31 Dec 2017, 10:41
ހަކުރު ބައްޔަކީ ދުނިޔޭގެ އެކި ކަންކޮޅުތަކުގައި ވެސް ވަރަށް އާންމު ބައްޔެކެވެ. ހަކުރު ބައްޔަކީ ލޭގައި ހަކުރުގެ މިންވަރު މަތިވުމުގެ ސަބަބުން މީހާ އަށް ޖެހޭ ނުރައްކާތެރި ބައްޔެކެވެ.
ހަކުރު ބައްޔަކީ އިންސާނާގެ ހަށިގަނޑަށް ނުރައްކާތެރި ބައްޔަކަށްވާއިރު އެ ބަލި ކޮންޓްރޯލް ކުރުމަށް ކުރެވިދާނެ ކަންތައްތައް ދަސްކުރަން ޖެހެ އެވެ.
ކެއުމުގައި ސަމާލުކަން ދިނުން
ކޮންމެ ގަޑިއަކު ކެއި ކަމުގައިވީ ނަމަވެސް ކެއުމަށް ހާއްސަ ސަމާލުކަމެއް ދިނުމަކީ މުހިއްމު ކަމެކެވެ. ހަކުރު ހިމެނޭ ބާވަތްތައް މަދުކޮށް ވިޓަމިންސްގެ ބައިތައް ގިނަ ކުރަން ޖެހެ އެވެ. ބަތް ކެއުން މަދުކޮށް އާޓާ ރޮށި ކެއުމަށް އާދަ ކުރަން ޖެހެ އެވެ. ވިޓަމިންސް އަދި މިނަރަލްސް ހިމެނޭ ބާވަތްތަށް ކެއުމުގައި ހިމަނަން ޖެހޭނެ އެވެ.
ކަސްރަތު ކުރުން
ކޮންމެ ދުވަހަކު ވެސް ވަކި ވަގުތުކޮޅެއް ކަސްރަތު ކުރުމަށް ހުސްކޮށްލާށެވެ. ކަސްރަތަކީ އޭގެ ޒާތުގައި ހަށިގަނޑުގައި ހުންނަ ލޭތަކުގައި ހިމެނޭ ހަކުރުގެ ލެވެލް ދަށްކޮށްދޭ ކަމެކެވެ. ޖިމަށް ނުދެވުނު ނަމަވެސް ގޭގައި ތިބެގެން ކަސްރަތުކޮށްލާށެވެ. ނޫނީ ކޮންމެ ދުވަހެއްގެ ވަގުތުކޮޅެއް ފަތަން ދިޔުމަށް ހުސްކޮށްލާށެވެ. އެކަމުގެ ސަބަބުން ހަކުރު ލެވެލް މެދުމިނެއްގައި ހިފަހައްޓައިދެ އެވެ.
ގަވާއިދުން ޑަކްޓަރަށް ދެއްކުން
ގަވާއިދުން ޑޮކްޓަރަށް ދައްކާ ބޮޑީ ޗެކަޕް ހެދުމަކީ ވަރަށް މުހިއްމު ކަމެކެވެ. ޑޮކްޓަރު ލަފާ ދެއްވާ ގޮތަށް ދިރިއުޅުން ބައްޓަންކޮށް ޑޮކްޓަރުދޭ ބޭސްތައް ގަވާއިދުން ބޭނުންކުރާށެވެ. އެއާ އެކު މަހަކު އެއްފަހަރު ނަމަވެސް ބޮޑީ ޗެކަޕެއް ހަދާށެވެ. އޭރުން ހަށިގަނޑަށް އަންނަ ބަދަލުތައް ރަނގަޅަށް ފެންނާނެއެވެ.
ފިކުރު ނުކުރުން
ދިރިއުޅުން ހުންނަ ގޮތުން ފިކުރުކުރުމަކީ އާންމު ކަމަކަށްވީ ނަމަވެސް ފިކުރު ކުރުމަކީ ހަކުރު ބައްޔަށް އޮތް ފަރުވާ އެއް ނޫނެވެ. ގިނައިން ފިކުރު ކުރާނަމަ ހަކުރު ބަލީގެ ނުރައްކާތެރިކަން ބޮޑުވެގެން ދެއެވެ. ފިކުރުކުރުން މަދުކުރަން އާދަކުރާށެވެ.
މައުލޫމާތު: ޑައިބެޓިކް ލިވިންގް، ހެލްތް ލައިން