06 Jan 2018, 18:27
ސިނާއީ ސަރަހައްދުގައި ސްޓެލްކޯއިން އިމާރާތްކުރާ އައު އިންޖީނުގޭގެ މަސައްކަތް، އެ ސަރަހައްދުން ބިން ލިބުނުހާ އަވަހަކަަށް ފަށާނެ ކަމަށް ސްޓެލްކޯއިން ބުނެފިއެވެ.
ދައުލަތުގެ މީޑިއާއަށް މައުލޫމާތު ދެމުން ސްޓެލްކޯއިން ބުނީ، އެ ސަރަހައްދުގައި ހަދާ އިންޖީނުގޭގެ "ޑިޒައިނިންގ" މަސައްކަތް މިހާރު ނިމިފައިވާ ކަމަށާއި ބިމެއް ހޯދަން ރައީސުލްޖުމްހޫރިއްޔާގެ އޮފީހަށް ހުށަހަޅާފައިވާ ކަމަށެވެ.
ސްޓެލްކޯއިން މާލެއަށް ފޯރުކޮށްދެމުންދާ ކަރަންޓުގެ ހިދުމަތުގެ ފެންވަރު ރަނގަޅު ކުރުމަށް ކުރަމުންދާ މަސައްކަތުގެ ތެރެއިން މިއަހަރު ކުރިއަށްގެންދިއުމަށް ރާވާފައިވާ އެންމެ ބޮޑު މަޝްރޫއަކީ ސިނާއީ ސަރަހައްދުގައި ހަދާ އިންޖީނުގެ ކަމަށް އެ ކުންފުނިން ވަނީ ބުނެފައެވެ.
އަލަށް ހަދާ އިންޖީނުގެއިން 25 މެގަވޯޓްގެ ކަރަންޓު އުފައްދާނެ ކަމަށް ސްޓެލްކޯއިން ބުނެއެވެ. އަދި އެ އިންޖީނުގޭގައި އަށް މެގަވޯޓްގެ ތިން ޖަނަރޭޓަރު ބަހައްޓާނެ ކަމަށްވެސް އެ ކުންފުނިން ވަނީ ބުނެފައެވެ.
ސްޓެލްކޯއިން ކުރިއަށްގެންދާ މި މަޝްރޫއަށް 550 މިލިއަން ރުފިޔާ ހަރަދުކުރަން ހަމަޖެހިފައިވާ އިރު 2019 ވަނަ އަހަރުގެ ތެރޭގައި އެ މަޝްރޫއު ނިންމުމަށް ވަނީ ހަމަޖެހިފައެވެ.
ސްޓެލްކޯއިން ބުނީ، އައު އިންޖީނުގެއެއް މާލޭގައި އެޅުމުގެ އެންމެ މުހިންމު ބޭނުމަކީ ކަރަންޓު ކެނޑުމުގެ ސަބަބުން މިހާރު މާލޭ ރައްޔިތުންނަށް ކުރިމަތިވަމުންދާ ދަތިތައް ހައްލުކޮށް ދެމެހެއްޓެނިވި ގޮތެއްގައި އެ ހިދުމަތް ފޯރުކޮށްދިިނުން ކަމަށެވެ.