19 Dec 2017, 10:07
ސަންޖޭ ލީލާ ބަންސާލީގެ ފިލްމު 'ޕަދްމާވަތީ' އާ ދެކޮޅަށް ވަރުގަދަ މުޒާހަރާތަކެއްކޮށް، އެ ފިލްމު ރިލީޒްކުރުން ހުއްޓުވާފައިވަނިކޮށް، 'ދަޅަކް'ގެ ޝޫޓިންގް އަށް ވެސް ހުރަސް އަޅައި އެ ފިލްމްގެ ޝޫޓިންގް ވެސް ހުއްޓުވައިިފި އެވެ.
ޝަޝާންތު ޑައިރެކްޓްކޮށް ކަރަން ޖޯހަރު ޕްރޮޑިއުސް ކުރާ ދަޅަކްގެ ޝޫޓިން ރާޖަސްތާނުގައި ފެއްޓިތަނާ އެ ފިލްމްގެ ޝޫޓިންގް ހުއްޓުވާފައި ވަނީ ފިލްމާ ދެކޮޅަށް މުޒާހަރާ ކުރި ބައެކެވެ. އަދި ފިލްމުގެ ޔުނިޓް ހެޑާ ދެކޮޅަށް ވަނީ މައްސަލަ ފުލުހުންނަށް ހުށަހަޅައިފަ އެވެ. އެ މީހުން އެ މައްސަލަ ފުލުހުންނަށް ހުށަހެޅީ ޝޫޓިން ކުރިއަށް ގެންދިޔަ ރާޖިސްޓާނުގައި ހުރި ޓެމްޕަލް އެއް ހަލާކުވި ކަމަށް ބުނެ އެެވެ.
ފިލްމުގެ ޔުނިޓް ހެޑާ ދެކޮޅަށް ފުލުހަށް މައްސަލަ ހުށަހެޅި ފަރާތުން އިންޑިއާގެ ބައެއް ނޫސްތަކަށް ބުނެފައި ވަނީ އެ މީހުން އަޅުކަން ކުރާ ތަކެއްޗަށް ގެއްލުން ދިނުމަށް އެއްވެސް ބަޔަކަށް އެ ފުރުސަތު ނުދޭނެ ކަމަށާއި ތާރީހީ ބިނާތަކަކީ އެ ބަޔަކަށް މުހިއްމު ތަންތަން ކަމަށާއި އެ ތަކެތި ހަލާކު ކުރަން އެއްވެސް ބަޔަކަށް ހައްގެއް ނޯންނާނެ ކަމަށެވެ.
ކާމިޔާބު އެކްޓަރު ޝާހިދު ކަޕޫރުގެ އެއްބަނޑު ކޮއްކޮ އިޝާން ކައްޓަރު އަދި ސްރީދޭވީ އާއި ބޯނީ ކަޕޫރުގެ ދޮށީ އަންހެން ދަރިފުޅު ޖާންވީ ކަޕޫރު ފިލްމުން ލީޑް ރޯލެއް ކުޅެ އެވެ. އެ ފިލްމަކީ މިދިޔަ އަހަރު ރިލީޒް ކުރި ކާމިޔާބު މަރާޓީ ފިލްމު 'ސައިރާތު'ގެ ރީމޭކް އެކެވެ.
'ސައިރާތު' ބިނާކޮށްފައި ވަނީ މަހަރާޝްތްރަގައި ހިނގި ލޯބީގެ ހާދިސާއަކަށް ނަމަވެސް 'ދަޅަކް'ގައި ފެނިގެންދާ ލޯބިގެ ވާހަކަ ނިސްބަތް ވަނީ ރާޖަސްތާނަށެވެ.
ފިލްމު ރިލީޒް ކުރާނީ އަންނަ އަހަރުގެ ޖުލައި މަހުގެ ހަ ވަނަ ދުވަހު އެވެ.
މިއީ ޖާންވީގެ ފުރަތަމަ ފިލްމެވެ. ނަމަވެސް އިޝާން ވަނީ މާޖިދް މަޖީދީގެ 'ބިޔޯންޑް ދަ ކްލައުޑްސް' އިން ފެނިގެން ގޮސްފަ އެވެ.