11 Jan 2018, 19:32
ދިވެހިރާއްޖެއާ އިންޑިއާއާ ދެމެދު އޮންނަ ގުޅުން އަބަދުވެސް އޮންނާނީ ބަދަހިކަންމަތީގައި ކަމަށާއި ކުރިއަށް އޮތްތަނުގައި އެކިއެކި ދާއިރާތަކުން ރާއްޖެއަށް ދެމުންގެންދާ އެހީތައް މިހާރަށް ވުރެ ވަރުގަދަ ކުރައްވާނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
މޯދީ މިހެން ވިދާޅުވީ މިހާރު އިންޑިއާއަށް ވަޑައިގެން އުޅުއްވާ ރައީސުލްޖުމްހޫރިއްޔާގެ ޚާއްސަ މަންދޫބު، ފޮރިން މިނިސްޓަރު ޑރ. މުހައްމަދު އާސިމާ ބައްދަލުކުރައްވައި ދެއްކެވި ވާހަކަފުޅުގައެވެ.
އެބައްދަލު ކުރެއްވުމަގައި މޯދީ ވިދާޅުވީ ރާއްޖެއަކީ އަބަދުވެސް އިންޑިއާގެ ގާތް ރަހުމަތްތެރިއެއް ކަމަށާއި ކުރިއަށް އޮތް ތަނުގައިވެސް އެ ގުޅުން އޮންނާނީ އެގޮތުގައި ކަމަށެވެ.
އެ ބައްދަލު ކުރެއްވުމުގައި ފޮރިން މިނިސްޓަރު ޑރ. އާސިމް ވަނީ ރާއްޖެއާ އިންޑިއާއާ ދެމެދު އޮތް ތާރީހީ ގުޅުން އިތުރަށް ވަރުގަދަ ކުރުމާ ގުޅޭ ގޮތުން ވާހަކަފުޅު ދައްކަވާފައެވެ. އަދި ރާއްޖޭގެ އުމްރާނީ ތަރައްގީއަށް އިންޑިއާއިން ވެދެއްވަމުން ގެންދަވާ އެހީތެރިކަންވެސް ވަނީ ފާހަގަ ކުރައްވާފައެވެ. މީގެ އިތުރުން ރައީސް އަބްދުﷲ ޔާމީން އަބްދުލްގައްޔޫމްގެ "އިންޑިއާ ފަސްޓް ޕޮލިސީއާ" ގުޅޭ ތަފްސީލްތައްވެސް ޑރ. އާސިމް ވަނީ ބޮޑުވަޒީރު މޯދީއާ ހިއްސާ ކުރައްވާފައެވެ.
ޑރ. އާސިމް މިއަދު އިންޑިއާގެ ބޮޑު ވަޒީރާ ބައްދަލު ކުރެއްވި އިރު އޭނާ ވަނީ، އިންޑިއާގެ އެކްސްޓާނަލް އެފެއާޒް މިނިސްޓަރު ސުޝްމާ ސުވަރާޖްއާ ބައްދަލުކުރައްވާފައެވެ. އަދި އެދެބޭފުޅުން ވަނީ އިންޑިއާ ފަސްޓްް ޕޮލިސީއާއި ނެއިބާހޫޑް ފަސްޓް ޕޮލިސީއާ ގުޅޭގޮތުން މަޝްވަރާކުރައްވާފައެވެ.
ޑރ. އާސިމް އިންޑިއާއަށް މިކުރައްވާ ދަތުރުފުޅަކީ ތިން ދުވަހުގެ މުއްދަތަކަށް ކުރައްވަމުން ގެންދަވާ ދަތުރުފުޅެކެވެ. ފޮރިން މިނިސްޓްރީން ބުނީ މިނިސްޓަރުގެ އެ ދަތުރުފުޅުގައި ފޮރިން ސެކްރެޓަރީ އަހުމަދު ސަރީރާއި ފޮރިން މިނިސްޓްރީގެ ޖޮއިންޓް ސެކްރެޓަރީ އާއިޝަތު އަޒީމާ ބައިވެރިވެލައްވާނެކަމަށެވެ.
ފޮރިން މިނިސްޓަރު އިންޑިއާ އަށް ދަތުރުފުޅެއް ކުރައްވަނީ އިންޑިއާ އާއި ރާއްޖެއާ ދެމެދު އޮންނަ ގުޅުމާ ގުޅޭ ގޮތުން އިންޑިއާގެ ނޫސްތަކުން، ރާއްޖެއިން އިންޑިއާ އަށް ކަނޑައަޅާފައި ހުންނަވާ ސަފީރު އަހުމަދު މުހައްމަދާ ސުވާލުތަކެއް ކުރިމަތިކުރުވާފައިވާ ދުވަސްވަރެއްގައެވެ. މި ދުވަސްވަރަކީ ޗައިނާ އާ ރާއްޖެއާ ދެމެދު އޮންނަ ގާތް ގުޅުމާގުޅިގެން އިންޑިއާގެ މީޑިއާގައިވެސް ތަފާތު ވާހަކަތައް ދެކެވެމުން އަންނަ ދުވަސްވަރެކެވެ.