26 Dec 2017, 11:47
އެމްޑީޕީގެ ފިކުރަކީ ގެންގުޅެން ހެޔޮވާވަރުގެ ފިކުރެއް ނޫން ކަމަށާއި މުސްލިމުން ދިރިއުޅޭ ތަނެއްގައި އެމްޑީޕީގެ ފިކުރު ގެންގުޅެން ހެޔޮނުވާނެ ކަމަށް ޕީޕީއެމްގެ ނައިބު ލީޑަރު އަދި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެ އެވެ.
ތުޅާދޫގެ ގޮނޑު ދޮށް ހިމާޔަަތް ކުރުމާއި ބަނދަރުގެ ނިމުން ރަސްމީކޮށް ފާހަގަކުރުމަށް މިއަދު އެ ރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން އަދުރޭ ވިދާޅުވީ އެކުވެރިކަމާއި އެއްބައިވަންތަކަން އަދި ތަރައްގީ ބޭނުންވިއަސް ޖާގަ ދޭންވީ "ހަމައެކަނި ޕީޕީއެމްގެ ފިކުރަށް" ކަމަށެވެ.
"ރައްޔިތުންނަށް ހެޔޮއެދޭ، ދިވެހި ރައްޔިތުންގެ ކުރިމަގު އުޖާލާކުރަން ބޭނުންވާ، ރާއްޖެއަށް ހެޔޮ ގޮތްތަށް ބޭނުންވާ ހަމަ އެކަނި ޕާޓީއަކަށް މިއަދު އޮތީ ރައީސް ޔާމީންގެ ގިޔާދަތުގައި ހިނގަމުންދާ ޕީޕީއެމް،" އަދުރޭ ވިދާޅުވި އެވެ.
ތުޅާދޫގައި އިންޓަނޭޝަނަލް އެއާޕޯޓެއް އަޅުއްވާނެ ކަމަށް ބުނެ ކުރީގެ ރައީސް މުހައްމަދު ނަޝީދު ދައްކަވާފައި ވާހަކަފުޅަށް އަދުރޭ ހަޖޫ ޖެއްސެވި އެވެ.
އަދުރޭ ވިދާޅުވީ ވެރިކަން ނިމުމުގެ ކުރިން އެއާޕޯޓު އަޅުއްވާނެ ކަމަށް ވައުދުވެ ވަޑައިގެންނެވި ބޭފުޅާ މިހާރު ވީތަނެއް ނޭނގޭ ކަމަށެވެ.
އަދި ތުޅާދޫ ރައްޔިތުންގެ އުންމީދުތަކުގައި ކުލަ ޖައްސަން ބޭނުންވާ ނަމަ ރިޔާސީ އިންތިހާބު އެ ރަށުން ރައީސް ޔާމީނަށް 75 ޕަސެންޓަށް ވުރެ މަތިން ވޯޓު ހޯދައި ދިނުމަށް އަދުރޭ ވަނީ އެދިވަޑަިއގެންފަ އެވެ.
"ދިވެހިރާއްޖެ ތަރައްގީގެ މަގުގައި ކުރިއަށް ގެންދެވޭނެ ހަމައެކަނި ސިޔާސީ ލީޑަރަކީ ރައީސް ޔާމީން،" އަދުރޭ ވިދާޅުވި އެވެ.
އެމްޑީޕީގެ ފިކުރު ފެއިލްވެފައިވާ ކަމަށް އަދުރެ ތަކުރާރުކޮށް ވިދާޅުވި އެވެ. ދެން ރާއްޖޭގައި އެ ފިކުރު ނުހިނގާނެ ކަމަށްވެސް ވިދާޅުވި އެވެ.
ދެހާސް އަށާރަ ވަނަ އަހަރުގެ ރިޔާސީ އިންތިހާބާ މެދު އެއްވެސް ސުވާލެއް ނެތް ކަމަށާއި އިންތިހާބު ކާމިޔާބު ކުރާނީ ރައީސް ޔާމީން ކަމަށް އަދުރޭ ވިދާޅުވި އެވެ.