05 Jan 2018, 11:26
ވޮޝިންގްޓަން (04 ޖެނުއަރީ): އެމެރިކާގެ ރައީސް ޑޮނަލްޑް ޓްރަމްޕް ނިއުކުލިއާ ބަޓަންއާ ބެހޭ ގޮތުން ދެއްކެވި ވާހަކަތަކަށް ބޮޑެތި ފާޑުކިޔުންތަކެއް އަމާޒުވެ، ޓްރަމްޕްގެ ސިކުނޑި ހަމަޖެހޭތޯ އެމެރިކާގެ ރައްޔިތުން ސުވާލުކުރުމަށްވުރެ، އުތުރު ކޮރެއާގެ ލީޑަރުގެ ސިކުނޑި ހަމަޖެހޭތޯ ސުވާލުކުރުން މުހިންމު ކަމަށް ވައިޓް ހައުސް އިން ބުނެފި އެވެ.
ވައިޓް ހައުސް އިން ނެރުނު ބަޔާނެއްގައި ބުނީ، އުތުރު ކޮރެއާ އިން ކިތަންމެ އިންޒާރުތަކެއް ދިން ކަމުގައި ވިޔަސް، ޓްރަމްޕް އުތުރު ކޮރެއާއާ ދެކޮޅަށް ސާބިތުވެ ހުންނަވާނެ ކަމަށެެވެ.
"އުތުރު ކޮރެއާގެ ލީޑަރު ވަނީ ކެނޑިނޭޅި އިންޒާރުދީ މިސައިލް ޓެސްޓު ކޮށްފައި. ޓްރަމްޕަކީ ދޫދެއްވާނެ ރައީސެއް ނޫން. އަދި އެހާ ބަލިކަށި ރައީސެއް ވެސް ނޫން. އެމެރިކާގެ ރައްޔިތުން ހިމާޔަތް ކުރަން ކުރެވެން އޮތް ހުރިހާ ކަމެއް ޓްރަމްޕް ކުރައްވާނެ،" ވައިޓް ހައުސް އިން ބުންޏެވެ.
އުތުރު ކޮރެއާގެ ލީޑަރު ކިމް ޖޮންގް އުންގެ ޑެސްކުގައި އަބަދުވެސް ނިއުކުލިއާ ބަޓަނެއް އިންނަ ކަމަށް ވިދާޅުފައިވާތީވެ، އެކަމަށް ރައްދު ދެއްވައި ޓްރަމްޕް ވަނީ އެމަނިކުފާނުގެ ޑެސްކުގައި ވެސް ނިއުކުލިއާ ބަޓަނެއް އިންނަ ކަމަށާއި އޭގެ ބާރުވެސް މާ ވަރުގަދަވާނެ ކަމަށް އިއްޔެ ކުރި ޓުވީޓެއްގައި ވިދާޅުވެފަ އެވެ.
ޓްރަމްޕްގެ ޓުވީޓާ ގުޅިގެން ވަރަށް ގިނަ މީހުން ދަނީ މިއީ ވަރަށް ނުރައްކާތެރި ކަމެއް ކަމަށް ބުނެ ޓްރަމްޕަށް ފާޑު ކިޔަމުންނެވެ.
އެމެރިކާގެ ކުރީގެ ނައިބު ރާއިސް ޖޯ ބިޑަން ވިދާޅުވީ، ދުނިޔޭގެ އެކި ކަންތައްތަކުގައި އެމެރިކާގެ ހާއްސަ ދައުރެއް އޮންނަ ކަމަށާއި ނަމަވެސް ޓްރަމްޕްގެ ފަރާތުން އެއްވެސް ވަރެއްގެ ކަންބޮޑުވުމެއް ނުފެންނަ ކަަމަށެވެ. އަދި މިއީ ކުޅޭކުޅޭ ކުޅިވަރެއް ނޫން ކަމަށް ބިޑަން ވިދާޅުވި އެވެ.
އެމެރިކާގެ ސެނެޓުގެ މެމްބަރެއް ކަމަށްވާ އެޑްވާޑް މާކީ ވިދާޅުވީ، ޓްރަމްޕްގެ އެ އަމަލުގެ ސަބަބުން މަޝްރަހު އިތުރަށް ގޯސްވެ ޑިޕްލޮމެޓިކް ގޮތުން އެ މައްސަލަ ހައްލުކުރަން އޮތް ފުުރުސަތު ބޭކާރުވެގެން ހިނގައްޖެ ކަމަށެވެ.
އުތުުރު ކޮރެއާގެ ލީޑަރު އާ އަހަރާ ގުޅިގެން ދެއްވި ހިތާބުގައި ވިދާޅުވީ، އެ ގައުމުގެ ނިއުކުލިއާ ހަތިޔާރު އެމެރިކާގެ ހުރިހާ ސަރަހައްދުތަކަށް ވެސް ފޯރާނެ ކަމަށާއި އަދި ނިއުކުލިއާ ބަޓަން އަބަދުވެސް އޭނާގެ ޑެސްކުގައި އިންނަ ކަމަށެވެ.
މަސްދަރު: ރޮއިޓާސް