10 Jan 2018, 09:43
ބޮލީވުޑްގެ މަޝްހޫރު ބަތަލާ ސޯނަމް ކަޕޫރު އަންނަ އޭޕްރިލް މަހު ކައިވެނިކުރަން ހަމަޖެހިފައިވާ ކަމަށް ބޭރުގެ ހަބަރުތައް ބުނެފިއެވެ.
ސޯނަމް ކަޕޫރު އަދި އިންޑިއާގެ ވިޔަފާރިވެރިޔާ އާނަންދު އަހޫޖާ، ލޯބީގެ ގޮތުން ގުޅިގެން އުޅޭތާ ގިނަ ދުވަސްތަކެއް ވެފައިވާ އިރު، އެ ދެތަރިންނަށް މީޑިއާގެ ލޯ ވަނީ ވަރަށް ބޮޑަށް އަމާޒުވެފައެވެ.
ސޯނަމްއާއި އާނަންދުގެ ކައިވެންޏަށް ދެފަރާތުގެ އާއިލާވެސް ގަބޫލު ވުމާ ގުޅިގެން އަންނަ އޭޕްރިލް މަހު ކައިވެނި ކުރަން ހަމަޖެހިފައިވާ ކަމަށާއި އަދި މިހާރު ކައިވެނީގެ ތައްޔާރީތައް ވަމުން އަންނަ ކަމަށްވެސް މީޑިއާ ރިޕޯޓްތައް ބުނެއެވެ.
ކައިވެނީގެ ރަސްމިއްޔާތުގައި 300 އެއްހާ މީހުން ބައިވެރިވާނެކަމަށް މީޑިއާ ރިޕޯޓްތައް ވަނީ ބުނެފައެވެ.
އެކަމާ ގުޅޭ ގޮތުން ސޯނަމްއާ ސުވާލު ކުރުމުން އޭނާ ބުނީ، އޭނާގެ މިވީ ދިހަ އަހަރުގެ ފިލްމީ ކެރިއަރުގައި އަމިއްލަ ދިރިއުޅުމުގެ ވާހަކައެއް ދައްކާފައި ނުވާނެކަމަށާއި އެފަދަ ވާހަކައެއް ދައްކަންވެސް ބޭނުން ނުވާ ކަމަށެވެ.
ދާދި ފަހުން އިންޑިއާގެ ކްރިކެޓު ކުޅުންތެރިޔާ ވިރާޓް ކޯލީ އަދި ބޮލީވުޑްގެ ބަތަލާ އަނުޝްކާ ޝަރްމާ ވެސް ވަނީ ކައިވެނިކޮށްފައެވެ.