. އަހަންނަށް ބޭނުން ވަނީ އިންސާފު،" ނަން ހާމަކޮށްފައި ނުވާ ޒައިނަބުގެ މަންމަ ބުންޏެވެ.
މީގެ އިތުރުން ޒައިނަބުގެ އާއިލާއިން ވަނީ ފުލުހުން އެމައްސަލަ ބެލި ގޮތާ ބެހޭ ގޮތުން ނުރުހުން ފާޅުކޮށްފައެވެ. އެގޮތުން ޒައިނަބު ގެއްލުނު ދުވަހު އެކުއްޖާގެ އަތުގައި ހިފައިގެން ފިރިހެނަކު ދާ މަންޒަރު ފެންނަ ސީސީޓީވީ ފުޓެޖަކީވެސް އާއިލާއިން ހޯދި އެއްޗެއް ކަމަށް އަމީން ބުންޏެވެ.
"އަހަރެންގެ ތިމާގެ މީހުންނާއި އަވަށްޓެރިން ބުނި ގޮތުގައި ފުލުހުން އެގެތަކަށް ގޮސް ކާލައިގެން ދަނީ. އެމީހުން އެއްވެސް ކަމެއް ނުކޮށް ތިއްބައި، އަހަރެންގެ އެކުވެރިންނާއި އާއިލާއިން ދިޔައީ ދަރިފުޅު ހޯދުމަށް ރެއާއި ދުވާލު މަސައްކަތް ކުރަމުން،" އަމީން ބުންޏެވެ.
އަދި ޒައިނަބު ގެއްލުނު މައްސަލަ ރިޕޯޓު ކުރުމާ އެކު ފުލުހުން ފިޔަވަޅު އެޅި ނަމަ އެމީހުންނަށް ދަރިފުޅު ހޯދޭނެ ކަމަށްވެސް އަމީން ބުންޏެވެ.
ޒައިނަބުގެ މަރުގެ ތަހުގީގު
ޒައިނަބުގެ ޕޯސްޓްމޯޓަމް ހެދި ޑިސްޓްރިކްޓް ހެޑްކުއާޓާސް ހޮސްޕިޓަލާ ހަވާލައިދީ ޕާކިސްތާނުގެ ޑޯން ނޫހުގައިވާ ގޮތުން ޒައިނަބު މަރާލާފައި ވަނީ ނޭވާ ހާސްކޮށްލައިގެންނެވެ. އަދި ޒައިނަބު ރޭޕްކޮށް އަނިޔާކޮށްފައިވާކަމުގެ ނިޝާންތައް ފެނިފައިވާ ކަމަށާއި އެކުއްޖާގެ ހަށިގަނޑު ފެނިފައި ވަނީ މަރުވިތާ ދޭއް ނުވަތަ ހަތަރު ދުވަސް ފަހުން ކަމަށް ލަފާ ކުރެވޭ ކަމަށްވެސް އެ ނޫހުން ރިޕޯޓުކުރެއެވެ.
ޒައިނަބުގެ ޖަނާޒާގައި ޕާކިސްތާނުގެ ގިނަ އަދަދެއްގެ މީހުން ބައިވެރިވި -- ފޮޓޯ: އޭޕީ
ޒައިނަބުގެ މަރު ތަހުގީގު ކުރުމަށް ޕަންޖާބުގެ ޗީފް މިނިސްޓަރު ޝެހްބާޒް ޝަރީފް ވަނީ އިންޓެލިޖެންސް އޮފިޝަލުން ހިމެނޭ ހާއްސަ ޖޮއިންޓް އިންވެސްޓިގޭޝަން ޓީމެއް އެކުލަވާލައްވާފައެވެ. އަދި ޒައިނަބު މަރާލި މީހަކު ހޯދުމުގައި އެހީތެރިވާ މީހަކަށް 10 މިލިއަން ރުޕީސް (90،000 ޑޮލަރު)ގެ އިނާޔަތެއް ހުށަހަޅާފައެވެ.
ކަސޫރުގައި ފާއިތުވި ދެ އަހަރުގެ ތެރޭ ވަނީ ރޭޕްކޮށް މަރާލާފައިވާ 12 ކުޑަކުއްޖެއްގެ މައްސަލަ ފެންމަތިވެފައެވެ. އަދި އޭގެ ތެރެއިން ފަސް މަރެއްގެ އިނގިލި ދިއްކުރެވެނީ އެކަކަށް ކަމަށާއި އޭނާ ހޯދުމުގެ މަސައްކަތް މިހާރު ކުރަމުން އަންނަ ކަމަށް ޕަންޖާބުގެ ފުލުހުން ބުންޏެވެ.
ޕާކިސްތާނުގައި ރުޅިވެރިކަން
ޒައިނަބުގެ މަރުގައި ފުލުހުންގެ އިހުމާލުވާ ކަމަށް ބުނެ ފާއިތުވި ތިން ދުވަހު ޕާކިސްތާނުގައި ގިނަ އަދަދެއްގެ މީހުން ވަނީ މުޒާހަރާކޮށްފައެވެ. އެމުޒާހަރާތަކުގައި ބައެއް މީހުން ވަނީ ސަރުކާރުގެ ބައެއް އޮފީސްތަކާއި، މަޖިލީސް މެމްބަރެއްގެ އޮފީހެއްގައި ހުޅުޖަހައި، ގެއްލުންދީފައެވެ. އަދި އެހަމަނުޖެހުންތައް ހުއްޓުވުމުގެ ގޮތުން ފުލުހުން މުޒާހަރާގެ ބައިވެރިންގެ ގަޔަށް ބަޑި ޖެހުމާ ގުޅިގެން ދެމީހަކު ވަނީ މަރުވެފައެވެ.
ޕާކިސްތާނުގެ އިތުރުން ދުނިޔޭގެ ގިނަ އަދަދެއްގެ މީހުން ވަނީ ޒައިނަބަށް އިންސާފު ހޯދައި ދިނުމަށް ގޮވާލާފައެވެ. އަދި ޒައިނަބަށް އިންސާފު ހޯދައިދިނުމަށް ގޮވާލާ ހޭޝްޓެގް ވަނީ ޓުވިޓާގައި ޓްރެންޑިން ލިސްޓަށް އަރާފައެވެ.