30 Dec 2017, 10:10
އަންކަރާ (ޑިސެމްބަރު 30): އިސްލާމީ ދުނިޔެއަށް ބޭނުން ވަނީ އަމިއްލަ ނަފްސަށް ބަރޯސާވެގެން ހޯދާ ތަރައްގީ އާއި އިލްމާއި މަސައްކަތް ތެރިކަން ކަމަށާއި އެމެރިކާ އަށް ޑޮލަރުން ދުނިޔެ ގަނެނުލެވުނު ކަމަށް ތުރުކީގެ ރައީސް ރަޖަބް ތައްޔިބު އުރުދުޣާން ވިދާޅުވެއްޖެ އެވެ.
އަންކަރާގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން އުރުދުޣާން ވިދާޅުވީ ގުދްސާ ދެކޮޅަށް އެމެރިކާ ނިންމި ޣައިރު ގާނޫނީ ނިންމުމާދެކޮޅަށް އދ.ގެ ސަލަމާތީ މަޖިލީހުގައި ނެގި ވޯޓާއި ޖެނެރަލް އެސެމްބްލީގައި ނެގި ވޯޓުގައި އެމެރިކާ އެކަހެރިވެފައިވާ ކަމަށާއި ޑޮލަރު ބޭނުންކޮށްގެން ދުނިޔޭގެ ގައުމުތައް ގަނެލުމުގައި އެމެރިކާ މުޅިން ފޭލްވެފައިވާ ކަމުގަ އެވެ.
އދ.ގެ ދެމުއައްސަސާގައި ނެގި ވޯޓުގައި އެމެރިކާއާ ދެކޮޅަށް ދުނިޔޭގެ ހަތަރުބައިކުޅަ ތިންބައި ގައުމުން ވޯޓުދީފައި އެމެރިކާއާ އެއްކޮޅަށް އެންމެ ނުވަގައުމުން ވޯޓު ދިނުމަކީ ދުނިޔޭގައި އެމެރިކާއާއި އިސްރާއީލުގެ ބާރު ނެތްކަން ވަރަށް ސާފުކަން ބޮޑުގޮތެއްގައި އެނގިގެން ދިޔަ ކަމެއްކަމަށް ވެސް އުރުދުޣާން ވިދާޅުވި އެވެ.
ގުދްސަކީ އިސްރާއީލުގެ ވެރިރަށް ކަމަށް ހެދުމަށާއި އެމެރިކާގެ އެމްބަސީ ގުދްސަށް ބަދަލުކުރުމަށް އެމެރިކާ އިން ނިންމި ޣައިރު ގާނޫނީ ނިންމުމާދެކޮޅަށް އދ.ގެ ސަލަމާތީ މަޖިލީހުގައި ދާދިފަހުން ނެގި ވޯޓުގައި އެމަޖިލީހުގެ 15 މެންބަރުންގެ ތެރެއިން ސާދަ މެންބަރުން ވޯޓު ދީފައި ވަނީ އެމެރިކާއާ ދެކޮޅަށެވެ. އެވޯޓު އެމެރިކާ ކާމިޔާބު ކުރީ ޑިމޮކްރަސީ އާ ޚިލާފަށް އެމެރިކާއަށް ލިބިފައިވާ ވީޓޯގެ ބާރު ބޭނުންކޮށްގެންނެވެ.
ގުދްސުގެ މައްސަލާގައި އެމެރިކާއާ ދެކޮޅަށް ޖެނެރަލް އެސެމްބްލީގައި ވޯޓު ނެގުމުގެ ކުރިން އެމެރިކާގެ ރައީސް ޑޮނަލްޑް ޓްރަމްޕާއި އދ.ގައި ހުންނަވާ ޓްރަމްޕްގެ ހަރުކަށި މަންދޫބު ނިއްކީ ހޭލީ ވަނީ އެމެރިކާއާ ދެކޮޅަށް ވޯޓުދޭ ގައުމުތަކަށް އެމެރިކާގެ އެހީތައް ކަނޑާލާނެ ކަމުގެ އިންޒާރު ދީ ފާޅުގައި ބިރު ދައްކާވާފަ އެވެ. މިއީ އދ.ގެ ތާރީޚުގައި ވެސް ގައުމަކުން ޑިމޮކްރަސީއާ ދެކޮޅަށް މިހާ ހަޑި މުޑުދާރު އަމަލެއް ފާޅުގައި ހިންގި ފުރަތަމަ ފަހަރެވެ.
ނަމަވެސް އެމެރިކާގެ އިންޒާރުތަކަށް ބެލުމެއްނެތި އދ.ގެ މެންބަރު ގައުމުތަކުގެ ތެރޭގައި ހިމެނޭ 193 ގައުމުގެ ތެރެއިން 128 ގައުމުން ވަނީ އެމެރިކާއަށް ފާޅުގައި ގޮންޖަހައި އެމެރިކާއާ ދެކޮޅަށް ޖެނެރަލް އެސެމްބްލީގައި ވޯޓުދީ އެމެރިކާގެ އާރާއި ބާރުނެތްކަން ދުނިޔެއަށް ހާމަކޮށްދީފަ އެވެ. ދެން ހުރި ގައުމުތަކުގެ ތެރެއިން 35 ގައުމުން އެމެރިކާއާ އެއްކޮޅަށް ވޯޓު ދިނުމުގެ ބަދަލުގައި ވޯޓުގައި ބައިވެރިވުމަށް ދެކޮޅު ހަދާފައިވާ އިރު އަނެއްބައި ގައުމުތައް އެޖަލްސާއަށް ޙާޒިރެއް ނުވެ އެވެ. އެމެރިކާއާ އެއްކޮޅަށް ވޯޓު ދީފައިވަނީ އެންމެ ނުވަ ގައުމުންނެވެ. މީގެތެރޭގައި ގިނައީ އެމެރިކާއަށް ބަރޯސާވެގެން ދިރިއުޅޭ ވަރަށް ކުދިކުދި އާރެއްބާރެއްނެތް މައިކްރޯ ގައުމުތަކެވެ.
މި ދެވޯޓަކީ އެމެރިކާގެ އިތުރުން އިސްރާއީލު ވެސް ލަދުގަންނަވާލި ދެވޯޓެވެ. އިސްރާއީލު މިހާތަނަށް ދައުވާކުރަމުން ގެންދިޔައީ ޔަހޫދީންގެ ބާރު ދުނިޔޭގައި ގަދަކަމަށާ ޔަހޫދީ ލޮބީ ޖަމާއަތްތަކުން އެމެރިކާއަށް އަތްގަދަކޮށް ނުފޫޒު ހިންގާގޮތަށް ޔަހޫދީ ޒަޔަނިސްޓް މަހުޖަނުންގެ ބާރު މުޅި ދުނިޔޭގައިވެސް ގަދަ ކަމުގައެވެ. ނަމަވެސް ގުދްސުގެ މައްސަލާގައި އދ.ގައި ނެގި ވޯޓުތަކުން އެމެރިކާގެ ބާރާއި ނުފޫޒާ އަދި ޔަހޫދީ ޒަޔަނިސްޓުންގެ ބާރާއި ނުފޫޒުވެސް ދުނިޔޭގައި ނެތްމިންވަރު ހާމަވެފައިވާކަން އުރުދުޣާން ވެސް ފާހަގަކުރެއްވި އެވެ.
އަދި ގައުމުތައް ޑޮލަރުން ގަނެލުމުގައި އެމެރިކާ ފޭލްވެފައިވުމާއި ޔަހޫދީ ޒަޔަނިސްޓުންގެ ބާރު ދުނިޔޭގައި ކުޑަވެފައިވުމަކީ މުސްލިމުންނަށާއި އިސްލާމީ ދުނިޔެއަށް ލިބުނު ރަނގަނޅު މެސެޖެއްކަމަށާއި މިހާލަތު ބޭނުންކޮށްގެން އަމިއްލަ ނަފްސަށް ބަރޯސާވެގެން ތަރައްގީ ހާސިލްކޮށް އިލްމާއި މަސައްކަތް ތެރިކަންމާއި ޓެކްނޮލޮޖީ ތަރައްގީކޮށްގެން ބާރުވެރިކަން ހޯދުމަށް އުރުދުޣާން އިސްލާމީ އުންމަތަށް ގޮވާލެއްވި އެވެ.
އެމެރިކާގެ އާރާއި ބާރު ދުނިޔޭގައި ކުޑަވަމުންދަނީ ދުނިޔޭގެ ގައުމުތަކަށް ބޭނުންވާ ތަރައްގީގެ ފައިސާއާއި ލޯންފަދަ ތަކެތި ދިނުމުގެ މާލީ ގާބިލްކަން އެމެރިކާގެ ކިބާގައި ނެތުމުން ކަމަށާއި ހަނގުރާމަތަކަށް ޚަރަދުކުރަން ޖެހުމާއި އެމެރިކާގެ އަސްކަރިއްޔާއަށް ކުރަންޖެހޭ ބޮޑު ޚަރަދުގެ ސަބަބުން މުސްތަގްބަލްގައި އެމެރިކާ ދުނިޔޭގައި އިގްތިސާދީ ގޮތުން ވަރަށް ބޮޑަށް އިނދަޖެހިގެންދާނެކަމަށް ތަޖްރިބާކާރުން ދެކެއެވެ. (އަނަތޯލިޔާ)