24 Dec 2017, 12:47
ނ. އަތޮޅު މާފަރުގައި އަޅާ ބައިނަލްއަގްވާމީ އެއާޕޯޓަކީ އެކުވެރި އަރަބި އިމާރާތް ( ޔޫއޭއީ) އިން ދޭ ހަދިޔާއެއް ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ތިން އަތޮޅަކަށް މިއަދު ރައީސް ފެއްޓެވި ދަތުރުފުޅުގައި ނ. ހެނބަދު އަށް ވަޑައިގެން ވާހަކަފުޅު ދައްކަވަމުން ރައީސް ވިދާޅުވީ މާފަރު އެއާޕޯޓަކީ މިސަރުކާރާއި ޔޫއޭއީގެ ގުޅުން ރަމްޒު ކުރުމުގެ ގޮތުން އެބޭފުޅުން ދެއްވި ހަދިޔާއެއް ކަމަށެވެ.
"އެއާޕޯޓަކީ އެބޭފުޅުން (ޔޫއޭއީން) އަޅުގަނޑުމެންގެ ރައްޔިތުންނަށް ކޮށްދެއްވާ ހަދިޔާއެއް. މިސަރުކާރާ އިމާރާތުގެ ސަރުކާރާ ދޭތެރޭ އޮތް ގާތްކަން ރަމްޒުކޮށްދޭ ހަދިޔާއެއް ގޮތުގައި. ހަމަ އެއާ އެކީ އެއާޕޯޓުގައި ސިޓީ ހޮޓަލެއް ހެދިގެން ދާނެ،" ރައީސް ވިދާޅުވި އެވެ.
ސިޓީ ހޮޓަލުގެ ސަބަބުން ނ. އަތޮޅުގެ ރަށްރަށް ވިޔަފާރީގެ ގޮތުން ވެސް އިތުރު ތަރައްގީ ލިބިގެންދާނެ ކަމަށް ރައީސް ޔާމީން ވިދާޅުވި އެވެ.
ނ. އަތޮޅަށް ގެންނަ އެންމެ ބޮޑު ވިޔަފާރީގެ ފަހި ފުރުސަތަކަށް ވާނީ އެ އަތޮޅު މާފަރުގައި އަޅާ ބައިނަލް އަގުވާމީ އެއާޕޯޓުކަން ފާހަގަކުރައްވައި ރައީސް ވިދާޅުވީ ފެށޭ އަހަރު ޖުލައި މަހު އެއާޕޯޓަށް ބޯޓު ޖައްސާވަރު ވާނެ ކަމަށެވެ.
"މިހާރު އެއާޕޯޓު އެޅުމުގެ މަސައްކަތް ފެށިއްޖެ. ފެށިއްޖެއޭ މި ދެންނެވީ އެއާޕޯޓު އަޅާ ސަރަހައްދު ސާފުކޮށް ނިންމައިފި. ރުށްގަސް ކަނޑައި ނިންމިއްޖެ. އަމަލީ މަސައްކަތް މިހާރުން ފެށިގެން ގާތްގަނޑަކަށް ހައެއްކަ މަސް ވާންވާއިރަށް އެއާޕޯޓު ނިންމަން ހުރިހާ ގޮތަކުން ވެސް މަސައްކަތް ކުރަނީ." ރައީސް ވިދާޅުވި އެވެ.
ރައީސް ވިދާޅުވީ ހާއްސަކޮށް ނ. އަތޮޅަށް ތަރައްގީގެ މަޝްރޫއުތައް ގެނައުމަށް ބޮޑު އިސްކަމެއް ދެއްވާ ކަމަށެވެ. އެއީ ނ. އަތޮޅަކީ އެމަނިކުފާނާ ގާތް އަތޮޅަކަށް ވާތީ ކަމަށް ވިދާޅުވި އެވެ.
ރައީސް ޔާމީންގެ މަންމާފުޅަކީ ނ. ވެލިދޫ ބޭފުޅެކެވެ. އެމަނިކުފާނު ވަނީ ނ. އަތޮޅުގެ މެމްބަރުކަން މީގެ ކުރިން ކުރައްވައިފަ އެވެ.
ރައީސް ވިދާޅުވީ އެމަނިކުފާނުގެ އަރިހުގައި މަސައްކަތް ކުރައްވާ ގިނަ ބޭފުޅުންނަކީ ނ. އަތޮޅަށް ނިސްބަތްވާ ބޭފުޅުންނަށް ވުމަކީ ވެސް ހާއްސަ އިސްކަމެއް ދެވޭ އެއް ސަބަބު ކަމަށެވެ. އެގޮތުން އެމްޑީއޭގެ ލީޑަރު އަހުމަދު ސިޔާމް މުއަހްމަދާއި އެ ޕާޓީގެ ޑެޕިއުޓީ ލީޑަރު އަހުމަދު މައުރޫފުގެ ވާހަކަފުޅު ރައީސް ފާހަގަ ކުރެއްވި އެވެ.