01 Jan 2018, 18:21
މިއަހަރު ފެންނަ އެންމެ ފުރަތަމަ ސުޕަމޫން މިރޭ ފެންނާނެއެވެ.
މިރޭ ފެންނަ ސުޕަމޫނަކީ އަހަރު ތެރޭގައި ފެންނާނެ އެންމެ ފުރިހަމަ ސުޕަމޫނެވެ. އެހެން ފުލްމޫންތަކާ އަޅާބަލާއިރު މިރޭ ހަނދު ފެންނަ އިރު އަލިގަދަވެފައި ބޮޑުވާނެއެވެ.
މިމަހުގެ 31 ގައިވެސް ސުޕަމޫނެއް ފެންނާނެއެވެ. އެރޭ ފެންނާނީ "ބްލޫ މޫން" އެކެވެ. އެއީ މަސް ތެރޭ އަންނަ ދެވަނަ ފުލްމޫން ކަމަށްވާތީއެވެ. މީގެ އިތުރުން މި މަހުގެ 31 ވަނަ ދުވަހުގެރޭ ހަނދު ކޭތައެއްވެސް ހިފާނެއެވެ.
ހަނދު ދުނިޔޭގެ ވަށައިގެން ބިސްބުރެއްގެ ސިފައިގައިވާ އޯބިޓެއްގައި ދަތުރުކުރަމުންދާއިރު ބައެއް ދުވަސްވަރަކަށް ދުނިޔޭގެ ބިމާ ގާތްވެ އަނެއްބައި ދުވަސްވަރަކަށް ދުނިޔެއާ ދުރުވެއެވެ. ދުނިޔެއާ ދުރުވާދުވަސްވަރު ހަނދު ފެންނާނީ ކުޑަކޮށެވެ. އަދި ދުނިޔެއާ ގާތްވާދުވަސްވަރު ހަނދު ފެންނާނީ ބޮޑުކޮށެވެ. ސުޕަމޫންގެ ގޮތުގައި ހަނދު ފެންނައިރު ހަނދު އާންމުކޮށް ހުންނަވަރަށްބުރެ 12 ހާސް މޭލު ދުނިޔޭގެ ބިމާގާތްވާނެއެވެ.
ހަނދާއި ދުނިޔޭގެ ބިމާދެމެދުގައިވާ ދުރުމިނަކީ ދެލައްކަ ތިރީސް އަށްހާސް މޭލު ކަމަށްވިޔަސް މިއީ އަބަދު އެއްވަރެއްގައި ހުންނަ ދުރުމިނެއްނޫނެވެ.