31 Dec 2017, 22:51
ގޮންޖެހުންތަކާ ކުރިމަތިލައި، ކަންކަން ހަމަމަގަށް އެޅުވިފައިވުމަކީ ލިބޭ އެންމެ ބޮޑު ހިތްހަމަޖެހުން ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެެވެ.
މީލާދީ އާ އަހަރު ފެށުމުގެ މުނާސަބަތާ ގުޅިގެން ރައީސް ޔާމީން ދެއްވި ހިތާބުގައި ވިދާޅުވީ، ފާއިތުވެދިޔަ އަހަރު ސަރުކާރުން ތަފާތު އެތަކެއް މަޝްރޫއުތަކެއް ހިންގައި އެތަކެއް ވަޒީފާތަކާއި ތައުލީމުގެ ފުރުސަތުތައް ދިވެހިންނަށް ހޯދައިދީފައިވާ ކަމަށެވެ.
އަދި މިދިޔަ އަހަރު ދިމާވި ތަފާތު ގޮންޖެހުންތަކާއެކު ވެސް ގައުމުގެ ކަންތައްތައް ހަމައަކަށް އަޅުވައި، އެކި ކަންކަމުގައި ހައްލު ހޯދައިދީފައިވުމަކީ ލިބޭ އެންމެ ބޮޑު ހިތްހަމަޖެހުން ކަމަށް ރައީސް ޔާމީން ވިދާޅުވިއެވެ.
"މިއަދު އަޅުގަނޑަށް ލިބޭ އެންމެ ބޮޑު ހިތްހަމަޖެހުމަކީ، ސާބިތުވެތިބެ އެ ގޮންޖެހުންތަކާ ކުރިމަތިލައި، ކާމިޔާބީގެ އައްސޭރިއަށް ވާސިލުވުމަށް މަގުފަހިކޮށްދީ، އެތައް ގޮތަކުން ގައުމުގެ ކަންކަން ހަމަމަގަށް އެޅުވިފައިވާކަމުގެ ހިތްހަމަޖެހުމެވެ. ހަމަ ޔަގީނުންވެސް ގައުމެއް ހިންގުމުގައި ސަރުކާރަކަށް ލިބޭނެ އެންމެ ބޮޑު ކާމިޔާބީއަކީ، ގައުމުގައި ދިމާވާ އެކިއެކި މައްސަލަތަކާ އީޖާބީ ގޮތެއްގައި ކުރިމަތިލައި، ދަތި އުނދަގޫތަކުގެ ތެރެއިން ނަމަވެސް އެކަންކަމުގެ ހައްލު ހޯދައިދެވުނުކަމުގެ ހިތްހަމަޖެހުމެވެ..،" ރައީސްގެ ހިތާބުގައި ވިދާޅުވެފައިވެއެވެ.
ރައީސް ވިދާޅުވީ، ސަރުކާރުން މަސައްކަތްކުރަނީ އަންނަ އަހަރަކީ މިހާތަނަށް އެންމެ ކާމިޔާބު އަހަރު ކަމަށް ހެދުމަށް ކަމަށާއި އެގޮތުން ސަރުކާރުން ފަށާފައިވާ ތަރައްގީގެ ބޮޑެތި މަޝްރޫއުތައް އަންނަ އަހަރު ނިންމުމަށް އަތުކުރި އޮޅާލާފައިވާ ކަމަށެވެ. އަދި ސަރުކާރުގެ މެނިފެސްޓޯގެ ހުރިހާ ކަމެއް އަންނަ އަހަރު ހާސިލްކުރުމަށް، ބަޖެޓުގައި ވެސް ވަރަށް ބޮޑަށް އިސްކަންދީފައިވާ ކަމަށް ވެސް ރައީސް ވިދާޅުވިއެވެ.